الماتى وبلىسىندا ەپيدەميلوگيالىق جاعداي تۇراقتالىپ، ىندەت جۇقتىرعاندار سانى ازايىپ كەلەدى. ەنگىزىلگەن ەكى اپتالىق شەكتەۋ شارالارى ءوز ناتيجەسىن بەرە باستادى. وڭىردە كارانتيندىك شەكتەۋ شارالارى ەنگىزىلگەنگە دەيىن كۇنىنە 300 دەن اسا ادام سىرقاتتانىپ، اۋرۋحاناعا تۇسەتىن. ال، قازىر بۇل كورسەتكىش ەكى ەسەگە كەمىگەن دەپ حابارلايدى abai.kz ءتىلشىسى. 

ەكى اپتادا قوعامدىق كولىك قاتىناسى سيرەپ، ويىن-ساۋىق جانە ساۋدا نىساندارىنىڭ جابىلۋى وڭىردە ىندەت تاراۋىن تەجەدى. سول سەبەپتى  سىرقاتتانعاندار سانى ازايىپ، اۋرۋحانالارداعى جاتىن ورىندار بوساي باستاعان. وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاقتىڭ ايتۋىنشا، ايماقتا جەدەل جاردەم ستانتسياسىنا قوڭىراۋ شالۋ سانى 20 پايىزعا ازايعان. مۇنىڭ بارلىعى 391 ءموبيلدى توپتىڭ سىرقاتتاردى ۇيلەرىندە قابىلداۋىنىڭ ناتيجەسى. سونىمەن قاتار، تاۋلىك بويى حالىققا كەڭەس بەرەتىن 5 call-ورتالىق جۇمىس ىستەپ تۇر. 

بۇگىندە الماتى وبلىسىندا بەس مىڭنان استام ادام دارىگەرلەر باقىلاۋىندا. ناۋقاستاردى ەمدەۋ ءۇشىن ءۇش مىڭنان استام مەديتسينا قىزمەتكەرى امبۋلاتوريالىق جانە ستاتسيونارلىق دەڭگەيدە جۇمىس ىستەيدى. سونىمەن قاتار، ايماقتا 30 دان اسا مونيتورينگتىك توپ جۇمىس ىستەپ جاتىر. ولار كارانتيندىك تالاپتاردىڭ ساقتالۋىن قاداعالاپ، ءدارى-دارمەك باعاسىن باقىلاۋعا العان. وڭىردە مەديتسينالىق قۇرىلعىلاردى ساتىپ الۋعا دا ءمان بەرىلىپ وتىر.   

«جەرگىلىكتى بيۋدجەتتەن 3 ملرد تەڭگە ءبولىندى. بۇل قارجىعا 177 جاساندى وكپە جەلدەتۋ اپاراتى سونىمەن قاتار رەنگەن اپاراتى ساتىپ الىنادى.  بۇدان بولەك ەمدىك پرەپاراتتار ءۇشىن 550 ملن تەڭگە ءبولىندى. وعان قاجەتتى فارماتسەۆتيكالىق ءونىم الىنىپ، ءدارى دارمەك قورى جاساقتالادى.»، - دەيدى الماتى وبلىسى اكىمىنىڭ ورىنباسارى باتىرجان بايجۇمانوۆ. 

جالپى، سەنبى-جەكسەنبى كۇندەرى وبلىستاعى وزەن كولدەرگە بارىپ شومىلاتىنداردىڭ قاتارى كۇرت كوبەيدى. دەمالىس ايماعى ىندەت وشاعىنا اينالماۋى ءۇشىن كەيبىر اۋداندارعا ەكى كۇندىك قاتاڭ شەكتەۋ شارالارىن ەنگىزۋ جوسپارلانىپ وتىر. سالا ماماندارى وسى ارقىلى قاۋىپسىزدىكتى كۇشەيتىپ،     ىندەت تاراۋىن تەجەمەك. 

 ايمان اسىل 

Abai.kz