قازاقستانداعى ەڭ ءىرى قوعامدىق ۇيىمداردىڭ ءبىرى – قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن قۇرىلعان  قازاقستان حالقى اسسامبلەياسى ەكەنىن بىلەمىز. ەلدە ىندەت ءورشىپ، كوروناۆيرۋس پەن پنەۆمونيا ىندەتى قوس بۇيىردەن قىسقان وسىناۋ كەزەڭدە اسسامبلەيا وكىلدەرى دە ەلگە سەپ بولارلىق يگى باستاما كوتەرىپتى.

اسسامبلەيا وكىلدەرى پنەۆمونيا ىندەتى ورشىگەن سوڭعى ايلاردا ىندەتپەن كۇرەستىڭ الدىڭعى شەبىندە جۇرگەن دارىگەرلەر مەن مەدقىزمەتكەرلەرگە قولداۋ كورسەتىپ، 151 ميلليون تەڭگەنىڭ ءدارى-دارمەگى مەن وكپەنى جاساندى جەلدەتۋ اپپاراتتارىن الىپ بەرگەن.

سونداي-اق، قحا ەرىكتىلەرى اۋرۋحانالار مەن پروۆيزورلىق ورتالىقتارداعى ناۋقاس ازاماتتارعا تەگىن توسەك جايمالارى، جەكە گيگيەنالىق قۇرالدار، مەديتسينالىق زاتتار مەن ىستىق تاماق جەتكىزىپ بەرگەن. ءتىپتى، ۇيىم بەلسەندىلەرىنىڭ ۇيىمداستىرۋىمەن تۇيە، سيىر، بيە جانە ەشكى سۇتتەرىن، اعارعان ونىمدەردى دە تەگىن تاراتقان ەكەن. بۇل تۋرالى اسسامبلەيانىڭ رەسمي سايتىندا حابارلادى.

ال ۇيىمنىڭنىڭ ەرىكتى جاستارى مەديتسينا قىزمەتكەرلەرىنە تەگىن كولىكتىك قىزمەت ۇسىنعان. بۇلاردان بولەك، قحا مۇشەلەرى مەديتسينا قىزمەتكەرلەرىنە، جەدەل-جاردەم كولىكتەرىنە 7 توننا جانارماي قۇيىپ بەرگەن.

وسى تۇستا ايتا كەتەرلىگى، قازاقستان حالقى اسسامبلەياسىنىڭ وڭىرلەردەگى ەتنو-مادەني بىرلەستىكتەرى دە ەل باسىنا ىندەت كەلگەن وسى كەزەڭدە بەلسەندىلىك تانىتىپ، جەرگىلىكتى اۋرۋحانالارعا شەتەلدەن وتتەگى كونسەنتراتتارى مەن مەديتسينالىق جابدىقتاردى تارتۋ ەتكەن.

الا كەلە جاتقان قۇرباي ايت مەرەكەسىنە وراي قحا مۇشەلەرى «مىڭ العىس» اكتسياسىن قولعا العان.

ەستەرىڭىزگە سالا كەتەيىك، بۇعان دەيىن قازاقستان حالقى اسسامبلەياسىنىڭ «جاڭعىرۋ جولى» جاستار قوزعالىسى قازاقستاننىڭ بارلىق وڭىرىندە «ماسكا تاعىڭىز» اكتسياسىن وتكىزگەن.

اتالعان شارا بارىسىندا قحا ەرىكتى جاستارى رەسپۋبليكانىڭ بارلىق قالالارىندا كوشەلەر مەن ءۇي قابىرعالارىنا «ماسكا تاعىڭىز! دەنساۋلىعىڭىزدى ساقتاڭىز!» دەگەن جازبالار قالدىرعان. قوعامدىق ورىنداردا گيگيەنالىق تازالىقتىڭ ماڭىزدىلىعىن ءتۇسىندىرىپ، جەكە قورعانىس زاتتارىن پايدالانۋعا شاقىرعان.

قازاقستان حالقى اسسامبلەياسى بيىل ناۋرىز ايىندا پرەزيدەنت توقاەۆتىڭ پارمەنىمەن، ەلدە توتەنشە جاعداي جاريالانعان كەزدە «ءبىز بىرگەمىز» اكتسياسى اياسىندا مۇقتاج وتباسىلارعا 376,5 ميلليون تەڭگە قارجىلاي كومەك كورسەتىپ، 515 مىڭ مەديتسينالىق بەتپەردەنى تەگىن تاراتقان.

ال تۇركىستان وبلىسىنا قاراستى ماقتاارال اۋدانىندا شەتىن وقيعا ورىن الىپ، قىزىلسۋ باسقاندا ەتنوبىرلەستىكتەر 101,9 ميلليون تەڭگەگە 335 توننا گۋمانيتارلىق كومەك جىبەرگەن.

قازاقستان حالقى اسسامبلەياسىن قۇرۋ يدەياسىنىڭ اۆتورى - ەلباسى نۇرسۇلتان نازارباەۆ. 1992 جىلعى قازاقستان حالىقتارى فورۋمىندا باستاما كوتەرىلىپ، 1995 جىلى وعان كونسۋلتاتيۆتى كەڭەس مارتەبەسى بەرىلگەن.

قازىرگى تاڭدا ەلدەگى ەتنوسارالىق تاتۋلىق پەن تۇراقتىلىقتىڭ كەپىلىنە اينالعان بۇل ۇيىمنىڭ 9 وكىلى قازاقستاننىڭ نەگىزگى زاڭ شىعارۋشى ورگانى - ماجىلىستە دەپۋتات. 100-دەن اسا ەتنوستىڭ باسىن بىرىكتىرىپ وتىرعان بىرىگەي ۇيىمنىڭ 400-گە تارتا مۇشەسى بار ەكەن.

Abai.kz