بيىلعى جىلدىڭ مامىر ايىندا مەملەكەت باسشىسى قاسىم-جومارت كەمەلۇلى توقاەۆتىڭ تىكەلەي باستاماسىمەن كوروناۆيرۋس ىندەتىنە قارسى كۇرەسكە بەلسەندى قاتىسىپ، ۇلەس قوسقان ەل ازاماتتارىن ارنايى «حالىق العىسى» مەدالىمەن ماراپاتتاۋ تۋرالى باستاما كوتەرىلگەن بولاتىن. 

وسىدان كەيىن پرەزيدەنت اتاعان «حالىق العىسى» مەدالىنىڭ ەسكيزدىك جوباسى بۇقارالىق اقپارات قۇرالدارىندا جاريالاندى. بۇل جوبا ارنايى قوعام تالقىسىنا ۇسىنىلىپ، تالقىلاۋعا ءتۇستى. ارتىنشا وسىعان بايلانىستى قاۋلى-جارلىق قابىلدانىپ، اتالعان مەدالمەن كىمدەردىڭ ماراپاتتالاتىنى رەسمي جاريا بولدى.

«حالىق العىسى» مەدالىمەن كوروناۆيرۋس ىندەتىمەن كۇرەسكە ەرەكشە بەلسەندى ۇلەس قوسقان قازاقستان رەسپۋبليكاسىنىڭ ازاماتتارى ماراپاتتالادى.

بۇل ماراپاتقا لايىقتى ازاماتتاردى قر پارلامەنتى، ۇكىمەتى، كونستيتۋتسيالىق كەڭەس، جوعارعى سوت، ءتۇرلى مينيسترلىكتەر مەن باسقا دا مەملەكەتتىك ورگاندار، نۇر-سۇلتان، الماتى مەن شىمكەنت قالالارىنىڭ جانە وبلىستاردىڭ اكىمدەرى، قوعامدىق ۇيىمدار ۇسىنا الادى»، - دەپ جازىلعان بولاتىن پرەزيدەنت جارلىعىندا.

تۇتاس دۇنيەنى تابانىنان تىك تۇرعىزعان كوروناۆيرۋس ىندەتى ءبىزدىڭ ەلگە، قازاقستان اۋماعىنا دا تارالىپ، ەلدە توتەنشە جاعداي مەن كارانتين جاريالانعانى بەلگىلى. وسىنداي تار كەزەڭدە كەۋدە كەرىپ الدىعا شىعىپ، حالىق ءۇشىن قىزمەت ىستەۋگە بەل شەشە كىرىسكەن، قاۋىپى تۇتاس عالامدى شوشىتقان كوروناۆيرۋسپەن كۇرەسكە شىنداپ ارالاسقاندار - ەرىكتىلەر توبى بولعانى دا شىندىق.

ەرىكتىلەردىڭ ەل ءۇشىن ەتكەن ەڭبەگى ەسكەرىلىپ، قاۋىپكە قارسى تۇرعان قىزمەتتەرى قۇرمەتكە لايىق ەكەنى ايتىلدى. وسىعان وراي، جۋىردا مەملەكەت باسشىسى قاسىم-جومارت توقاەۆ ءوزى تاعايىنداعان «حالىق العىسى» ارنايى مەدالىمەن «Birgemiz» جالپى رەسپۋبليكالىق اكتسياسىنىڭ ەرىكتىلەرى ماراپاتتالدى. كوروناۆيرۋس كەزىندە كەۋدە كەرىپ ەل ءۇشىن ەڭبەك ەتكەن ەرىكتىلەر بۇل ماراپاتقا ابدەن لايىق ەكەنى ءسوزسىز. ءبىزدىڭ بۇل ءسوزىمىزدى كوپشىلىك تەگىس قولدايتىنى انىق.

«حالىق العىسى» ارنايى مەدالىمەن ماراپاتتالعان ەرىكتىلەرگە مەملەكەت باسشىسىنىڭ مەدالىن تابىستاۋ ءراسىمى «نۇر وتان» پارتياسىنىڭ ورتالىق اپپاراتىندا وتكەن بولاتىن. اتالعان سالتاناتتى شارا بارىسىندا پارتيا توراعاسىنىڭ ءبىرىنشى ورىنباسارى باۋىرجان بايبەك قۇتتىقتاۋ ءسوز سويلەپ، ەل باسىنا كۇن تۋعان الاعاي دا بۇلاعاي كەزەڭدە ەلگە قىزمەت ەتىپ جۇرگەن ەرىكتىلەرگە ەرەكشە العىس ءبىلدىردى.

باۋىرجان بايبەكتىڭ ايتۋىنشا، ەرىكتىلەر كوروناۆيرۋس كەزىندە عانا ەمەس، ەلدە ورىن العان كەز-كەلگەن قيىندىق تۇسىندا كەۋدە كەرىپ العا شىعادى. ماسەلەن بيىل كوكتەمدە ورىن العان تۇركىستان وبلىسى ماقتاارال اۋدانىنداعى سۋ تاسقىنىن اۋىزدىقتاۋ تۇسىندا دا ەرىكتىلەردىڭ ەرەكشە كومەگى تيگەن ەدى.

«بۇگىن ماعان پرەزيدەنت قاسىم-جومارت توقاەۆتىڭ اتىنان سىزدەرگە «حالىق العىسى» ارنايى مەدالىن تابىستاۋ مىندەتى بەرىلىپ وتىر. سىزدەر ءوز ومىردەرىڭىز بەن دەنساۋلىقتارىڭىزعا تونگەن قاۋىپكە قاراماستان، بىرنەشە اي بوتسيى مۇقتاج ازاماتتارعا بارىنشا كومەكتەستىڭىزدەر.

تۇركىستان وبلىسىنداعى ماقتاارال اۋدانىندا شەتىن وقيعا بولىپ، سۋ باسقاندا دا العاشقىلاردىڭ ءبىرى بولىپ كومەككە كەلدىڭىزدەر. ازاماتتىق بەلسەندىلىكتەرىڭىز بەن تازا نيەتتەرىڭىز ءۇشىن سىزدەرگە العىس ايتامىن»، - دەدى «نۇر وتان» پارتياسى توراعاسىنىڭ ءبىرىنىش ورىنباسارى باۋىرجان بايبەك.

ايتا كەتەيىك، بۇعان دەيىن ءۇش مىڭنان استام جاس قازاقستاندىق قازاقستاننىڭ تۇڭعىش پرەزيدەنتى، ەلباسى نۇرسۇلتان ءابىشۇلى نازارباەۆتىڭ ارنايى العىس حاتتارىمەن ماراپاتتالعان بولاتىن. بۇل دا بولسا حالىقتىڭ قامى دەپ جۇمىس ىستەپ جۇرگەن جاس ەرىكتىلەرگە دەگەن قولداۋ، قۇرمەتتەۋدىڭ ءبىر بەلگىسى ەكەنى انىق.

بۇگىنگىدەي اركىم ءوز قارا باسىنىڭ قامىن كۇيتتەگەن قيىن زاماندا، ەشقايندا اقى-قارجى تالاپ ەتپەي، ءوز ەركىمەن بار نيەتىمەن ەرىكتى تۇردە ەل ءۇشىن قىزمەت ىستەۋ ەكىنىڭ ءبىرىنىڭ قولىنان كەلەتىن جۇمىس ەمەس. دەمەك، مەملەكەت باسشىسى بيىلعى جىلدى بەكەردەن-بەكەر ەرىكتىلەر جىلى دەپ جاريالاپ وتىرعان جوق. ەل ءۇشىن ەرىنبەي ەڭبەك ەتەتىن ەرىكتىلەر قاۋىمىنىڭ ەڭبەگىن ەلەپ-ەسكەرىپ، قۇرمەت كورسەتۋ، جوعارى باعالاۋ دەپ ءتۇسىنۋ كەرەك مۇنى.

مەملەكەت باسشىسى قاسىم-جومارت توقاەۆ تىكەلەي ءوزى پارمەن بەرىپ، ەلدە توتەنشە جاعداي جاريالانعاندا ەلباسى نۇرسۇلتان نازارباەۆ قولداپ، «ءبىز بىرگەمىز» قورى قۇرىلعان بولاتىن. اتالعان قوردان 550 مىڭنان استام اسا مۇقتاج وتباسىعا قارجىلاي كومەك كورسەتىلگەن. مۇنىڭ ءوزى ەل بيلىگىنىڭ قيىن كەزدە حالىقتىڭ قاسىنان تابىلا بىلەتىنىن اڭعارتادى دەپ ويلايمىز.

وسىنداي قيىن كەزەڭدە ەرىكتىلەر بىرنەشە اي بويى ەلىمىزدىڭ اۋماعىندا بەس ميلليونعا جۋىق بەتپەردەنى تەگىن تاراتۋمەن اينالىسقان. بۇدان بولەك، ولار ءۇش ءجۇز مىڭنان استام الەۋمەتتىك تۇرعىدا از قامتىلعان وتباسىلارعا العاشقى قاجەتتىلىك ساناتىنداعى ازىق-تۇلىك قوراپتارىن ۇلەستىرىلگەن بولاتىن. ەرەكشە ايتا كەتەرلىگى، اتالعان جۇمىستاردىڭ بارلىعىنىڭ باسى-قاسىندا ەرىكتىلەر جاساعانىڭ جاستارى ءجۇردى.

وسىدان-اق، ەرىكتىلەردىڭ ەل ومىرىندە الاتىن ورىن اڭعارۋعا بولاتىن سەكىلدى. ولاردىڭ ىستەگەن جۇمىستارىنا دەگەن قۇرمەت پەن باعالۋدىڭ قاجەتتىلىگىن ءتۇسىنۋ قيىن ەمەس. مەملەكەت باسشىسىنىڭ نە ءۇشىن 2020 جىلدى ەرىكتىلەر جىلى دەپ جاريالاعانىن، نە ءۇشىن «حالىق العىسى» ارنايى مەدالىمەن ەرىكتىلەردى ماراپاتتاعانىن بىردەن اڭعارۋعا بولادى دەپ ويلايمىز.

Abai.kz