6 تامىز كۇنى كەشكى ساعات 19:30 شاماسىندا باتكەن اۋدانىنىڭ كوك-تاش اۋىلى شەتىندەگى جاكا-ورۇك ۋچاسكەسىندە ەگىن سۋعارىپ جۇرگەن قىرعىزستاندىق ازاماتقا بەلگىسىز تاراپتان وق اتىلعان. ول جارالانعان.

بۇل تۋرالى ازاتتىققا باتكەن اۋداندىق اكىمشىلىگى حابارلاعان.

ونىڭ ايتۋىنشا، وق جەرگىلىكتى تۇرعىننىڭ ەكى جەرىنە - جەلكەسىنە جانە جامباسىنا تيگەن. ول اۋرۋحاناعا جەتكىزىلدى، جاعدايى ورتاشادان اۋىر دەپ باعالانىپ وتىر.

مەملەكەتتىك شەكارا قىزمەتى بۇل وقيعا تەكسەرىلىپ جاتقانىن، باقىلاۋدا ەكەنىن، قوسىمشا مالىمەت بەرەتىنىن حابارلادى.

قىرعىز-تاجىك مەملەكەتتىك شەكاراسىندا 6 تامىز كۇنى تاڭەرتەڭ وق اتىلعانى تىركەلگەن. قىرعىزستاننىڭ مەملەكەتتىك شەكارا قىزمەتى باتكەن اۋدانىنا قاراستى ەكي-تاش دەگەن جەردە تاجىك تاراپتان بەلگىسىز بىرەۋلەر قىرعىز شەكاراشىسىن دالدەپ، مەرگەن مىلتىعىمەن اتقانىن حابارلاعان. اقپاراتقا قاراعاندا، شەكارا وتريادىنىڭ قىزمەتكەرى قولىنان جاراقات الىپ، دارىگەرلەر جاعدايى بىرقالىپتى دەپ باعالاعان.

سول كۇنى تاجىكستاننىڭ "حوۆار" اگەنتتىگى 6 تامىزدا تاڭعا جۋىق يسفارا ايماعىندا قىرعىزستاننىڭ "كوكتاش" شەكارا بەكەتى باسشىسى كابيروۆ شەر توز-8 مەرگەن مىلتىعىنان اتىلعان وقتان جارالانعانىن تاجىكستاننىڭ ۇلتتىق قاۋىپسىزدىك قىزمەتىنە سىلتەمە بەرىپ جازدى. وندا سونىمەن بىرگە سامونيەن اۋىلىنىڭ تۇرعىنى ۆاححوبوۆ ۆوحيددين اياعىنا وق ءتيىپ، قازا بولعانى جازىلعان.

بۇل وقيعاعا بايلانىستى كەشكىسىن قىرعىزستاننىڭ باتكەن، تاجىكستاننىڭ سوعدى وبلىستارىنىڭ بيلىك وكىلدەرى، شەكارا جانە قۇقىق قورعاۋ ورگاندارىنىڭ قىزمەتكەرلەرى كەلىستى.

Abai.kz