ەلىمىزدە ۇلتتىق ساناق جۇرگىزۋ ءبىر جىل كەيىنگە قالدى. ءبۇل تۋرالى ستاتيستيكا كوميتەتى مالىمدەگەن. 

كوميتەتتىڭ رەسمي سايتىنداعى مالىمەتكە سەنسەك، ۇكىمەت وتكەن جىلى 19 ماۋسىمدا 2020 جىلى ۇلتتىق ساناق وتكىزۋ تۋرالى قاۋلى شىعارعان. وعان سايكەس، قازاقستان رەسپۋبليكاسىنىڭ ۇلتتىق حالىق ساناعى بيىلعى 1-30 قازان ارالىعىندا وتۋگە ءتيىس ەدى.

«ەلىمىزدە كوروناۆيرۋس ينفەكتسياسىنىڭ تارالۋى مەن ەنگىزىلگەن كارانتين شارالارىنا بايلانىستى ۇلتتىق حالىق ساناعىن 2021 جىلعى قازان ايىنا اۋىستىرۋ جونىندە شەشىم قابىلداندى» دەپ مالىمدەيدى كوميتەت.

ۇلتتىق حالىق ساناعىن وتكىزۋ ءادىسى وزگەرىسسىز قالادى.

ياعني 1-15 قازان ارالىعىندا مامانداندىرىلعان sanaq.gov.kz سايتىندا ينتەرنەت-ساۋالناما جۇرگىزىلەدى، ال 1-30 قازان ارالىعىندا مالىمەتتەردى جيناۋ ءۇشىن ينتەرۆيۋەرلەر جاۋاپتى پلانشەتتە تىركەي وتىرىپ، حالىققا جاپپاي ساۋالناما جۇرگىزەدى.

بۇعان دەيىن ۇلتتىق ەكونوميكا ءمينيسترى رۋسلان دالەنوۆ ىندەتكە بايلانىستى حالىق ساناعى كەلەسى جىلعا شەگەرىلۋى مۇمكىن ەكەنىن حابارلاعان بولاتىن.

«جالپى قازاقستاندا حالىق ساناعىن 2020 جىلدىڭ 1 قازانىنان باستاپ جۇرگىزۋ جوسپارلانعان. الايدا حالىق ساناعىن جۇرگىزەتىن قىزمەتكەرلەر حالىقپەن جاقىن قارىم-قاتىناستا ەڭبەك ەتەتىندىكتەن، كوروناۆيرۋس ينفەكتسياسى قاۋپىنىڭ الدىن الۋ ماقساتىندا ۇلتتىق ەكونوميكا مينيسترلىگى ۇكىمەتكە ساناقتى كەلەسى جىلعا شەگەرۋدى ۇسىندى. مۇنداعى نەگىزگى سەبەپ – حالىقتىڭ جانە حالىق ساناعىن جۇرگىزەتىن پەرسونالدىڭ اماندىعى. ءبىز ءتيىستى شەشىمدى كۇتىپ وتىرمىز»، - دەگەن ەدى مينيستر ءباسپاسوز ءماسليحاتىندا.

Abai.kz