بۇگىنگى كۇنى حالىقپەن بەلسەندى كەرى بايلانىستى جولعا قويىپ، ولاردى تىڭداۋ، سۇرانىستارىنا جاۋاپ بەرۋ وتە ماڭىزدى. بۇل تۋرالى بۇگىن Zoom تۇعىرناماسىندا پرەزيدەنتتىك كادرلىق رەزەرۆكە كىرگەن جاستارمەن ونلاين رەجيمدە كەزدەسكەن قر اقپارات جانە قوعامدىق دامۋ ءمينيسترى ايدا بالاەۆا ايتتى. 

«ماڭىزدى سالالاردىڭ ءبىرى - جاستار ساياساتى. ءبىز ادىستەرىن وزگەرتتىك. ولار جاستاردىڭ جاس ەرەكشەلىكتەرىنە بايلانىستى قىزىعۋشىلىقتارىنا جانە الەۋمەتتىك ساناتىن وراي سارالانادى. الەۋمەتتەندىرىلگەن توپتىڭ بار ەكەندىگى تۇسىنىكتى. بىراق، ءبىز قامتىماعان جاستار دا بار. ولارمەن ءوزارا ءىس-قيمىلدى قالاي جولعا قويۋ كەرەك، قانداي جوبالاردى جۇزەگە اسىرعان ءجون دەگەن ماسەلەلەرمەن جۇمىس ىستەۋ قاجەت. وسى ورايدا جاستاردىڭ بەلگىلى ءبىر ساناتىنا قىزىقتى جوبالار ۇسىنعاندارىڭىزدى قالايمىز»، - دەدى مينيستر پرەزيدەنتتىك كادرلىق رەزەرۆكە كىرگەن جاستارعا.

ونىڭ اتاپ وتۋىنشە، وتباسىلىق ساياسات سالاسىندا وتباسىلىق قۇندىلىقتاردى ناسيحاتتاۋ قاجەت. ۇلتتىق كودتى ساقتاپ قالۋ دا ماڭىزدى ماسەلەلەردىڭ ءبىرى. ويتكەنى، قازىرگى جاھاندانۋ داۋىرىندە ۇلتتىق تىلدەن، مادەنيەتتەن، سالت-داستۇردەن ايىرىپ قالۋ وپ-وڭاي.

«مۇنىڭ بارلىعى وتباسىدان باستالادى. سوندىقتان وسىناۋ وتباسىلىق قۇندىلىقتاردى ناسيحاتتاۋ ماڭىزدى. اجىراسۋ سانى ارتىپ بارادى. سەبەبى سان الۋان: مىنەزدىڭ ۇيلەسپەۋى، تۇرمىستىق پروبلەمالار. وسى رەتتە جاس وتباسىلار اراسىنداعى اجىراسۋ پايىزىن بارىنشا قىسقارتۋ ءۇشىن تىعىز ءوزارا ءىس-قيمىل جاساۋىمىز ماڭىزدى بولىپ وتىر»، - دەدى ول.

سونىمەن قاتار مينيستر دىنارالىق كەلىسىمدى ساقتاۋ ماسەلەسىنە دە ايرىقشا توقتالىپ، دەسترۋكتيۆتى سەكتور تاراپىنان ۇلكەن سىن-تەگەۋرىن بولىپ تۇرعاندىعىن اشىق ايتتى. پروبلەما ادامنىڭ دىنشىلدىگىنە ەمەس، ونىڭ ءدىني ساۋاتسىزدىعىندا ەكەندىگىن ايرىقشا اتاپ ءوتتى.

«تەولوگتارىمىز بارلىق ۋاقىتتا بەلگىلى ءبىر ءدىني ۇيىمنىڭ ەرەكشەلىكتەرى دايىندا قىزىقتى ءارى جەتەسىنە جەتكىزىپ ايتا الماۋى دا مۇمكىن. ءبىز بۇل باعىتتا جاڭا فورمالار مەن ادىستەر ازىرلەۋىمىز قاجەت. تۇرمىستىق جانجالدىڭ ەتنوسارالىق الاۋىزدىققا اينالىپ كەتۋگە بەيىم ەكەندىگىن وزدەرىڭىز دە كورىپ وتىرسىزدار. بۇعان جول بەرۋگە بولمايدى. ويتكەنى، بۇل وتە نازىك سالا. ەلىمىزدە ورىن العان تۇراقتىلىقتى ساقتاۋ جانە قاراپايىم تۇرمىستىق جاندالداردى ەتنوسارالىق شيەلەنىسكە ورشۋىنەجول بەرمەۋىمىز كەرەك. سوندىقتان وزدەرىڭىزدى تاعى دا بەلسەندى ىنتىماقتاستىققا شاقىرامىن»، - دەدى ايدا بالاەۆا جاستارعا قاراتا.

Abai.kz