بەلارۋس سايلاۋىنداعى پرەزيدەنت لۋكاشەنكونىڭ باستى وپپونەنتى بولعان سۆەتلانا تيحانوۆسكايا شەرۋلەتكەن حالىققا تاعى ءبىر ۇندەۋ جاريالادى.

«ەلدە قايتادان تىنىشتىق ورناپ، ساياسي تۇتقىنداردىڭ بارلىعىن بوساتىپ، تەز ارادا جاڭا پرەزيدەنت سايلاۋىن ۇيىمداستىرۋعا جاعداي جاساۋ ءۇشىن ۇلت ليدەرى بولۋعا مەن دايىنمىن»، - دەپ مالىمدەدى تيحانوۆسكايا. سۆەتلانا تيحانوۆسكايانىڭ سول مالىمدەمەسىن قازازاقشاعا اۋدارىپ بەرگەندى ءجون كوردىك.

تيحانوۆاكايانىڭ مالىمدەمەسى:

- مەنىڭ قىمباتتى دا سۇيىكتى بەلارۋستەرىم! ءبىزدىڭ ءبارىمىز قازىر ەل تاريحىنداعى ەڭ ءبىر كۇردەلى كەزەڭدى باستان وتكەرۋدەمىز. وڭباعاندىق پەن باتىرلىق، ماحاببات پەن ساتقىندىق، شاراسىزدىق پەن ەرلىك بەتپە-بەت تۇيىسكەن تۇستامىز. ءبىز ءوز تاڭداۋىمىزدى جاساۋىمىز كەرەك. مۇنى بىزدەن بۇگىنگى ۋاقىت تالاپ ەتىپ وتىر. ءبىز ءوز باتىرلارىمىزدى جەرلەپ جاتقان ءدال بۇگىنگى كۇنى مەن سىزدەرمەن بىرگە جىلاپ وتىرمىن. بۇل ءبىز ءۇشىن ورنى تولماس قازا. بەيكۇنا جاستار... ولاردىڭ وتباسىلارىنا قولداۋ كورسەتۋ ماڭىزدى. بولاشاقتا ولاردىڭ ەسىمدەرىن كوشەلەرگە بەرۋىمىز كەرەك.  ولاردىڭ ەسىمدەرى ءبىزدىڭ جادىمىزدا ماڭگى قالادى.

ءوزىمنىڭ ساياسي كارەراما قاتىستى ەشقانداي يلليۋزيا بولعان جوق. مەنىڭ ساياساتكەر بولعىم كەلگەن جوق. بىراق، تاعدىردىڭ ءوزى مەنى ادىلەتسىزدىكپەن كۇرەستىڭ الدىڭعى شەبىنە شىعاردى. تاعدىر جانە سىزدەر! ماعان سەنگەن، كۇش بەرگەن، سەنىم بەرگەن - سىزدەر! سىزدەر ماعان ءوز داۋىستارىڭىزدى بەردىڭىزدەر! مەن مۇنى جوعارى باعالايمىن جانە نە ءۇشىن ولاي ەتكەندەرىڭىزدى جاقسى تۇسىنەمىن! وسىدان 26 جىل بۇرىن تۇسكەن وسى ءبىر تۇيىقتان شىققىمىز كەلەدى.

مەن وزىمە جاۋاپكەرشىلىك الا وتىرىپ، وسى كەزەڭدە ۇلت كوشباسشىسى بولۋعا دايىنمىن! ەل تىنىشتالۋى ءۇشىن، بۇرىنعى بەيبىت ءومىر ورناۋى ءۇشىن، بارلىق ساياسي تۇتقىنداردى بوساتۋ ءۇشىن جانە ەڭ قىسقا مەرزىمدە قايتادان سايلاۋ وتكىزۋ ءۇشىن، زاڭدىق جازا دايارلاۋ ءۇشىن! الەمدىك قاۋىمداستىق مويىندايتىن ءادىل ءارى شىن پرەزيدەنتىك سايلاۋ وتكىزۋ ءۇشىن!

سوڭعى ايلار بەلارۋس حالقىنىڭ جىلدام ۇيىمداسا الاتىن، ءوزى مەن ءوز جاقىندارى ءۇشىن اياعىنا دەيىن كۇرەسە الاتىن ەل ەكەنىن الەمگە دالەلدەدى. قۋانىشتىسى سول – بۇل ءبىزبىز. ءبىز بۇل قوعامدىق سانانىڭ ويانۋىن ۇزاق جىلدار كۇتتىك. بۇگىن بەلارۋس حالقى الەمگە سانيتارلىق ءھام قوعامدىق ءتارتىپتىڭ جارقىن ۇلگىسىن كورسەتتى. ءار جولى ءبىز الەمگە بەيبىت شەرۋدىڭ ۇلگىسىن كورسەتىپ كەلەمىز. بۇل ارقىلى ءبىز شىندىق كۇش پەن قارۋدىڭ جاعىندا ەمەس ەكەنىن دالەلدەدىك.

بۇل سيگنالدار مىندەتتى تۇردە ەستىلەدى. جانە الەم ەلدەرىنەن ءبىزدىڭ بۇل كۇردەلى كەزەڭنەن وتۋىمىزگە كومەكتەسەتىن ءوز جاقتاستارىمىزدى تابامىز. سونداي-اق، ءبىز تاعدىر تالكەگىمەن وزگە ەلدەرگە باس ساۋعالاپ كەتكەن بەلارۋستەردىڭ دە كۇش-جىگەرىن قايتارامىز! ولار دا ءبىز سەكىلدى ادامدار. ولار قازىردىڭ وزىندە ەلدەگى وزگەرىستىڭ تەزىرەك بولعانىن قالاپ، سول ءۇشىن جۇمىس جاساپ جاتىر.

ۇزاق جىلداردان بەرى ءبىز العاش رەت بىرىگە الاتىنىمىزدى، ءوز ەلىمىزدى جاقسى كورەتىنىمىزدى كورسەتتىك. ەندى ءبىز وسى قوعامدىق بىرلىكتى استە جوعالتپاۋىمىز كەرەك! ويتكەنى، وسى بىرلىك ەلدە وزگەرىس اكەلەدى. وسى ارقىلى بەلارۋستى جەمقورلىق جايلاعان ەلدەن، بەيبىت، ءومىر سۇرۋگە قاۋىپسىز ەلگە اينالدىرا الامىز.

مەن بەلارۋس تاۋەلسىزدىگىنىڭ ماڭىزدىلىعىن جاقسى تۇسىنەمىن. تاۋەلسىزدىكتەن ەشقانداي جاعدايدا ايىرىلىپ قالماۋىمىز كەرەك!

مەن كوپتەگەن سايلاۋ ۋچاسكەلىرىندە بيلىك تاراپىنان جاسالعان قىسىمعا قاراماستان، داۋىستاردىڭ ءادىل ەسەپتەلگەنىنە قاتتى قۋاندىم. قازىر وزگەرىس ۋاقىتى. جوعارىداعىداي قىسىمدار وتكەن شاقتىڭ تاريحىنا ەنۋى كەرەك.

مەن فورما كيگەن ازاماتتارعا ايتقىم كەلەدى. بەلارۋستەر كۇش كورسەتۋگە توزبەيدى. بەلارۋستەر مەيىرىمدى ءارى ءادىل حالىق. ەگەر سىزدەر جوعارىدان بەرىلگەن قىلمىستى تاپسىرمالاردى ورىنداۋدان باس تارتىپ، حالىق جاعىنا وتەتىن بولساڭىزدار، ءبىزدىڭ حالىق سىزدەردى كەشىرەدى، سىزدەردى قولدايدى جانە بولاشاقتا بۇل ارەكەتتەرىڭىزدى بەتتەرىڭىزگە باسپايتىن بولادى. مۇنى وزدەرىڭىزدى جاقسى ءتۇسىنىپ وتىرسىزدار. ءبىز ءبىر حالىقپىز.

ءبىزدىڭ قازىر ءبىر-بىرىمىزبەن قىرقىسقانىمىز كىمگە ءتيىمدى؟ كىم مۇنان پايدا كورىپ وتىر؟ ءبىز ءبىرمىز. ەگەر سىزدەردىڭ نيەتتەرىڭىز ءتۇزۋ بولسا، ءبىز سىزدەردى ارقايىم قابىلدايمىز.

بىزگە قازىر كۇش پەن ءتوزىم كەرەك. ءبىز ءوز قۇقىقتارىن بەيبىت جولمەن، سونىڭ ىشىندە بەيبىت ميتينگتەر ارقىلى قورعاپ جۇرگەن بارىق ازاماتتى قولدايمىز. ءبىز ءبىر-ءبىرىمىزدى قاۋىپكە قالدىرمايمىز. جانە بۇكىل الەم بىزگە ءسۇيسىنىپ، ۇمىتپەن قاراپ وتىر. ءبىزدىڭ كۇشىمىز – ءوز-وزىمىزگە جانە ءبىر-بىرىمىزگە دەگەن سەنىمدە! ءومىر سۇرۋگە قاۋىپسىز ەلدى تەك بىرگە جاساي الاتىنىمىزدى ۇمىتپاڭىزدار!

بىرنەشە كۇن بۇرىن تيحانوۆسكايا ليتۆاعا كەتكەن. ونىڭ جاقتاستارى ساياساتكەرگە قىسىم جاسالدى دەپ ويلايدى. نارازىلىق اكتسياسىنا شىقپاۋ تۋرالى ۇندەۋدى تيحانوۆسكايانىڭ قاعازدان وقىعانى تۇسىرىلگەن ۆيدەو جاريالانعان. ساياساتكەردىڭ جاقتاستارى بۇل ۇندەۋدى ماجبۇرلەپ، بوپسالاپ جازدىرىپ العان دەيدى. دەگەنمەن بۇل ۇندەۋدە تيحانوۆسكايا قارسىلاسى لۋكاشەنكونىڭ جەڭىسكە جەتكەنىن مويىنداماعان، سايلاۋدىڭ رەسمي ناتيجەسىنە تۇسىرگەن شاعىمىنان باس تارتپاعان.

وتكەن جۇمادا ول بەلارۋس قالالارىنىڭ باسشىلارىنان 15 جانە 16 تامىزدا بەيبىت نارازىلىق اكتسياسىن وتكىزۋگە جاعداي جاساۋىن سۇرادى.

ال دەمالىس كۇندەرى پرەزيدەنت الەكساندر لۋكاشەنكونىڭ قىزمەتتەن كەتۋىن، ءادىل سايلاۋدى، بيلىك كۇشىنىڭ بەلسەندىلەردى قۋدالاۋدى دوعارۋىن، ساياسي تۇتقىنداردىڭ بوساتىلۋىن تالاپ ەتكەن مىڭداعان تۇرعىن نارازىلىق اكتسياسىنا جينالدى. مينسك قالاسىنداعى اكتسياعا كەم دەگەندە 220 مىڭ ادام قاتىسقان. مۇنداي مالىمەتتى Tut.By اگەنتتىگى جاريالادى. اكتسيا برەست، موگيلەۆ، گرودنو، ۆيتەبسك، بوبرۋيسك جانە باسقا دا قالالاردا ءوتتى.

ايتپاقشى، دەمالىس كۇندەرى الەكساندر لۋكاشەنكونىڭ جاقتاستارى دا ميتينگ وتكىزگەن ەدى. الايدا، ول جيىنعا جيىلعانداردىڭ سانى تيحانوۆسكايا جاقتاستارىنان ەداۋىر از بولدى.

تيحانوۆسكايا - تانىمال بلوگەر سەرگەي تيحانوۆسكيدىڭ ايەلى. بيلىك ونىڭ كۇيەۋىن ۇمىتكەر رەتىندە تىركەۋدەن باس تارتقان سوڭ تيحانوۆسكايا سايلاۋعا ءوزى قاتىسقان. سەرگەي تيحانوۆسكي قازىر قاماۋدا وتىر.

رەسمي مالىمەت بويىنشا، 9 تامىزداعى سايلاۋدا لۋكاشەنكو شامامەن 80 پايىز داۋىس جيناعان. رەسمي مالىمەتپەن كەلىسپەگەن سايلاۋشىلار جاپپاي نارازىلىق اكتسياسىنا شىقتى، بيلىك ولاردى اياۋسىز باسۋمەن بولدى. جۇزدەگەن ادام جارالاندى، كەم دەگەندە ءبىر ادام قازا تاپتى.

ال قازاقستان بيلىگى الەكساندر لۋكاشەنكونى العاشقىلاردىڭ ءبىرى بولىپ، سايلاۋداعى «جەڭىسىمەن» قۇتتىقتاعان.

Abai.kz