ءبىزدىڭ پوستكەڭەستىك ەلدەر سوتسياليستىك لاگەردەن شىقتىق. سونىڭ سالدارىنان سول داۋىردە ءومىر سۇرگەن تولقىن مەن ولاردىڭ ۇرپاقتارى مىنا بىزدەر "تۇراقتىلىق - جاقسى ءومىردىڭ كىلتى" دەگەن پرينتسيپپەن وستىك، ءومىر سۇردىك. ياعني، بۇل تولقىن ءۇشىن "قاتەلەسۋ، قاتەلىك جاساۋ - جامان", "قاتەلىككە اپارۋى مۇمكىن - تاۋەكەل ەتۋ ارەكەتتەرى (ريسكوۆاننىە پوستۋپكي) ودان جامان" دەگەن ۇستانىم نەگىزگى قاعيدا بولدى.
⠀
وسىعان سايكەس، قاراپايىم قازاقستاندىققا سەگىز ساعاتتىق تۇراقتى جۇمىس جاساۋ، سول ارقىلى جانۇيا باعۋ - باقىتتى ءومىر ءسۇرۋدىڭ سيمۆولى رەتىندە ناسيحاتتالدى. ءسويتىپ، تۇتاس ەكى بۋىنعا وكىمەتتىڭ جالاقىسىنا جۇمىس جاسايتىن بيۋدجەت قىزمەتكەرلەرى كۋلتتەلدى. ەگەر جۇمىسشى تابى ۇلىقتالاتىن سوتسياليستىك مەملەكەت بولساق ءبىرسارى، نارىقتىق ەكونوميكاعا ءسوز جۇزىندە بولسا دا وتكەنىنە شيرەك عاسىر بولعان بىزگە نە جورىق؟ نەگە ءبىز كاپيتاليستىك ەلگە اينالماي وتىرمىز؟
⠀
مەن مۇنىڭ سەبەبىن ءبىلىم بەرۋ سالاسىندا بالالاردى تەك ۇزدىك بەسكە وقۋعا، ومىردە تەك الدى بولۋعا جانە قاتەلەسپەۋگە، قاتەلىكتەن قورقۋعا ۇيرەتۋدە جاتىر دەپ بىلەمىن. بىلاي قاراساڭ، پارادوكس جاعداي. مەكتەپتە ۇزدىك وقىعاننىڭ تەك ۇنەمى ءبىرىنشى بولۋعا ۇيرەتەتىن وزىمشىلدىككە اكەلەتىنىن، ونداعى نەگىزگى ءبىلىمنىڭ جالپىلاما اقپارات ءۇشىن ەكەندىگىن، ۋنيۆەرسيتەتتەردىڭ كوبىندەگى ءبىلىمنىڭ بوسقا ۋاقىت ءولتىرۋ ەكەندىگىن بىلە تۇرا، قىزىلمەن بىتىرتۋگە، جوعارى بالل الىپ گرانتقا وقۋعا تۇسىرتۋگە تىرىسامىز. سونداعى ماقسات - بالانى تەگىن وقىتۋ. ودان قالا بەردى ازىن-اۋلاق شاكىرتاقىسىنا بايلاپ، ماسىلدىق پسيحولوگياعا تاربيەلەۋ. سول 4 جىل ۋاقىتتى بالا دۇرىس پايدالانىپ، ستۋدەنت اتانىپ ءجۇرىپ ءومىر سۇرۋگە قاجەتتى قابىلەتتەردى يگەرسە نەمەسە اراسىندا ناعىز عىلىمدى تاڭداعاندارى اكادەميالىق عىلىم جولىنا تۇسسە جاقسى. نەگىزگى بولىگى ولاي ەمەس قوي؟!.
⠀
4 جىل وتكەن سوڭ، ماسىل بولۋ ەستافەتاسى "ماگيستراتۋرا" اتتى بولىكپەن ودان ءارى جالعاسادى. سونداعىسى - اي سايىن الىپ تۇراتىن 100$ ءۇشىن تالاس. سوندا، ءبىزدىڭ بالالار شىنايى ومىرگە الدى 21-22 ارتى 23-24 جاستارىندا بارىپ ارالاسا باستايدى. قر ازاماتى اتانعاننان كەيىن باقانداي 5-7 جىلدان كەيىن ومىرمەن بەتپە-بەت كەلەدى.
⠀
سوندا نە ىستەۋ كەرەك دەيسىز عوي.
بىرىنشىدەن، بالانىڭ ءبارىنىڭ قابىلەتى بىردەي ەمەس. ىشىندە وقۋعا ىنتاسى مەن تالابى بارلارىنان وزگەلەرىن ۇزدىك قىلامىن دەپ قيناماۋ كەرەك. سەبەبى، ونىڭ ءاربىرى ۋنيكۋم بولعاندىقتان، ءوزىنىڭ يكەمىنە قاراي بەيىمدەۋ كەرەك. ءتىپتى بەيىمدەلمەي جاتسا، ەسەيە كەلە وزىنە نە كەرەگىن تاڭداپ الادى ء(وزىڭىزدىڭ دە وسى جاسقا كەلگەنشە مىڭ قۇبىلعانىڭىزدى ۇمىتپاڭىز).
⠀
ەكىنشىدەن، ونىڭ كەمشىلىگىمەن ەمەس، ۇزدىك جاعىن كوبىرەك دامىتۋ كەرەك. ۇنەمى ۇزدىك بولۋعا بەيىمدەلگەن بالا - ومىردەن العاش تاياق جەگەن ساتتە سىنىپ كەتۋى مۇمكىن. سەبەبى ءبىز ونى مىنەزدى، قايسار، ەپتى، قابىلەتتى بولۋعا ەمەس، جاقسى وقۋعا، ءتارتىپتى بولۋعا، تۇراقتىلىق بولۋ ءۇشىن تاۋەكەلگە بارماۋعا ۇيرەتتىك. ال، مۇنداي ازاماتتان كەيىن كاسىپكەر نەمەسە بيزنەسمەن شىقپايدى.
⠀
سەبەبى - كاسىپكەرلىك تاۋەكەلدەن تۇرادى. ونىڭ ەكى قاناتى بار: مىنەز جانە قابىلەتتىلىك (ەپتىلىك). ەگەر ءبىز كاپيتاليست ۇلت بولامىز دەسەك، بالانىڭ بويىنا وسىلاردى ەگۋىمىز كەرەك. سوندا عانا "جۇرتتىڭ بالالارىنا" تامسانۋدى قوياتىن بولامىز.

نۇراددين سادىقوۆتىڭ جازباسى

Abai.kz