ساعى سىنىپ، باعى تايعان كسرو باياعىدا-اق قۇردىمعا كەتسە دە، وتكەنگە وتكەل سالعىسى بار، ۇستىنى ۋشىققاندار ارامىزدا ءورىپ ءجۇر ءالى. قازىپ ويلاساق، ولار انتەك «مىسقىل ءتۇرتىستى» قويىپ، تاۋەلسىزدىكتىڭ ىرگەسىن تۇرتپەكتەيتىن باسقا ءبىر ادەمى ءادىس تاۋىپتى.

ساۋالناما دەپ اتالادى. «سىر» ەتكىزىپ جۇرگىزەدى دە، «توپ» ەتكىزىپ تاستاي سالادى. «قوعامدىق ويدىڭ كورىنىسى وسى» دەيدى وعان قويماي...  «مەگاپوليستەن» وقىدىق. قالىڭ وقىرمانىنا  «ءدال قازىر سوۆەت داۋىرىندە ءومىر سۇرگىڭىز كەلە مە؟» (http://megapolis.kz/poll/id_61) دەگەن قىزىل كوبىك ساۋال تاستاپتى.

ساعى سىنىپ، باعى تايعان كسرو باياعىدا-اق قۇردىمعا كەتسە دە، وتكەنگە وتكەل سالعىسى بار، ۇستىنى ۋشىققاندار ارامىزدا ءورىپ ءجۇر ءالى. قازىپ ويلاساق، ولار انتەك «مىسقىل ءتۇرتىستى» قويىپ، تاۋەلسىزدىكتىڭ ىرگەسىن تۇرتپەكتەيتىن باسقا ءبىر ادەمى ءادىس تاۋىپتى.

ساۋالناما دەپ اتالادى. «سىر» ەتكىزىپ جۇرگىزەدى دە، «توپ» ەتكىزىپ تاستاي سالادى. «قوعامدىق ويدىڭ كورىنىسى وسى» دەيدى وعان قويماي...  «مەگاپوليستەن» وقىدىق. قالىڭ وقىرمانىنا  «ءدال قازىر سوۆەت داۋىرىندە ءومىر سۇرگىڭىز كەلە مە؟» (http://megapolis.kz/poll/id_61) دەگەن قىزىل كوبىك ساۋال تاستاپتى.

«ءجا، قارا ورمانداي سىڭسىپ تۇرعان جۇرتپىز عوي» (ا.سۇلەيمەنوۆ), ءبىر ساۋالناماعا بولا زار ساۋماسپىز دەستىك. «بۇلدىرگىسى» سوندا بىلدىراي-بۇلدىرەي ساۋالعا وي قوسقانداردىڭ 62 پايىزى (!) «ءيا» دەپ جاۋاپ بەرگەن ەكەن. وسى جەردە دە، تىيىلىپ، تومسارىپ وتىرا بەرەر ەدىك، تەك ءتىلىمىزدىڭ اۋزىمىزعا سىيماعانى بولماسا. زەرىن زەيىنىمىزدى سالىپ، ارىدان ويلاپ، بەرىدەن تارتساق، وتاندىق ءايىرتىلدى ءباسپاسوزدىڭ ءورىستىلدى دەپ اتالاتىن بەلدى بۇتاعى بەرى دەسەڭ، كەرى شاپتىرار ادەت تاۋىپ، ونىسىنا اينىماستاي بەكىنگەن ەكەن. ونسىزدا ءتۇرۋلى ىرگەدەن تاس اتىپ وتىرعان ورىستىڭ «وقىس تارپيتىن» ۇيىمدارى ازداي، ءوز ءىشىمىزدى ءىرىتىپ جاتقان «قيسىق ويلى، قىڭىر پىكىرلى» بۇلاردىڭ، ءبىزدىڭ بيلىك ءسوز ەتەتىن تاتۋلىق پەن بىرلىككە الىپ قوسار ۇلەسى قايسى اجىراتىپ بولمايسىڭ. ال وسى ساۋالنامانىڭ نەگىزىندە «مەگاپوليستىڭ» نە ايتپاعىنىڭ ايىرىمىندا، ەنىندە باعىپ، باجايلاپ وتىرمىز. «قىڭقىلى مەن قىڭسىلى» كوپ قازاقي ماسەلەلەردى اينالىپ وتۋگە تىرىساتىن، بىزگە سالسا ءتىپتى ىشقىرعا دا ىلمەيتىن بۇل باسىلىمنىڭ، مۇنىڭ عانا ەمەس وتاندىق ءورىستىلدى ءباسپاسوزدىڭ كوپشىلىگى كونەنى كوكسەۋشىلىككە كەلگەندە ءتىلى ءجۇرىپ كەتەدى. الدە وزدەرىندەي ەمەس، بوي تاسالار قىلتاسى، سۇيەنەر ارقاسى قايسى دەيتىن بولار ءبىز بەيباقتى... تاقىمداماعاسىن سويتەدى دە.

ءيا، ءسوزىمىزدىڭ باسىندا ءبىر ساۋالناماعا بولا زار ساۋماسپىز دەستىك. قاتەلەسىپپىز. قازاق ءۇشىن قاباق شىتىپ قينالاتىنداي-اق ساۋال ەكەن. سوڭعى وقيعالارعا قاراپ، مۇنداي ساۋالنامالاردىڭ ساڭىراۋقۇلاقتاي تەز قابىنىپ كەتەتىنىنە كۋا بولدىق. ەگەر، ەرتەڭ، وسى ساۋالنامانى ساۋىرلاعان «مەگاپوليس»  - «قازاقستاندىقتاردىڭ 62 پايىزى كەڭەس ۇكىمەتىنىڭ قۇرىلۋىن قوس قولداپ قولدايدى» دەپ جاتسا تاڭ قالماڭىز...

«اباي-اقپارات»