ۆيتسە-مينيستر باعدات مۋسين ەندى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى بولىپ تاعايىندالدى. بۇل تۋرالى پرەزيدەنت جارلىعى اقوردا سايتىندا جاريالاندى. 

«باعدات باتىربەكۇلى مۋسين قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى بولىپ تاعايىندالسىن»، - دەلىنگەن جارلىقتا.

باعدات مۋسين 1983 جىلى 3 ناۋرىزدا پاۆلودار وبلىسىندا دۇنيەگە كەلدى. سۇلەيمەن دەميرەل اتىنداعى ۋنيۆەرسيتەتتى جانە قازاق قۇقىقتانۋ جانە حالىقارالىق قاتىناستار ينستيتۋتىن بىتىرگەن.

2011 جانە 2012 جىلدار ارالىعىندا قر بام مەملەكەتتىك قىزمەتتەردى اۆتوماتتاندىرۋدى باقىلاۋ جانە حقو قىزمەتىن ۇيلەستىرۋ كوميتەتى توراعاسىنىڭ ورىنباسارى بولدى.

2012 جىلدان باستاپ قر كولىك جانە كوممۋنيكاتسيا مينيسترلىگىنىڭ مەملەكەتتىك قىزمەتتەردى اۆتوماتتاندىرۋدى باقىلاۋ جانە حقو قىزمەتىن ۇيلەستىرۋ كوميتەتى توراعاسىنىڭ لاۋازىمىن اتقاردى.

2014 جىلدىڭ ساۋىرىندە "ۇلتتىق اقپاراتتىق تەحنولوگيالار" اق باسقارما توراعاسى بولىپ تاعايىندالدى.

2020 جىلدىڭ ناۋرىزىندا پرەزيدەنتتىڭ تسيفرلاندىرۋ جانە يننوۆاتسيالىق تەحنولوگيالار جونىندەگى كەڭەسشىسى قىزمەتىنە تاعايىندالعان.

ال شىلدە ايىندا تسيفرلىق دامۋ، يننوۆاتسيا جانە اەروعارىش ءوندىرىسى ۆيتسە-ءمينيسترى بولعان.

Abai.kz