شىراقتارىم، شىنىمدى ايتسام ەلىمىزدىڭ مۇنايلى ءوڭىرىنىڭ ءبىرى ماڭعىستاۋدا، ونىڭ ىشىندە جاڭاوزەن مەن شەتپەدە نە بولىپ جاتقانىنان تولىق ماعلۇماتىم از. مەن عانا ەمەس، جالپى ەل ءىشى شىنايى اقپاراتقا قول جەتكىزە الماي وتىر. بيلىكتىڭ رەسمي مالىمدەمەسىنە سۇيەنسەك، جاڭاوزەندە جاپپاي ەرەۋىلگە شىققان جاستاردىڭ دەنى بەتىمەن كەتكەن، ءتارتىپسىز، قىلىمىس الەمىمەن بايلانىسى تەرەڭ باسبۇزارلار كورىنەدى. كوپ تولقۋىنىڭ اراسىندا ونداي ادامداردىڭ دا بولۋى ابدەن ىقتيمال. بىراق، الەۋمەتتى اۋىرەگە سۇيرەپ جۇرگەن جەتەكشى توپ سويىلسوعارلار مەن سودىرلار دەگەنگە ءوز باسىم اسا سەنە قويمايمىن. مەنىڭشە بولعاندا، وتكەن جاز مەزگىلىنەن باستاپ جالاقى جايىن قوزعاپ، باسشىلىق پەن قاراپايىم ەڭبەك ادامىنىڭ اراسىنداعى تەڭسىزدىكتى جويۋدى تالاپ ەتكەن مۇنايشى جاستاردىڭ ىشكى نارازىلىعى دا جاڭاوزەندەگى الاڭعا قايناپ شىققانى انىق.

شىراقتارىم، شىنىمدى ايتسام ەلىمىزدىڭ مۇنايلى ءوڭىرىنىڭ ءبىرى ماڭعىستاۋدا، ونىڭ ىشىندە جاڭاوزەن مەن شەتپەدە نە بولىپ جاتقانىنان تولىق ماعلۇماتىم از. مەن عانا ەمەس، جالپى ەل ءىشى شىنايى اقپاراتقا قول جەتكىزە الماي وتىر. بيلىكتىڭ رەسمي مالىمدەمەسىنە سۇيەنسەك، جاڭاوزەندە جاپپاي ەرەۋىلگە شىققان جاستاردىڭ دەنى بەتىمەن كەتكەن، ءتارتىپسىز، قىلىمىس الەمىمەن بايلانىسى تەرەڭ باسبۇزارلار كورىنەدى. كوپ تولقۋىنىڭ اراسىندا ونداي ادامداردىڭ دا بولۋى ابدەن ىقتيمال. بىراق، الەۋمەتتى اۋىرەگە سۇيرەپ جۇرگەن جەتەكشى توپ سويىلسوعارلار مەن سودىرلار دەگەنگە ءوز باسىم اسا سەنە قويمايمىن. مەنىڭشە بولعاندا، وتكەن جاز مەزگىلىنەن باستاپ جالاقى جايىن قوزعاپ، باسشىلىق پەن قاراپايىم ەڭبەك ادامىنىڭ اراسىنداعى تەڭسىزدىكتى جويۋدى تالاپ ەتكەن مۇنايشى جاستاردىڭ ىشكى نارازىلىعى دا جاڭاوزەندەگى الاڭعا قايناپ شىققانى انىق.

ءجا، باۋىرلارىم، بولار ءىس بولدى. كوپتىگىڭدى، ءتوزىمنىڭ شەگىنەن كەتكەندە ەرەۋىلدەمەي توقتاماس ەل ەكەنىڭدى تانىتتىڭ. ەندى ساباڭا ءتۇس، اشۋىڭدى اقىلىڭا جەڭدىر. بۇل مەملەكەت سەنىكى. تۇتاستىعىڭا سەلەكەۋ تۇسىرمەۋدىڭ قامىن ويلا. تەرىستىك پەن باتىستاعى اقپارات كوزدەرى «ءۇريىت سوقتىڭ» كەبىن كەلتىرىپ وسى كۇنى قازاقتى قاناۋشى الپاۋىت كۇشتەرگە ەمەس، قازاققا قارسى ايداپ سالۋدىڭ سۇرقيا تاسىلدەرىن پايدالانۋدا. ولار : «قازاقستاننىڭ باتىس ايماعىندا بۇلىكشىل اداي دەگەن تايپا تۇرادى، جاڭاوزەندەگى جارىلىستى جاساعان سول ادايلار» دەپ ايقايلاۋدا. اداي اتامىزدىڭ ۇرپاعى راس، باتىر ەل، الايدا «اق كوز اداي» اتانا بەرمەي، ءىستىڭ ارتىن ويلاعان لازىم.

ۇل ءوسىرىپ، قىز تاربيەلەگەن انا رەتىندە ايتارىم: قابىرعام قايىسادى، جۇرەگىم اۋىرادى. ءبىزدىڭ ەلدى وسىنداي حالگە جەتكىزگەن سۇرقيا سۇمدار نەگە دەر كەزىندە جازالانبايدى دەپ قىنجىلامىن. ەرەۋىلدەگەن ەل ەمەس، الدىمەن وسى وقيعانى قولدان جاساعان قۋلار قۇرىقتالۋى كەرەك. قاتاڭ جازانىڭ قامىتىن سولاردىڭ موينىنا اجىرىق قىلىپ ارتۋ كەرەكتىگىن قاداپ ايتامىن. ەلدىڭ ەكپىنىن پايدالانىپ، وتقا ماي تامىزعان سودىر سويقاندار دا ءادىل زاڭنىڭ تورەلىگىنەن تىس قالماۋى قاجەت. بۇنى دا قاداپ ايتامىن.

مۇنارالى ماڭعىستاۋداعى كوپ كوڭىلىن الاڭداتقان دۇربەلەڭ تەز رەتتەلىپ، بەيبىت ەل بەيبىت تىرلىگىنە كوشۋى ءتيىس. تىنىشتىقتىڭ، سابىردىڭ، بايىپتى ءام بايسالدى ءومىردىڭ قۋانىشى مەن قىزىعى عانا باياندى بولادى. ويلساق وسىنى ويلايىق. بيلىك ەندى جالتارماي، جالتاقتاماي حالىقتىڭ تىلەگىنە جىعىلىپ، ءتىلىن السىن. وتىرىك ستاتيستيكانى ساپرىعاندى قويىپ، سىلدىر سوزدەن ارىلىپ ناقتى ىسكە ەرەكشە ەرىك جىگەرمەن ۇمتىلسىن. سوندا عانا دۇنيە اعىسى ارناسىن تاۋىپ، تويىمىز تويعا ۇلاسادى. مەنىڭ ايتپاعىم - وسى، اينالايىندار. زيالى قاۋىم، ۇلتشىل ازاماتتار «اباي.كز» پورتالىنىڭ بەتىنەن ءسوز الىڭدار، ەلگە باسۋ ايتىڭدار، بىلگەن تۇيگەندەرىڭدى ورتاعا سالىڭدار. ءۇنسىز قالماڭدار!

«اباي-اقپارات»