قازاقستان ۇكىمەتى بىرقاتار مەملەكەتتەرمەن اۋە رەيستەرىن قايتا اشاتىنىن حابارلادى. مۇنداي شەشىم ۆەدومستۆوارالىق كوميسسيانىڭ وتىرىسىندا قابىلدانعان. بۇل تۋرالى قازاقستاننىڭ ازاماتتى قاۆياتسيا كوميتەتى مالىمدەدى.

قازاقستان ۇكىمەتىنىڭ ۆەدومستۆوارالىق كوميسسياسىنىڭ شەشىمىنە سايكەس، 17 تامىزدان باستاپ قازاقستان مەن بىرىككەن اراب امىرلىكتەرى، رەسەي، ۋكراينا، مىسىر، نيدەرلاندى، گەرمانيا جانە  بەلارۋس ەلدەرىمەن اۋە رەيستەرى قايتا اشىلادى.

قر دەنساۋلىق ساقتاۋ مينيسترلىگى مەن جوعارىدا اتالعان مەملەكەتتەردىڭ قۇزىرلى ورگاندارى اراسىندا ەكىجاقتى كەلىسسوزدەر جۇرگىزىلگەن. ول بويىنشا، ەكىجاقتى جولاۋشىلارعا ارنالعان تۇراقتى اۋە رەيستەرىن قايتا جانداندىرۋ تۋرالى كەلىسىمدەرگە قول قويىلعان.

«جوعارىدا اتالعان مەملەكەتتەر قازاقستان مەن ەكىارادا اۋە رەيستەرىن قايتا اشۋدى قولداپ وتىر. تالاپ بىرەۋ. سانيتارلىق-ەپيدەميولوگيالىق ءتارتىپتى قاتاڭ ساقتاۋ! ول دەگەنىڭىز – ىستىق ولشەۋ، الەۋمەتتىك قاشىقتىقتى قساقتاۋ، بەتپەردە رەجيمىن ساقتاۋ، پتسر تەستىلەۋ جانە باسقا دا كارانتيندىك ەرەجەلەردى مۇقيات ۇستانۋ.

وسىلاردىڭ ىشىندە جالعىز رەسەيمەن ارادا وزگەشەلىك بار. رەسەيگە ۇشۋ ءۇشىن رەسەي جاعىنان رۇقسات الۋ كەرەك»، - دەيدى قازاقستاننىڭ ازاماتتىق اۆياتسيا كوميتەتى.

حالىقارالىق مارشۋرتتار بويىنشا اۋە رەيستەرىنىڭ سانى قولدانىستاعى ۇكىمەتارالىق كەلىسىمدەر بويىنشا جۇزەگە اسىرىلادى. ياعني، اۋە حابارلامالارى تۋرال كەلىسىم نەگىزىندە ءاربىر مارشۋرتتاعى كوممەرتسيالىق جۇكتەمەلەرگە بايلانىستى بولادى.

تۇركيا

قازاقستان مەن تۇركيا اراسىنداعى اۋە بايلانىسى دا قايتا اشىلاتىن بولدى. قازاقستاندىقتار 1 قىركۇيەكتەن باستاپ تۇركياعا ۇشا الادى. بۇل تۋرالى تۇركيانىڭ ترانسپورت جانە ينفراقۇرىلىم ءمينيسترى ءادىل قارايسماوعلى مالىمدەدى.

«قازاقستان مەن ەكىارادا اۋە رەيستەرى 20 ماۋسىم كۇنى اشىلعان. كەيىن 4 شىلدەدە كوروناۆيرۋس ىندەتىنىڭ ورشۋىنە بايلانىستى قايتا توقاتىلعان. قازىر ىندەتتىڭ بەتى قيتتى. اۋە رەيستەرى 1 قىركۇيەكتەن باستاپ قايتا اشىلادى»، - دەگەن مينيستر.

وڭتۇستىك كورەيا

2020 جىلدىڭ 9 شىلدەسىنەن بەرى الماتى-سەۋل باعىتىنداعى اۋە رەيستەرىنە پتسر تەستىلەۋدىڭ انىقتاماسى بار جولاۋشىلارعا عانا رۇقسات بەرىلگەن. وندا دا ول انىقتامانىڭ جارامدىلىق مەرزىمى 48 ساعات بولۋى كەرەك. بۇل تالاپ كورەي ازاماتتارىنان باسقالاردىڭ بارلىعىنا قويىلعان.

از ۋاقىتقا بارعان ساياحاتشىلار نەمەسە باسقا دا ازاماتتار كورەياعا بارا سالىسىمەن ستاتسيوناردا جاتۋى ءتيىس. كارانتيندە جاتۋ شىعىنى كۇنىنە 150 مىڭ كورەي ۆونى نەمەسە 52,8 مىڭ تەڭگەنى قۇرايدى. تولىق كارانتين شىعىنى 2,1 ميلليون ۆون نەمەسە 739,8 مىڭ تەڭگە. بۇل سوما كارانتوين مەكەمەسىنە كەلگەنگە دەيىن تولەنۋى ءتيىس.

وزبەكستان

وزبەكستانعا باراتىن جولاۋشىلار ءۇشىن دە پتسر انىقتامالارى بولۋى شارت. انىقتامالار اعىلشىن نەمەسە ورىس تىلدەرىندە بولۋى تالاپ ەتىلەدى. انىقتاما ۇشقانعا دەيىن 72 ساعات ىشىندە جاسالۋى كەرەك. ال وزبەكستانعا كەلگەننەن كەيىن ءوز قاراجاتىڭا ۇيدە نەمەسە قوناق ۇيدە 14 كۇن كارانتيندە جاتۋ مىندەتتى.

قىتاي، تايلاند، گۇرجىستان مەن جاپونيا

بۇل باعىتتار بويىنشا اۋە رەيستەرى ۋاقىتشا توقتاتىلعان. مۇنداي شەشىمدى قازاقستان تارابى قابىلداعان.

قازاقستانعا كەلگەندە

قازاقستانعا شەتەلدەردەن كەلەتىن جولاۋشىلار اۋەلى قر ۇكىمەتىنىڭ سانيتارلىق-كارانتيندىك ەرەجەلەرىمەن تانىسىپ شىعۋى كەرەك. كارانتيندىك شەكتەۋلەر كەزىندە قازاقستان تەريتورياسىنا كەلەتىن شەتەلدىك  قازاقستان ۇكىمەتى توتەلەي اۋە رەيستەرىن قايتا اشقان مەملەكەتتىڭ ازاماتى بولۋ شارت.

ايتا كەتەيىك، 28 تامىز كۇنى قر تۋريزم يندۋسترياسى كوميتەتىنىڭ توراعاسى داستان ادايۇلى ەلدەگى تۋريزم شىعىندارى تۋرالى ەسەپ بەرىپ، ءباسپاسوز ءماسليحاتىن وتكىزگەن ەدى.

وندا قازاقستانداعى تۋريزم سالاسىنىڭ كارانتيندىك شەكتەۋلەر سالدارىنان تۇرالاپ قالعانى ايتىلعان. الايدا پاندەميا كەزىندە كوپتەگە تۋريستىك فيرمالاردىڭ جۇمىسىنا توقتاۋ سالىنعانىمەن، شەتەلدەرگە تۋر ساتىپ الۋ توقتاماعان.

«ەلدە ەنگىزىلگەن كارانتيندىك شەكتەۋلەرگە قاراماستان، شەتەلدە دەمالعىسى كەلەتىن تۋريستەر ساناى ازايعان جوق. قايتا كۇزگى جانە قىسقا ماۋسىمدارعا سۇرانىس كوبەيدى. ءبىز كوپ ۇزاماي جاعدايدىڭ تۇراقتالاتىنىنا سەنەمىز»، - دەگەن ەدى.

Abai.kz