قازاقستاننىڭ اۋعانستانداعى ەلشىسى ءالىمحان ەسەنگەلديەۆ سۋ تاسقىنىنان زارداپ شەككەن قابىل پروۆينتسياسىنىڭ تۇرعىندارىنا قازاقستاندىق گۋمانيتارلىق كومەكتى تاپسىرۋ راسىمىنە قاتىستى. بۇل تۋرالى قر سىرتقى ىستەر مينسترلىگى مالىمدەدى. 

ۇن، ماكارون ونىمدەرى، كۇنباعىس مايى جانە قويۋلاتىلعان سۇتتەن تۇراتىن ازىق-تۇلىك 5 مىڭنان استام مۇقتاج وتباسىنا بەرىلەتىن بولادى.

ءىس-شاراعا قاتىسقان قابىل پروۆينتسياسىنىڭ گۋبەرناتورى موحامماد ياكۋب حايداري جانە اير توتەنشە جاعدايلار جونىندەگى اگەنتتىگىنىڭ توراعاسى گۋلام باحاۋددين جيلاني اۋعانستان ۇكىمەتى مەن حالقىنىڭ اتىنان قيىن كەزەڭدە كورسەتىلگەن كومەك پەن قولداۋ ءۇشىن ريزاشىلىقتارىن ءبىلدىردى.

ەلشى ءوز كەزەگىندە قازاقستاننىڭ اۋعانستانعا دوستاس قارىم-قاتىناسىن اتاپ ءوتتى.  سونىمەن قاتار، ەلىمىز وسى كۇردەلى جاعدايدا ءوڭىر ەلدەرىنە، سونىڭ ىشىندە اۋعانستانعا جان-جاقتى قولداۋ كورسەتىپ وتىرعانىن اتاپ ءوتتى.

قازاقستاندىق گۋمانيتارلىق كومەك اۋعانستاننىڭ زارداپ شەككەندەر اراسىندا 8 پروۆينتسيادا تاراتىلعانىن اتاپ وتكەن ءجون. اتالمىش ازىق-تۇلىك قابىلدان باسقا بالح، پارۆان، پاندجشەر، لوگار، ۆارداك، باعلان جانە سامانگان پروۆينتسيالارىندا تاراتىلدى.

Abai.kz