«بۇل قىلمىستىڭ ارتىندا پۋتين تۇر دەپ سانايمىن، وقيعانى باسقاشا تۇسىندىرە المايمىن»، دەدى ناۆالنىي جۋرنال تىلشىسىنە. وپپوزيتسيونەر رەسەيگە ورالۋدى جوسپارلاپ وتىرعانىن، قوقان-لوقىلاردان «قورىقپايتىنىن» ايتقان. سۇحباتتىڭ تولىق نۇسقاسى جاقىن ارادا جاريالانادى.

20 تامىزدا تومسكىدەن ماسكەۋگە ۇشىپ بارا جاتقان جولدا ۇشاقتا ساياساتكەردىڭ جاعدايى كۇرت ناشارلاپ، ۇشاق ومبىعا قونعان بولاتىن. باستاپقىدا ناۆالنىي ومبى اۋرۋحاناسىنا جاتقىزىلدى. ەكى كۇننەن سوڭ تۋىستارى مەن جاقتاستارىنىڭ تالابىمەن بەرلين كلينيكاسىنا اۋىستىرىلدى.

2 قىركۇيەكتە گەرمانيا ۇكىمىنىڭ رەسمي وكىلى شتەففەن زايبەرت زەرتحانا ماماندارىنىڭ قورىتىندىسىنا سۇيەنە وتىرىپ، ناۆالنىيدىڭ اعزاسىنان «نوۆيچوك» توبىنا جاتاتىن ۋ قالدىقتارى تابىلدى دەپ مالىمدەگەن. گەرمانيا كانتسلەرى انگەلا مەركەل رەسەيدەن وقيعانى ءتۇسىندىرۋدى تالاپ ەتتى. فرانتسيا مەن شۆەتسيانىڭ تاۋەلسىز زەرتحانالارى دا بۋندەسۆەر زەرتحاناسىنىڭ قورىتىندىسىن راستاپ، ناۆالنىيدىڭ «نوۆيچوك» توبىنا جاتاتىن ۋدان ۋلانعانىن ايتتى. ال ومبى اۋرۋحاناسى ماماندارىنىڭ سوزىنە سۇيەنگەن رەسەي بيلىگى ساياساتكەردىڭ اعزاسىنان ۋ تابىلماعانىن، قىلمىستىق ءىس قوزعاۋعا نەگىز جوق ەكەنىن ايتقان.

وتكەن اپتا باسىندا بەرليندەگى «شاريتە» كلينيكاسى ساياساتكەردى اۋرۋحانادان شىعارعان. ول قازىر گەرمانيادا ايىقتىرۋ كۋرسىنان ءوتىپ جاتىر. ناۆالنىي كلينيكادا 32 كۇن جاتقان، 24 كۇن رەانيماتسيا بولىمىندە بولعان.

Abai.kz