ءماجىلىس توراعاسى نۇرلان نىعماتۋلين 2021-2023 جىلدارعا ارنالعان رەسپۋبليكالىق بيۋدجەتتىڭ جوباسىن ماقۇلداۋ بارىسىندا بيۋدجەتتە ەڭ الدىمەن، پاندەميا كەزىندە ازاماتتاردى قولداۋ  جاعدايى ەسكەرىلگەنىن اتاپ ءوتتى.

ەلىمىزدىڭ باس قارجى قۇجاتى بويىنشا دەپۋتاتتار الدىندا ۇلتتىق ەكونوميكا ءمينيسترى رۋسلان دالەنوۆ، قارجى ءمينيسترى ەرۇلان جاماۋباەۆ جانە ۇلتتىق بانكىنىڭ توراعاسى ەربولات دوساەۆ بايانداما جاسادى.

زاڭ جوبالارىن تالقىلاۋ بارىسىندا دەپۋتاتتار جاۋاپتى مەملەكەتتىك ورگانداردىڭ باسشىلارىنا بىرقاتار سۇراقتار قويىپ، ءوز پىكىرلەرىمەن ءبولىستى.

وسى رەتتە، ءماجىلىس توراعاسى نۇرلان نىعماتۋلين پاندەميا كەزىندە شاعىن جانە ورتا بيزنەستى قولداۋ قازىرگى ەڭ ماڭىزدى جانە ەڭ قاجەتتى سۇراقتاردىڭ ءبىرى ەكەنىن ايتتى.

- وسى جولدا ەلباسىنىڭ دا، مەملەكەت باسشىسىنىڭ تاپسىرماسى دا بار. ءتيىستى قاراجات بيۋدجەتتە قارالىپ وتىر. ەندى، ەڭ باستىسى، وسى بارلىق قاراجات - قول جەتىمدى بولۋ كەرەك. ول ارينە، ۇكىمەتتىڭ، ۇلتتىق بانكتىڭ مىندەتى، - دەدى. سونىمەن بىرگە پالاتا سپيكەرى جەلىڭدەتىلگەن نەسيەنى جۇزەگە اسىراتىن مەحانيزم دە اشىق جانە تۇسىنىكتى بولۋ كەرەكتىگىن، سوندا عانا ازاماتتارىمىز، شاعىن جانە ورتا بيزنەستە، وسى قيىن كەزەڭدە جۇمىس ىستەي الاتىنىن ايتتى.

ءۇش جىلدىق بيۋدجەت جوباسىن تالقىلاۋ بارىسىندا دەپۋتات ءا.بەكتۇرعانوۆ پەداگوگتاردىڭ جالاقىسىن 25%-عا ارتتىرۋ كەزىندە سپورتتىق جاتتىقتىرۋشى ماماندار اراسىندا ولقىلىقتىڭ ورىن العانىن ايتتى. مىسالى، رەسپۋبليكالىق دەڭگەيدەگى سپورت-مۇعالىمدەرىنە قوسىمشا قاراجات قارالىپ، ال اكىمدىكتەر جانىنداعى سپورتتىق ۇيىمداردىڭ پەداگوگتەرى بۇل قولداۋدان تىس قالعان. جاقىندا عانا بيۋدجەتتى ناقتىلاۋ كەزىندە وسى ولقىلىقتىڭ ورنىن تولتىرۋ ءۇشىن 5 ملرد. تەڭگە قارجى قارالدى.

وسى رەتتە ءماجىلىس توراعاسى الداعى ۋاقىتتا مۇنداي جاعدايعا جول بەرۋگە بولمايتىندىعىن باسا اتاپ ءوتتى.

سونىمەن قاتار بيۋدجەتتىك زاڭ جوبانى تالقىلاۋ بارىسىندا مەملەكەتتىڭ تۇراقتى دامۋىنا ەكونوميكالىق جانە الەۋمەتتىك احۋالعا قاتىستى سۇراقتار جان-جاقتى قارالدى. ناتيجەسىندە 2021-2023 جىلدارعا ارنالعان رەسپۋبليكالىق بيۋدجەتتى ماقۇلداۋ جونىندەگى قاۋلى قابىلداندى. وسىعان وراي ءماجىلىس توراعاسى:

-بۇگىنگى ماقۇلدانعان بيۋدجەت جوباسىنىڭ  ورنى دا ەرەكشە،  ماڭىزى دا    وتە زور. بۇكىل الەمگە تاراعان كورونوۆيرۋس ىندەتى ءبىزدىڭ   ەلىمىزدە دە  ورىن الىپ وتىر. سوندىقتان، الداعى ءۇش جىلدىق بيۋدجەتتە ەڭ بىرىنشىدەن، پاندەميا كەزىندە ازاماتتاردى   قولداۋ   جاعدايى    ەسكەرىلدى.  سونىمەن بىرگە، جىلداعى ءداستۇر بويىنشا ەكونوميكانى دامىتۋ، الەۋمەتتىك مىندەتتەر، دەنساۋلىق،  ءبىلىم، ەڭبەك سالالارىنا ەرەكشە نازار اۋدارىلدى. سەبەبى، رەسپۋبليكالىق بيۋدجەتتى قالىپتاستىرۋ – بۇل ەلباسى جانە مەملەكەت باسشىسى جۇكتەگەن بارلىق مىندەتتەردى ساپالى ورىنداۋدىڭ كەپىلى. ەندى ۇكىمەتتىڭ دە، بارلىق مەملەكەتتىك ورگانداردىڭ دا نەگىزگى جۇمىسى ول وسى بولىنگەن قاراجاتتاردى جوسپار بويىنشا ءوز ۋاقىتىندا، اشىق، ساپالى جانە ناتيجەلى پايدالانۋ. ال ونى باقىلاۋ ارقاشاندا دەپۋتاتتىق كورپۋستىڭ نازارىندا بولادى، - دەدى نۇرلان نىعماتۋلين.

Abai.kz