جۇما, 29 ناۋرىز 2024
ساڭلاق 4508 1 پىكىر 3 قاراشا, 2020 ساعات 18:03

«قايرات» قازاقستان چەمپيوناتىندا توپ جاردى

جاس قورعاۋشى نۇرالى ءالىپ

فۋتبولدان قازاقستان چەمپيوناتىنىڭ 17-تۋرىندا «قايرات» شىمكەنتتىك «ورداباسىنى» 3:1 ەسەبىمەن جەڭدى. وسىلايشا الماتىلىق كلۋب اراعا 16 جىل سالىپ قازاقستان چەمپيوناتىندا توپ جاردى. 

«قايرات» بيىل 17 ويىندا 44 ۇپاي جيناپ، باستى باسەكەلەسى «استانادان» 17 ۇپاي ۇزاپ كەتتى. ەلوردالىقتار سوڭعى بەس ويىندى جەڭسە دە، «قايراتقا» جەتە المايتىنى ءسوزسىز ەدى. وسىلايشا، الماتىلىقتار مەرزىمىنەن بۇرىن ەل چەمپيونى اتاندى.

قازاقستاننىڭ «حالىق كومانداسى» اتانعان «قايرات» وسىنىڭ الدىندا 2004 جىلى چەمپيون بولعان. سودان بەرى 16 جىل بويى چەمپيوندىق اتاق الماتىلىق كومانداعا بۇيىرماي كەلدى. اسىرەسە 2013 جىلدان بەرى چەمپيوندىققا ابدەن لايىق ونەر كورسەتتى. سوڭعى 8 جىلدا 5 رەت كۇمىس، 2 رەت قولا جۇلدەگەر اتاندى.

كسرو كەزىندە كورشىلەس رەسپۋبليكا كوماندالارىمەن تەرەزەسى تەڭ ونەر كورسەتىپ، ەل ەڭسەسىن كوتەرگەن «قايراتتىڭ» قازاق سۇيىسپەنشىلىگىنە بولەنگەنى شىندىق بولاتىن. سودان دا بولار قازاق فۋتبولىندا «قايراتتىڭ» الار ورنى ەرەكشە. 29 جىلدا ەل چەمپيوناتىندا ءۇش-اق رەت توپ جارسا دا، ءتىپتى ءبىر جىلدارى ويىنىنان ءسان كەتىپ، تومەنگى ليگاعا ءتۇسىپ قالسا دا، جانكۇيەرسىز قالعان ەمەس. قازاقستانداعى جانكۇيەرى ەڭ كوپ كوماندالاردىڭ ءبىرى. ءتىپتى ەۋرودودالاردا جەتىستىككە جەتكەن «استانانىڭ» وزىندە مۇنداي جانكۇيەر جوق.

ورتالىق ستاديونعا اعىلعان الماتىلىقتاردىڭ اراسىندا سوناۋ جىلداردا تيمۋر سەگىزباەۆتىڭ سيقىرلى ونەرىنە تامسانىپ، قۇرالبەك ورداباەۆتىڭ قاقپا الدىنداعى قيمىلىنا ءتانتى بولعان، بۇگىندە الپىستى القىمداعان اعا جانكۇيەرلەر دە، الادوپقا ەندى عانا اۋەستەنە باستاعان بالا جانكۇيەرلەر دە بار.

شىنىن ايتقاندا، قازاقستاندا ناعىز ەۋروپالىق فۋتبول كورسەتىپ جۇرگەن وسى «قايرات» قانا! ەلدەگى جەكە قوجايىنى بار جالعىز كلۋب, 100% بيۋدجەتتىڭ ءبۇيىرىن سورىپ وتىرعان جوق. كلۋبتىڭ رەسمي دۇكەنى جۇمىس ىستەيدى. ماركەتينگ جۇيەسى دە ءتاۋىر. بيلەت ساتۋدان دا قارجى تابا الادى. زاماناۋي اكادەمياسى تاعى بار.

ەڭ ماڭىزدىسى، قازاق فۋتبولشىلارىنا، قازاقستاندىق فۋتبولشىلارعا كوپ سەنىم ارتادى. قازىرگى تاڭدا قازاق فۋتبولىنىڭ قايماعى «قايراتتا» دەۋگە نەگىز بار. ۇلتتىق قۇرامانىڭ كوپ ويىنشىسى «قايراتتا» ونەر كورسەتەدى. كوبى ورىمدەي جاستار. باۋىرجان يسلامحان، يسلامبەك قۋات، رامازان ورازوۆ، يان ۆوروگوۆسكي سىندى بىرقاتار فۋتولشىلار «قايراتتا» كوزگە ءتۇسىپ، شەتەل چەمپيوناتتارىنا اۋىستى. قازىردىڭ وزىندە كوماندادا نۇرالى ءالىپ، ايبول ابىكەن، ابات ايىمبەتوۆ، ەركەبۇلان تۇڭعىشباەۆ سەكىلدى ءوز ويىنشىلارىمىز ونەر كورسەتەدى. سالىستىرۋ ءۇشىن «استانادا» كوبىنە شەتەلدىك شەبەرلەر دوپ تەبەتىنىن، بيىل ءتىپتى الاڭعا كوبىنە جالعىز عانا قازاقستاندىق ويىنشى شىعارىپ جۇرگەنىن ايتۋعا بولادى.

2020 جىلى قازاقستان چەمپيونى اتانعان «قايرات» ەلوردالىق «استانانىڭ» 6 جىلعا جالعاسقان جەڭىستى سەرياسىن بۇزدى. «استانا» 2014 جىلدان بەرى چەمپيوندىقتى ەشكىمگە بەرمەي جۇرگەن. الايدا ەلوردالىقتاردىڭ ۇزدىكسىز جەڭىسكە جەتۋىنە فۋتبولدان تىس جاعدايلاردىڭ اسەر ەتكەن كەزدەرى دە بولعان سەكىلدى. ءتىپتى ءبىر جىلدارى جانكۇيەرلەراراسىندا «ساياسات چەمپيون بولدى» دەگەن اڭگىمەلەر دە بولعان.

قپل. 17-تۋر

«قايرات» – «ورداباسى» - 3:1 (2:0)

گول سوققاندار:ۆاگنەر لاۆ 36, نۇرالى ءالىپ 39 (پەنالتي) – جواو پاۋلو 77

«قايرات»: پوكاتيلوۆ، ميكانوۆيچ، دۋگاليچ، ءالىپ، سۇيىمباەۆ (ك), گۋرالسكي، كوسوۆيچ، وگانەسيان، ابىكەن، ايمبەتوۆ، ۆاگنەر لاۆ.

«ورداباسى»: شايزادا، كلەششەنكو، فونتانەللو (ك), سيمچەۆيچ، حادجيەۆ، دوسماعامبەتوۆ، دياكاتە، ماحلانگۋ، استانوۆ، باديبانگا، جواو پاۋلو.

قۋانىش قاپپاس

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2272
عيبىرات

قايسار رۋحتى عازيز جان

مۇحتار قۇل-مۇحاممەد 3590