سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى.

وتىرىس بارىسىندا سەناتورلار «قازاقستان رەسپۋبليكاسىنىڭ مەملەكەتتىك شەكاراسىن كۇزەتۋ جانە ۇلتتىق قاۋىپسىزدىك ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭدى قابىلدادى.

ماۋلەن اشىمباەۆتىڭ ايتۋىنشا، مەملەكەتتىك شەكارا – ۇلتتىق قاۋىپسىزدىگىمىز بەن ەلدىگىمىزدىڭ كەپىلى. بۇل زاڭ ۇلتتىق قاۋىپسىزدىك ورگاندارىنىڭ باسقارۋ قىزمەتىن وڭتايلاندىرۋعا مۇمكىندىك بەرەدى. سونداي-اق، ينفراقۇرىلىمدى دامىتۋ جانە ارنايى تەحنيكالاردى قولدانۋ ارقىلى مەملەكەتتىك شەكارانى كۇزەتۋ مەن قورعاۋ جۇيەسىن جەتىلدىرۋگە جول اشادى.

«زاڭدا ماڭىزدى نورمالار قاراستىرىلدى. ولار پرەزيدەنتىمىزدىڭ مەملەكەتتىك شەكارانىڭ مىزعىماستىعىن قامتاماسىز ەتۋ جونىندەگى تاپسىرمالارىن ىسكە اسىرۋعا ارنالعان. قازىرگى تاڭدا الەمدە ءتۇرلى سىن-قاتەرلەردىڭ تۋىنداپ جاتقانىن كورىپ وتىرمىز. سوندىقتان شەكارانى ۋاقىت تالابىنا ساي كۇزەتۋدىڭ جانە قورعاۋدىڭ مىقتى جۇيەسىن قالىپتاستىرۋدىڭ ماڭىزى زور. وسى ورايدا بۇگىن قابىلدانعان زاڭ ۇلتتىق قاۋىپسىزدىك ورگاندارى مەن شەكارا قىزمەتىنىڭ تيىمدىلىگىن ارتتىرۋعا، شەكارامىزدىڭ بەرىكتىگىن قامتاماسىز ەتۋگە قىزمەت ەتەدى دەپ سەنەمىز», – دەدى سەنات توراعاسى.

سونىمەن قاتار سەناتورلار «كەمە قاتىناسى تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى. سەنات توراعاسى بۇل قۇجاتتىڭ ەۋرازيالىق ەكونوميكالىق وداققا مۇشە مەملەكەتتەردىڭ بايلانىسىن نىعايتۋعا، كولىكتىك ينفراقۇرىلىمدى دامىتۋعا جانە تاۋار اينالىمىن ارتتىرۋعا سەپتىگىن تيگىزەتىنىن اتاپ ءوتتى.

«قازاقستاندىق فلوتتىڭ اشىق تەڭىزدەرگە شىعۋى ءۇشىن وسى كەلىسىم مەن زاڭنىڭ ستراتەگيالىق ماڭىزى بار. بۇل قۇجات الداعى ۋاقىتتا رەسەيدىڭ ىشكى سۋ جولدارى ارقىلى قارا جانە جەرورتا تەڭىزىڭدەرىندەگى پورتتارعا دەيىن تاسىمالداناتىن جۇك كولەمىن ۇلعايتۋعا مۇمكىندىك بەرەدى. سول ارقىلى ەل ەكونوميكاسىنىڭ وركەندەۋىنە ىقپال ەتەدى», – دەدى ماۋلەن اشىمباەۆ.

ودان بولەك، وتىرىستا دەپۋتاتتار «قازاقستان رەسپۋبليكاسىنىڭ ۇكىمەتى مەن بەلارۋس رەسپۋبليكاسىنىڭ ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى. وسى كەلىسىم اياسىندا مەملەكەتتەر ازاماتتاردىڭ كوشى-قونى، كوشى-قون زاڭناماسىنىڭ بۇزىلۋى جانە زاڭسىز كوشى-قون جولدارى تۋرالى اقپاراتتاردى، سونداي-اق، ەلدەردىڭ ءبىرىنىڭ اۋماعىندا تۇرۋعا نەگىزدەمەسى بار تۇلعالاردىڭ قۇقىقتىق مارتەبەسى جونىندەگى مالىمەتتەردى الماسۋعا مۇمكىندىك الادى.

وتىرىس كەزىندە سەناتورلار ءتيىستى مەملەكەتتىك ورگاندارعا بىرقاتار دەپۋتاتتىق ساۋال جولدادى. ءالي بەكتاەۆ ءوز ساۋالىندا تۇركىستان قالاسىنىڭ ينفراقۇرىلىمىن دامىتۋعا قاراجات ءبولۋ ماسەلەسىن كوتەرسە، ءابدالى نۇراليەۆ جامبىل وبلىسى تۇرعىندارىنىڭ تابىسىن ارتتىرۋعا قاتىستى جوبانىڭ ەكىنشى كەزەڭىن قارجىلاندىرۋعا نازار اۋداردى. ءوز كەزەگىندە دەپۋتات اقىلبەك كۇرىشباەۆ وتاندىق جوعارى وقۋ ورىندارىنىڭ جۇمىسىنداعى تۇيتكىلدەرگە توقتالىپ ءوتتى. ال ءالىمجان قۇرتاەۆ تۇركىستان قالاسىنداعى حالىقارالىق تۋريزم جانە مەيماندوستىق ۋنيۆەرسيتەتىن جابدىقتاۋعا جانە قاجىمۇقان مۇڭايتپاسوۆتىڭ 150 جىلدىعىنا ارنالعان مەموريالدى كەشەن قۇرىلىسىنا قاجەتتى قاراجات ءبولۋ ماسەلەسىن ءسوز ەتتى. ءوز ساۋالىندا سەناتور اندرەي لۋكين ازاماتتاردى الەۋمەتتىك قورعاۋ جانە جۇمىسپەن قامتۋ ماسەلەلەرىنە، سونداي-اق، جۇمىسسىزدىقپەن كۇرەس شارالارىنا باسا ءمان بەردى. ال باقىتجان جۇماعۇلوۆتىڭ ساۋالىندا وقۋلىقتاردىڭ ساپاسىن ارتتىرۋ كەرەكتىگى كەڭىنەن ايتىلدى.

Abai.kz