الەمدى جايلاعان پاندەمياعا بايلانىستى ناۋرىز ايىندا ەلىمىزدەگى ءبىلىم بەرۋ جۇيەسى قاشىقتان وقۋ ۇلگىسىنە شۇعىل كوشىرىلدى. ءداستۇرلى ساباق ۇلگىسىنەن ءبىر ساتتە قاشىقتان وقىتۋ ۇلگىسىنە كوشۋ مۇعالىم مەن وقۋشىعا، ءتىپتى اتا-انالارعا وڭاي بولعان جوق. الايدا، قازىرگى تاڭدا ادام ءومىرىنىڭ قاۋىپسىزدىگى ءۇشىن قاشىقتان وقىتۋ، ونلاين ساباق بەرۋ پروتسەسى جالپىعا ورتاق قاجەتتىلىككە اينالدى.

ءداستۇرلى ساباق بەرۋدىڭ ءتيىمدى ءادىس-تاسىلدەرىن جەتىك مەڭگەرگەن ۇستازدارىمىزعا ەندى قاشىقتان وقىتۋدىڭ ادىستەرى مەن قۇرالدارىن  جەدەل تۇردە يگەرىپ، جۇمىس جاساۋعا ماشىقتانۋ قاجەتتىگى تۋىندادى. وسىنداي كۇردەلى كەزەڭدە مۇعالىمگە، وقۋشى مەن اتا-اناعا قولداۋ كورسەتۋ ماقساتىندا «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ وقىتۋشىلارى مەن ادىسكەرلەرى مەكتەپتەردىڭ ۇزدىك ۇستازدارىمەن بىرلەسە وتىرىپ وزىق پەداگوگيكالىق تاجىريبەلەردى رەسپۋبليكامىزدىڭ بارشا ۇستازدارىنا جەتكىزۋ ماقساتىندا جاڭا بەينەساباقتار ازىرلەدى. دالىرەك ايتساق، «ورلەۋ» ۇلتتىق ورتالىعىنىڭ وقىتۋشىلارى جازعى دەمالىس كەزىندە ۇزدىك ءپان مۇعالىمدەرىنەن ارنايى توپ جاساقتاپ، وقۋ جىلىنىڭ 1-ءشى توقسان باعدارلاماسى بويىنشا 5000-عا جۋىق تسيفرلىق ساباقتاردىڭ كونتەنتىن دايىندادى. ساباقتار  قولجەتىمدى بولۋ ءۇشىن ورلەۋدىڭ Youtube ءبىلىم ارناسىنا ورنالاستىرىلدى.

بۇل تسيفرلىق رەسۋرستار كەز كەلگەن ۋاقىتتا ۇستازدار ءۇشىن تسيفرلىق ساباقتاردى جوسپارلاي بىلۋگە، ساباققا قاجەت تسيفرلىق ماتەريالداردى جاساي جانە قولدانا بىلۋگە، وقۋشىلارمەن كەرى بايلانىس جاساۋدىڭ ءادىس-تاسىلدەرىنە ۇيرەتەتىن ادىستەمەلىك نۇسقاۋلىق بولىپ تابىلادى. كەز كەلگەن قولدانۋشىعا اقپاراتتى تەز تابۋ ءۇشىن ارناداعى تسيفرلىق رەسۋرستار پاندەر، سىنىپتار، توقساندار، تاقىرىپتار جانە وقىتۋ تىلدەرى بويىنشا جۇيەلەندىرىلگەن.

بۇگىنگى كۇنى 285 مىڭ تىركەلگەن پايدالانۋشىلارى مەن 51,8 ملن. استام كورسەتىلىمىنىڭ  بولۋى، سونداي-اق ۇستازداردىڭ وڭ پىكىرلەرى – بۇل ۆيدەورەسۋرستاردىڭ كەڭىنەن قولدانىلىپ جاتقانىنىڭ ايعاعى. بۇل تسيفرلىق ساباقتاردى ەلىمىزدىڭ ۇستازدارىمەن قوسا، رەسەي، اقش، كورەيا، ۋكراينا، قىرعىزستان، ەستونيا گەرمانيا، تۇركيا، فرانتسيا، ۇلىبريتانيا، جاپونيا سىندى 50-دەن استام مەملەكەتتەردەن قولدانۋشىلارى بار.

ارنانىڭ قولدانۋشىلار ستاتيستيكاسىنا توقتالاتىن بولساق، تۇراقتى قولدانۋشىلاردىڭ 73% – ايەلدەردى، 27%  –  ەرلەردى قۇرايدى. جاس ارالىعى بويىنشا ەڭ كوپ قارالىم: 19%  –  18-24 جاس;  24,5%  –  25-34 جاس جانە 23,7%  –  35-44  جاس ارالىعىنداعى قولدانۋشىلاردى قۇرايدى.

بارشامىز ءۇشىن وزەكتى ماسەلەلەردىڭ ءبىرى – بارلىعىنا ورتاق جانە ءاربىر ءبىلىم الۋشىنى جەكە-جەكە ناتيجەلى تۇردە وقىتۋ بولىپ وتىر. قازاقستان پرەزيدەنتى قاسىم-جومارت توقاەۆ حالىققا جولداۋىندا «ءبىز وقۋشىلاردىڭ قابىلەتىن ايقىنداپ،  كاسىبي باعىت-باعدار بەرۋ ساياساتىنا كوشۋىمىز قاجەت. بۇل ساياسات ورتا ءبىلىم بەرۋدىڭ ۇلتتىق ستاندارتىنىڭ نەگىزى بولۋى ءتيىس» دەپ اتاپ كورسەتكەن بولاتىن. وسى ورايدا تسيفرلىق رەسۋرستار ءبىلىم بەرۋ جۇيەسىنىڭ ناقتى مىندەتتەرىن شەشۋگە، ءبىرىنشى كەزەكتە وقۋ تيىمدىلىگىن ارتتىرۋعا باعىتتالعان قۇرال ەكەندىگىن اتاپ وتكەن ءجون.

وقۋ پروتسەسىن ۇيىمداستىرۋ جانە ساباق جوسپارىنا قاجەتتى ادىستەمەلىك كومەك كورسەتۋ ماقساتىندا 2017 جىلدان باستاپ «ورلەۋ» ۇلتتىق ورتالىعىنىڭ Youtube ءبىلىم ارناسى ۇستازدارعا قىزمەت ەتىپ كەلەدى. قازىرگى ۋاقىتتا ءبىلىم ارناسىنا ءارتۇرلى تاقىرىپتار بويىنشا توپتاستىرىلعان، بارلىعى 8000-عا جۋىق ۆيدەو-ساباقتار جۇكتەلگەن.

سونداي-اق، «پەداگوگيكالىق يدەيالار پانوراماسى» رەسپۋبليكالىق كونكۋرسىنىڭ نەگىزىندە جيناقتالعان بارلىق ءبىلىم دەڭگەيلەرى ءۇشىن ۆيدەو ساباقتاردىڭ توپتاماسى ءبىلىم بەرۋ ارناسىنا جۇكتەلىپ، ۇستازدار تاراپىنان ولاردى پراكتيكادا كەڭىنەن پايدالانۋعا مۇمكىنشىلىك تۋعىزىپ وتىر.

ارنا بارلىق دەڭگەيدەگى ۇستازداردى كۋرستان كەيىنگى ۇزدىكسىز ادىستەمەلىك قولداۋ ۇدەرىسىنە ارنالعان ءتۇرلى پلەيليستەردەن تۇرادى. ولار «ورتا ءبىلىم»، «تەحنيكالىق جانە كاسىپتىك ءبىلىم»، «جوعارى ءبىلىم»، «قوسىمشا ءبىلىم بەرۋ»، «ينكليۋزيۆتى ءبىلىم بەرۋ»، «قاشىقتان وقىتۋ» ت.ب.

ءدال قازىرگى كەزدە اقپاراتقا دەگەن سۇرانىس ارتقان سايىن ونىڭ تەز ەسكىرەتىنى زاڭدى قۇبىلىس ىسپەتتى. سول سەبەپتى، Youtube ءبىلىم ارناسىنداعى تسيفرلىق رەسۋرستار ءاردايىم جاڭارتىلىپ، تولىقتىرىلىپ ءبىلىم الۋشىلار مەن ءبىلىم بەرۋشىلەر سۇرانىسىن  قاي كەزدە بولسىن قاناعاتتاندىرا الاتىنى ءسوزسىز.

كەز كەلگەن ءبىلىم بەرۋ ورداسىنىڭ باستى مىندەتتەرىنىڭ ءبىرى – ءبىلىم مازمۇنىنىڭ جاڭارۋىنا ساي ساپالى ءبىلىم الۋ مۇمكىندىگىن قامتاماسىز ەتۋ. بۇگىندە وسى ميسسيانى «ورلەۋ» ۇلتتىق ورتالىعى ابىرويمەن اتقارىپ كەلەدى. قازىرگى زامان تالابىنا ساي يننوۆاتسيالىق تەحنولوگيالاردى ءوز ساباقتارىندا كۇندەلىكتى ەركىن پايدالانا الاتىن، ساباقتارىن ءاربىر وقۋشىعا قونىمدى، ءارى قىزىقتى فورمادا ۇيىمداستىرا الاتىن ۇستازدارعا ۇستازدىق ەتۋ جولىندا قىزمەت ەتەدى.

«ءبىر قادام الدا بول» ۇرانىمەن جۇمىس ىستەيتىن ۇلتتىق ورتالىق!

ەرعالي بەرىكۇلى

Abai.kz