احمەت بايتۇرسىنۇلى اتىنداعى ءتىل ءبىلىمى ينستيتۋتى بۇرىن ۇسىنعان ۇلتتىق ءالىپبي جوباسىن قولداۋشى عالىمداردىڭ

مالىمدەمەسى

اسا قۇرمەتتى قاسىم-جومارت كەمەلۇلى!

حاتىمىزدى وزىڭىزگە شىنايى ريزاشىلىعىمىزدى بىلدىرۋدەن باستاپ وتىرمىز. ءسىزدىڭ قازاق ءتىلىنىڭ جاڭا لاتىن ءالىپبيىن «ءتىلشى عالىمدارى جەتىلدىرسىن» دەگەن تاپسىرماڭىزدى – ءادىل ءارى مەزگىلىندە ايتىلعان شەشىم دەپ قابىلداپ وتىرمىز.

عالىمداردىڭ ورتاق پىكىرى، ولجاس ومارۇلى جازعانداي، سوڭعى وتىز جىل ىشىندە ەش وزگەرمەستەن اكادەميكتەر ءابدۋالى قايداري، رابيعا سىزدىق، ومىرزاق ايتبايۇلى، پروفەسسورلار ءالىمحان جۇنىسبەك، ەردەن قاجىبەك، سونداي-اق قازاق ءتىل عىلىمىنىڭ قاراشاڭىراعى احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ، ءال-فارابي، اباي، ابىلايحان، دۋلاتي، گۋميلەۆ، ياساۋي اتىنداعى ۇلتتىق ۋنيۆەرسيتەتتەرى مەن حالىقارالىق تۇركى اكادەمياسى عالىمدارىنىڭ مونوگرافيالارىندا، كونفەرەنتسيا ماتەريالدارىندا، باق بەتتەرىندە جاريالانىپ كەلە جاتقان كەلىسىمدى شەشىمى بولىپ تابىلادى. 

عالىمداردىڭ ورتاق ۇسىنىسى، تۇركىتانۋشى-اقىن ولجاس سۇلەيمەنوۆ ماقالاسىندا كورسەتكەن، ورتاقتۇركى ءالىپبي نۇسقاسىمەن تولىق سايكەس كەلەدى. «بولىنگەندى ءبورى جەيدى» – قازاقستاننىڭ تۇركىبىرىكتىرۋشى بەيبىتشىل ساياسات ۇستانىپ كەلە جاتقانىن ەسكەرسەك، ورتاق ءالىپبي سول ساياساتتى ىسكە اسىرۋدىڭ  ۇتىمدى تەتىگى بولىپ تابىلادى. ەندەشە ءبىر اتانىڭ بالالارىنداي تۇركىلەردىڭ باسىن ىدىراتاتىن ەمەس، باسىن ۇيىستىرىپ وتىراتىن جازۋ كەرەك.  

تومەندە اتتارىمىز كورسەتىلگەن ءبىز، احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ بۇرىنعى عىلىمي كەڭەس مۇشەلەرى، ءبولىم مەڭگەرۋشىلەرى، باس جانە اعا عىلىمي قىزمەتكەرلەرى، فيلولوگيا عىلىمدارىنىڭ دوكتورلارى مەن  كانديداتتارى، ءوزىمىزدىڭ جانە پىكىرلەس وزگە ارىپتەستەرىمىزدىڭ اتىنان – ولجاس اعامىزدىڭ قازاقستان رەسپۋبليكاسىنىڭ پرەزيدەنتى وزىڭىزگە ۇسىنعان ءالىپبي نۇسقاسىن عانا قابىلداعان ءجون بولار دەپ وتىرمىز. 

كەزىندە ءتىل ءبىلىمى ينستيتۋتىندا جۇرگەندە ءوزىمىز قولداپ، قابىلدانعان «ۇلتتىق ءالىپبي» ۇلگىسىن قوسا جولداپ وتىرمىز.

حالىقارالىق اتاۋ-تەرميندەر ءۇشىن Vv, Ff, Hh, Xx تاڭبالارىن «ۇلتتىق ءالىپبي» قۇرامىنا قوسالقى توپ رەتىندە ەنگىزۋ جولى قاراسىتىرىلاتىن بولادى.

اسا قادىرلى قاسىم-جومارت كەمەلۇلى، وزىڭىزگە شىنايى قۇرمەتپەن:

جاقىندا عانا ارامىزدان وتكەن اكادەميكتەر: 

ءابدۋالى قايدار، 

رابيعا سىزدىق، 

ومىرزاق ايتبايۇلىنىڭ ۇستانىمىن قولداۋشىلار:

انار سالقىنباي – فيلولوگيا عىلىمدارىنىڭ دوكتورى، پروفەسسور;

قارلىعاش ايداربەك – فيلولوگيا عىلىمدارىنىڭ دوكتورى، پروفەسسور م.ا.;

ورىناي جۇباەۆا – فيلولوگيا عىلىمدارىنىڭ دوكتورى، پروفەسسور;

بوتاگوز سۇيەرقۇل – فيلولوگيا عىلىمدارىنىڭ دوكتورى، پروفەسسور م.ا.;

بيجومارت قاپالبەك – فيلولوگيا عىلىمدارىنىڭ كانديداتى; 

ەرعالي ەسبوسىن – فيلولوگيا عىلىمدارىنىڭ كانديداتى;

باۋىرجان جونكەش – فيلولوگيا عىلىمدارىنىڭ كانديداتى; 

مەيرامبەك تاۋبالدى – رhD دوكتورانت 

Abai.kz