الەكساندر لۋكاشەنكو 13 قاراشادا بەلارۋس پەن شەتەلدىڭ ساياسي شولۋشىلارىنا سۇحبات بەرىپ، بەلارۋستەگى وقيعالار پوستكەڭەستىك ەلدەر ءۇشىن ماڭىزدى ساباق بولۋى قاجەتتىگىن مالىمدەپتى.

سۇحبات بارىسىندا ول الەمنىڭ ءتۇرلى ايماعىنداعى وقيعالارعا توقتالا كەلە، قازاقستان دا ەش جاعدايدا «بوساڭسىماۋى» كەرەكتىگىن ايتقان.

ونىڭ ايتۋىنشا، پرەزيدەنتتىك سايلاۋ ناتيجەسىنە قارسىلىق بارلىق ەلدە بولادى.

«قازاقستاندا دا مۇنداي جاعدايلار بىرنەشە رەت بولدى، بىراق ونىڭ ءبارى باق-تاردا جاريالانبادى. وندا ءارتۇرلى باندا وڭتۇستىكتە دە، شىعىستا دا توبەلەس شىعارعان. مۇنداي الداعى ۋاقىتتا دا بولادى. سوندىقتان ەش جاعدايدا بوساڭسۋعا بولمايدى. بەلارۋس - سىزدەرگە ماڭىزدى ساباق. سەبەبى قازاقستان مەن رەسەي بەلارۋس ەمەس. بۇل ۇلكەن ەلدەر» ، - دەدى لۋكاشەنكو.

لۋكاشەنكونىڭ ايتۋىنشا، بەلارۋستە نارازىلىق شاراسىن ۇيىمداستىرۋعا ەش سەبەپ بولماعان.

ايتا كەتەيىك، 9 تامىزدا بەلارۋستە پرەزيدەنت سايلاۋى ءوتتى. رەسمي مالىمەت بويىنشا قازىرگى پرەزيدەنت الەكساندر لۋكاشەنكو 80,1 پايىز داۋىس جيناعان. الايدا، سايلاۋ ناتيجەسىمەن كەلىسپەگەن حالىق جاپپاي نارازىلىق شارالارىن وتكىزىپ كەلەدى.

100 كۇنگە ۇلاسقان حالىق نارازىلىعىندا 25 800 ادام تۇتقىندالىپ، 4 ادام قايتىس بولعان. ال، مينسكىدەگى نارازىلىق شەرۋلەرىنە 1 ملن.ادام قاتىسقان.

Abai.kz