سەنبى, 5 جەلتوقسان 2020
COVID-19 قازاقستاندا. جۇقتىرعاندار — 135498. جازىلعاندار — 119419. قايتىس بولعاندار — 2034
بيلىك 1372 23 پىكىر 20 قاراشا, 2020 ساعات 16:23

توقاەۆ: ىشكى تولقۋلار ەلدىڭ تۇتاستىعىنا ءسوزسىز اسەر ەتەدى

كەشە قازاقستان پرەزيدەنتى قاسىم-جومارت توقاەۆتىڭ توراعالىعىمەن قورعانىس مينيسترلىگىنىڭ كەڭەيتىلگەن القا ءماجىلىسى ءوتتى. بۇل تۋرالى اقوردا سايتى حابارلادى.

جيىندا جوعارعى باس قولباسشى كەلەر جىلى قازاقستان تاۋەلسىزدىگىنە 30 جىل تولاتىنىن اتاپ ءوتىپ، وسى جىلدار ىشىندە ۇلتتىق اسكەرىمىز تولىق قالىپتاسقانىن، ەلىمىزدىڭ ارمياسى ەگەمەندىگىمىز بەن تۇتاستىعىمىزدىڭ تىرەگىنە اينالعانىن ايتتى. ءبىز قازاقستان پرەزيدەنتىنىڭ اتالعان جيىندا ايتقان سوزدەرىن نازارلارىڭىزعا ۇسىنامىز...

پرەزيدەنت توقاەۆ ىشكى تولقۋلار، توڭكەرىستەر ەلدىڭ تۇتاستىعىنا ءسوزسىز اسەر ەتەدى دەپ سانايتىنىن ايتقان. الىس-جاقىن كورشى ەلدەردەگى وقيعالاردى تىلگە تيەك ەتكەن.

«مۇنداي جاعدايدا مەملەكەتتىڭ ەگەمەندىگى مەن تۇتاستىعىنىڭ جالعىز كەپىلى – قارۋلى كۇشتەر. ەلىمىزدى سىرتقى قاۋىپ-قاتەردەن قورعاپ تۇرعان اسكەري قىزمەتشىلەردى مەملەكەت ءاردايىم قولدايدى. پرەزيدەنت جانە جوعارعى باس قولباسشى رەتىندە قورعانىس سالاسىنا ەرەكشە كوڭىل ءبولۋدى ءوز جۇمىسىمنىڭ باسىم باعىتى رەتىندە سانايمىن»، - دەگەن توقاەۆ.

پرەزيدەنتتىڭ پىكىرىنشە، وسىعان دەيىن قول جەتكەن جەتىستىكتەردى ساقتاۋ ءۇشىن قارۋلى كۇشتەردىڭ قىزمەتىندەگى بىرقاتار باسىمدىققا كوڭىل ءبولۋ قاجەت. اتاپ ايتقاندا، اسكەردەگى مورالدىق-پسيحولوگيالىق احۋالدى جانە ساربازداردىڭ جاۋىنگەرلىك رۋحىن كوتەرۋ اسا ماڭىزدى.

«قورعانىس مينيسترلىگىنە مۇددەلى ورگاندارمەن بىرلەسىپ، 2021  جىلعى 1 قاراشاعا دەيىن قارۋلى كۇشتەردەگى، باسقا دا اسكەرلەر مەن اسكەري قۇرىلىمدارداعى يدەولوگيالىق جۇمىستاردىڭ تۇجىرىمداماسىن ازىرلەۋدى تاپسىرامىن»، - دەدى پرەزيدەنت.

سونىمەن قاتار ول اسكەريلەردى الەۋمەتتىك-قۇقىقتىق تۇرعىدان قورعاۋ ماسەلەسىنە توقتالعان. سونىڭ ىشىندە:

- كەلەسى جىلدان باستاپ كۇشتىك قۇرىلىمدارعا ارنالعان ازىق-تۇلىككە بولىنەتىن قارجى كولەمىن ارتتىرۋ،

- 3 جىل ىشىندە اسكەري قىزمەتشىلەرگە بەرىلەتىن قارجىلاي تولەمدى ورتاشا ەسەپپەن 30 پايىزعا كوبەيتۋ تۋرالى شەشىم قابىلدانعانىن حابارلادى.

قاسىم-جومارت توقاەۆ بيىل وتكەن اسكەري جاتتىعۋلاردا قازاقستاندىق اسكەريلەردىڭ جوعارعى دايىنتىق كورسەتكەنىن،  قازاقستان ارمياسى بىتىمگەرلىك ميسسيالارعا قاتىسۋعا ءازىر ەكەنىن ايتقان. ءسويتىپ، 2021 جىلدىڭ 1 تامىزىنا دەيىن قازاقستان قارۋلى كۇشتەرىنىڭ بۇۇ بىتىمگەرلىك وپەراتسيالارىنا قاتىسۋىن كەڭەيتۋ جونىندەگى جول كارتاسىن ازىرلەۋدى مىندەتتەگەن.

پرەزيدەنت قازاقستاندىق ارميانى ەڭ وزىق تسيفرلىق تەحنولوگيالارمەن جانە قۇرالدارمەن جابدىقتاۋدىڭ ماڭىزدى ەكەنىن ەسكەرتتى. بۇل ماسەلەنى شەشۋ ءۇشىن قورعانىس ءمينيسترىنىڭ تسيفرلاندىرۋ جونىندەگى ورىنباسارى قىزمەتىن ەنگىزۋ تۋرالى شەشىم قابىلداندى. بۇدان بولەك قاسىم-جومارت توقاەۆ 2021 جىلدىڭ 1 قاراشاسىنا دەيىن اسكەري باعىتتاعى ءبىرتۇتاس اقپاراتتىق-كوممۋنيكاتسيالىق ينفراقۇرىلىم وپەراتورىن قۇرۋدى تاپسىردى.

مەملەكەت باسشىسى اسكەري قۇرىلىمداردى قازىرگى سىن-قاتەرلەردى ەسكەرە وتىرىپ زاماناۋي قارۋ-جاراقپەن قامتاماسىز ەتۋدىڭ بىرقاتار باسىمدىعىن اتادى.

قاسىم-جومارت توقاەۆ ارميا مەملەكەتىمىزدىڭ تىرەگى، ەگەمەندىكتىڭ كەپىلى ەكەنىن جانە ءاربىر قازاقستاندىق سارباز بەن ساردار قاستەرلى تاۋەلسىزدىگىمىزدى كۇزەتىپ تۇرعانىن ۇدايى ەسىندە ۇستاۋعا ءتيىس ەكەنىن ايتتى.

Abai.kz

23 پىكىر