بۇگىن ۇكىمەت باسشىسى اسقان ءماميننىڭ رەسەي جالعا الىپ وتىرعان بايقوڭىرداعى 7 مەكتەپتىڭ رف ءبىلىم جۇيەسىمەن وقىتىلىپ جاتقانىن ايتقانى اقپاراتتا تارادى. اتالعان مەكتەپتەردە «قازاقستان تاريحى»، «قازاق ءتىلى» مەن «قازاق ادەبيەتى» وقۋلىقتارىن وقىتۋ ءۇشىن رەسەي وقۋ-اعارتۋ مينيسترلىگىنىڭ رۇقساتى كەرەك ەكەن.

بايقوڭىرداعى قازاق مەكتەپتەرى مەن قازاق ءتىلى ءبىرىنشى جىل ءسوز بولىپ وتىرعان جوق. اتالعان ماسەلە وسىعان دەيىن دە ەكى ەل اراسىندا ۇكىمەتارالىق كوميسسيا قۇرىلىپ شەشىلەتىنى ايتىلعان. قاراڭىز:

6 جىل بۇرىن

2014 جىل. قىرىمبەك كوشەرباەۆ، سول كەزدەگى قىزىلوردا وبلىسىنىڭ اكىمى:

«يا، بايقوڭىردا قازاقستان بالالارى وقيتىن التى مەكتەپ بار. ولار قازاقستاننىڭ ءبىلىم ستاندارتى ەمەس، رەسەيدىڭ ءبىلىم ستاندارتى بويىنشا ءبىلىم الدى. قازاقتىڭ بالالارى قازاق مەكتەبىندە كىتاپ بەتىن اشادى دا، «پرەزيدەنتىم پۋتين» دەيدى. ەرتەڭ ولار قانداي ازامات، قانداي پاتريوت بولادى دەپ ايتا الامىز؟

سوندىقتان، ەكى ەلدىڭ ءبىلىم مينيسترلىكتەرى ۇكىمەتارالىق كەلىسىم جۇرگىزدى. بۇعان دەيىن ايتقانىمداي، وسى ايدا بايقوڭىردا ۇكىمەتارالىق وتىرىس وتەدى، سول وتىرىس بارىسىندا بۇل ماسەلە دە ءوز شەشىمىن تابادى. ءسويتىپ 2015-2016 وقۋ جىلىنان باستاپ بايقوڭىرلىق مەكتەپتەر ءبىزدىڭ ەلىمىزدىڭ ستاندارتى بويىنشا جۇمىس ىستەيتىن بولادى»، - دەگەن.

2015 جىل. قىرىمبەك كوشەرباەۆ، سول كەزدەگى قىزىلوردا وبلىسىنىڭ اكىمى:

«بيىلعى وقۋ جىلى بارشامىزعا ۇلكەن قۋانىشپەن باستالىپ وتىر. ويتكەنى رەسەيدىڭ وقۋ ستاندارتىنا ءوتىپ كەتكەن قازاق مەكتەپتەرىن وزىمىزگە قايتارىپ الدىق. بۇگىننەن باستاپ وسىنداعى 6 قازاق مەكتەبى وتاندىق ءبىلىم بەرۋ جۇيەسىمەن جۇمىس ىستەيدى. بۇل تاۋەلسىز ەلىمىز ءۇشىن جانە وسىنداعى قاراكوز بالالارىمىزدىڭ بولاشاعى ءۇشىن ماڭىزدى»، - دەپ سويلەگەن.

2016 جىل. قىرىمبەك كوشەرباەۆ، سول كەزدەگى قىزىلوردا وبلىسىنىڭ اكىمى:

«ءبىز قازاقستاننىڭ عارىش وبەكتىلەرىن جالعا بەرگەنىمىزبەن، قازاقستان ازاماتتارىن جالعا بەرگەن جوقپىز. ولاردىڭ الەۋمەتتىك ماسەلەلەرىمەن، الەۋمەتتىك جاعايلارىمەن ءبىز جۇمىس ىستەۋىمىز كەرەك. ويتكەنى، بايقوڭىردا تۇراتىن حالىقتىڭ 64 پايىزى قازاقستان ازاماتتارى»، - دەدى.

2017 جىل. قىرىمبەك كوشەرباەۆ، سول كەزدەگى قىزىلوردا وبلىسىنىڭ اكىمى:

«بايقوڭىرداعى 6 مەكتەپتى قازاقستاندىق ءبىلىم بەرۋ جۇيەسىنە كوشىردىك. ويتكەنى، ولار رەسەيلىك وقۋلىقتاردى قازاقشاعا اۋدارعان دا، سونى وقىتقان. قازاق مەكتەپتەرىندەگى وقۋشىلار «مەنىڭ پرەزيدەنتىم – پۋتين»، «مەنىڭ استانام – ماسكەۋ» دەپ وقىپ كەلگەن. ءبىز وسىنى تۇزەتىپ، بايقوڭىرداعى التى مەكتەپتى دە قازاقستاندىق ءبىلىم ستاندارتىمەن وقيتىنداي ەتتىك.

سونىمەن قاتار، قالادا مەملەكەتتىك بيۋدجەتپەن سالىنعان پەرزەنتحانا بار ەدى. 6 جىلدان بەرى بوسقا تۇرعان بولاتىن. سونى ءبىز قازىرگى تاڭدا وبلىستىق مەديتسينالىق ورتالىقتىڭ بولىمشەسى رەتىندە پايدالانا باستادىق» - دەگەن.

6 جىل وتكەسىن...

2020 جىل. اسقار مامين، قر پرەمەر-ءمينيسترى:

«بايقوڭىر قالاسىنىڭ 7 مەكتەبىندە وقىتۋ رەسەي فەدەراتسياسىنىڭ مەملەكەتتىك جالپىعا مىندەتتى ءبىلىم بەرۋ ستاندارتتارىنا سايكەس جۇرگىزىلەدى. بۇل مەكتەپتەردە قازاقستاندىق بالالار دا وقيدى. ولار ءوز بولاشاعىن قازاقستانمەن بايلانىستىراتىندىقتان، ولار ءۇشىن «قازاقستان تاريحىن»، «قازاق ءتىلى مەن ادەبيەتىن» ءبىلۋ ماڭىزدى بولىپ تابىلادى. مەكتەپ باعدارلاماسىنا اتالعان پاندەردى ەنگىزۋ ءۇشىن رەسەي فەدەراتسياسىنىڭ وقۋ-اعارتۋ مينيسترلىگىنىڭ رۇقساتى قاجەت.

بايقوڭىر قالاسى بويىنشا قازاقستان-رەسەي ۇكىمەتارالىق كوميسسياسىنىڭ بولەك وتىرىسىندا قاراۋدىڭ ورىندىلىعى تۋرالى شەشىم قابىلدانىپ، اتالعان ماسەلە كۇن تارتىبىنەن الىنىپ تاستالدى.

بايقوڭىر قالاسىنداعى 7 مەكتەپتىڭ بىرەۋىن رەسەي فەدەراتسياسىنىڭ بالانسىنان الىپ قازاقستاننىڭ كوممۋنالدىق مەنشىگىنە بەرۋ ماسەلەسى دە ءبىلىم بەرۋ سالاسىنداعى ىنتىماقتاستىق جونىندەگى ۇكىمەتارالىق كەزەكتى كوميسسيانىڭ وتىرىسىندا قاراستىرىلاتىن بولادى»، - دەدى.

Abai.kz