«بۇل – ميلليونداعان قازاق پەن ورىستىڭ تاريحي تانىمىن قورلاۋ». سەناتور، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد رەسەي فەدەراتسياسى دۋماسىنىڭ دەپۋتاتى ۆياچەسلاۆ نيكونوۆتىڭ ارانداتۋشىلىق سوزىنە قارسى وسىنداي پىكىر ءبىلدىردى.

ءوز پىكىرىندە سەناتور قازاق حالقىنىڭ تاريحى تىم تەرەڭدە جاتقانىن، ونىڭ ىشىندە اتا-بابالارىمىزدىڭ ەجەلدەن سولتۇستىك قازاقستاندى قونىس ەتكەنىن ايتقان.

«ەرتە زامانداردان بەرى قاراي اتالعان جەرلەردى قازاق تايپالارى جايلاعانى – باسى اشىق اقيقات. ءدال وسى جەردە ءبىزدىڭ زامانىمىزعا دەيىن ءۇشىنشى مىڭجىلدىقتا ءومىر سۇرگەن اتاقتى بوتاي مادەنيەتىنىڭ قونىستارى تابىلدى. بوتايلىقتار جابايى جىلقىلاردى قولعا ۇيرەتكەن، جىلقى شارۋاشىلىعىمەن جانە ءارتۇرلى كاسىپپەن اينالىسقان. عاسىرلار مەن مىڭجىلدىقتار بويى وسى دالادا ءبىزدىڭ تىكەلەي بابالارىمىز – ساقتار، عۇندار، تۇركىلەر، قىپشاقتار مەن قازاقتار قۇرعان مەملەكەتتەر ءبىرىن-ءبىرى الماستىرىپ وتىردى»، – دەيدى مۇحتار قۇل-مۇحاممەد.

سونىمەن قاتار، سەنات دەپۋتاتى قازاق دالاسىندا تۇركى قاعاناتى، دەشتى-قىپشاق، ورتا عاسىرداعى داڭقتى مەملەكەت – التىن وردا، قازاق حاندىعى تۋىن تىككەنىن جانە بۇگىنگى قازاقستان وسى ەلدەردىڭ زاڭدى جالعاسى ەكەنىن دالەلدى جەتكىزگەن.

«التىن وردانىڭ نەگىزىن قالاعان جوشى حان – كەرەي مەن جانىبەكتەن ابىلايعا دەيىنگى بارلىق قازاق حاندارىنىڭ اتاسى. جوشى حاننىڭ مازارى ۇلىتاۋدا، ورتالىق قازاقستاننىڭ اۋماعىندا ورنالاسقان. التىن وردا ىدىراعاننان كەيىن 1465 جىلى قازاق حاندىعى قۇرىلدى. ونىڭ 550-جىلدىعىن 2015 جىلى قازاقستان مەملەكەتتىك دەڭگەيدە اتاپ ءوتتى. مىنە، ءدال وسى حاندىق رەسەيمەن دوستىق قارىم-قاتىناس ورناتقان. بۇل تۋرالى رەسەيلىك عالىمدار جان-جاقتى زەرتتەۋلەر جاساعان»، – دەدى مۇحتار قۇل-مۇحاممەد.

سەناتور بۇگىندە قازاقستان مەن رەسەيدىڭ اراسىندا ۇلگىلى بايلانىس ورناعانىن دا اتاپ وتكەن.

«قازىرگى تاڭدا قازاقستان مەن رەسەيدى ستراتەگيالىق سەرىكتەستىك، ماڭگىلىك دوستىق تۋرالى كەلىسىم جانە وداقتاستىق، جەتى جارىم مىڭ شاقىرىمنان استام شەكارا، ەڭ باستىسى – ازاماتتارىمىز بەن حالىقتارىمىزدى كوزگە كورىنبەس بەرىك جاراسىم بايلانىستىرىپ تۇر»، – دەدى سەناتور.

سوندىقتان، تاۋەلسىزدىك كۇنىنىڭ قارساڭىندا ايتىلعان ۆياچەسلاۆ نيكونوۆتىڭ ءسوزى حالقىمىزدىڭ اشۋ-ىزاسىن تۋدىرعانىن ايتتى.

«بۇل – ساياسي جاۋاپسىزدىق قانا ەمەس، بەرىك دوستىق قارىم-قاتىناس ورناتا بىلگەن ميلليونداعان قازاق پەن ورىستىڭ تاريحي تانىمىن قورلاۋ. مەن ءۇشىن دە جانە ميلليونداعان قازاقستاندىق ءۇشىن دە ورىس پەن قازاق حالقى اراسىنداعى دوستىقتى ساقتاۋدىڭ ماڭىزدى ەكەنى ايقىن. اسىرەسە، ايىپتاۋلار مەن ارانداتۋشىلىق مالىمدەمەلەرگە جول بەرۋگە بولمايدى»، – دەدى مۇحتار قۇل-مۇحاممەد.

Abai.kz