«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك جۋرناليست نارتاي ارالبايۇلىنىڭ YouTube-ارناسىنا بەرگەن سۇحباتىندا رەسەي دەپۋتاتتارىنىڭ كوتەرگەن جەر ماسەلەسىنە قاتىستى پىكىرىن ءبىلدىردى. جۋرناليست اتالعان داۋلى ماسەلەگە قاتىستى پارتيانىڭ ۇستانىمىن سۇرادى.

جاقىندا رەسەي دۋماسىنىڭ دەپۋتاتتارى «رەسەي قازاقستانعا جەر سىيلاعان» دەپ ايدى اسپانعا ءبىر-اق شىعاردى. وسى ورايدا باۋىرجان بايبەك «Nur Otan» پارتياسىنىڭ وكىلدەرى العاشقىلاردىڭ ءبىرى بولىپ، ۇلتتىق مۇددەنى قورعاپ، رەسەيلىك قوس دەپۋتاتقا جاۋاپ بەرگەنىن مالىمدەدى.

«ول دەپۋتاتتار بۇل ءسوزدى ايتقان كەزدە ەڭ ءبىرىنشى باعا بەرگەن ايدوس سارىم بولدى. ول قازىر ءبىزدىڭ پارتيا اتىنان ماجىلىسكە ۇمىتكەر، ساياساتتانۋشى. كوپ وتپەي پاۆەل كازانتسەۆ ءوز ۇستانىمىن ءبىلدىردى. ول پارتيامىزدىڭ ساياسي كەڭەسىنىڭ مۇشەسى، پارتيالىق باقىلاۋ كوميتەتىنىڭ توراعاسى

2013 جىلى «Nur Otan» پارتياسى ءوزىنىڭ ساياسي تۇعىرناماسىن قابىلدادى. سول كەزدە پارتيانىڭ ىشىندە كەڭ اۋقىمدى كەزدەسۋلەر، پىكىر تالاستار جۇرگەن. پارتيا زيالى قاۋىم وكىلدەرىمەن، ۇەۇ مۇشەلەرىمەن سول قۇجاتتى تالقىلاعان. اتالعان نەگىزگى قۇجاتتا ەلىمىزدىڭ ەڭ ۇلكەن جەتىستىگى دە، قۇندىلىعى دا مەملەكەتتىڭ تاۋەلسىزدىگى دەپ انىق جازىلدى. بۇل بۇرىن دا، كەيىن دە ايتىلعان ءتۇرلى قيسىق پىكىرلەرگە «Nur Otan»-نىڭ بەرگەن ناقتى جاۋابى بولاتىن. بۇل جاۋاپ وزگەرگەن ەمەس. پارتيانىڭ ۇستانىمى - حالىقتىڭ بىرلىگى، ىنتىماعى، تۇتاستىعى اسا ماڭىزدى»، - دەدى ول. 

باۋىرجان بايبەك رەسەيلىك دەپۋتتاردىڭ مالىمدەمەسى ارزان اتقا يە بولۋدىڭ امالى، قارا باستىڭ قامى دەيدى.

«قازاقتا «اتىڭ شىقپاسا، جەر ورتە» دەگەن ءسوز بار عوي. قازىر حايپتىڭ ۋاقىتى. مەن بۇرىن بۇل دەپۋتاتتاردىڭ اتىن ەستىگەن ەمەسپىن. ولار وسى سوزدەرىمەن تانىمال بولۋعا تىرىسادى»، - دەدى ول.

سونداي-اق ول سوزىندە قازاقستان شەكاراسى حالىقارالىق قۇجاتتارمەن مويىندالعانىن، الەمنىڭ ءىرى دەرجاۆالارى ەلىمىزدىڭ جەر تۇتاستىعىنا كەپىلدىك بەرگەنىن قايتا ەسكە سالدى.

«ەلباسى بارلىق شەكارانى شەگەندەدى. قازاقستان يادرولىق ارسەنالدان باس تارتقان كەزدە اقش، قىتاي، رەسەي سەكىلدى مەملەكەتتەر قۇجاتقا قول قويۋ ارقىلى رەسمي تۇردە ەلىمىزدىڭ تەرريتوريالىق تۇتاستىعىنا كەپىلدىك بەرگەن. سوندىقتان شەكارامىز بەكىتىلگەن»، - دەدى سۇحباتىندا پارتيا توراعاسىنىڭ ءبىرىنشى ورىنباسارى.

ۇلت ءۇشىن مۇنداي ماڭىزدى ماسەلەدە بيلىكتەگى پارتيانىڭ باسشىلىعى ءۇنسىز قالماي، ب.بايبەك تە اتالعان جەر داۋىنا قاتىستى ءوز ۇستانىمىن انىق جەتكىزدى جانە ۇلت تاريحىندا تەگىن جەردىڭ بولماعانىن قاداپ ايتتى.

«قازاقتىڭ تاريحىندا بىزگە ەشكىم ەشقانداي جەر سىيلاعان جوق. بارلىق جەرىمىز بابالارىمىزدىڭ ماڭداي تەرىمەن، توگىلگەن قانىمەن بۇگىنگە دەيىن امان جەتتى. ەندى ءبىزدىڭ، پارتيانىڭ، بۇگىنگى بۋىن جاستاردىڭ دا مىندەتى - تاۋەلسىزدىگىمىزدى نىعايتۋ»، - دەدى باۋىرجان بايبەك.

ءيا، ديپلوماتتارىمىز، دەپۋتاتتارىمىز قاجەتتى جاۋابىن بەردى. باستىسى – ءبىز قازاقتىڭ تەرەڭ تاريحىندا ەشبىر كورشىمىز «مىنە، الا قوي» دەپ ءبىر قارىس جەرىن دە سىيعا بەرمەگەنىن بىلەمىز. ۇلان عايىر اتىراپتى قورعاۋدا قازاقتىڭ عانا قانى توگىلگەن. دەگەنمەن بۇل كۇندە تەك تاۋەلسىزبىز دەپ كوكىرەك ۇرۋ جەتكىلىكسىز. ساياسي، ەكونوميكالىق، قارجىلىق، دەموگرافيالىق، ازىق-تۇلىك، ديپلوماتيالىق، اسكەري تاۋەلسىزدىكتى ساقتاۋ دا اسا ماڭىزدى ەكەنىن الەمدە بولىپ جاتقان سوڭعى گەوساياسي پروتسەستەر دالەلدەپ كەلەدى. ويتكەنى وسى سالالاردىڭ بىرىندە وزگەگە كىرىپتار بولساق، ەركىندىگىمىزدىڭ جارتىسىن سول تاراپقا جىرىپ بەردىك دەگەن ءسوز.

باۋىرجان بايبەك سۇحبات بارىسىندا تاۋلى قاراباحتاعى قاقتىعىستىڭ قانداي جاعدايلارعا الىپ كەلگەنىن ايتىپ، جەر داۋىنىڭ سالدارى اۋىر بولاتىنىن ەسكەرتتى.

«وسىندايدا ەلباسىنىڭ «تاۋەلسىزدىكتى الۋ قيىن. ال ونى ۇستاپ قالۋ ودان دا قيىن» دەگەن ءسوزى ەسكە تۇسەدى. قازىرگى تاڭدا قاعاز جۇزىندە ءوزىن ەگەمەنبىز دەگەن ەل كوپ. بىراق دە-فاكتو وزگە مەملەكەتتەر بيلەپ جاتىر. بۇۇ مالىمەتى بويىنشا، 60 جۋىق مەملەكەت ءالى دە شەكارا ماسەلەسىن تولىقتاي شەشپەگەن»، - دەپ ويىن قورىتىندىلادى.

سۇحباتىنىڭ سوڭىندا پارتيا توراعاسىنىڭ ءبىرىنشى ورىنباسارى تاريحتى بىلمەيتىن ادامداردىڭ تەرىس ويىنا بولا كورشىلەرمەن قارىم-قاتىناسىمىز بۇزىلماۋى ءتيىس ەكەنىن باسا ايتتى.

باۋىرجان بايبەكتىڭ YouTube – ارناعا بەرگەن سۇحباتى جاقىن كۇندەرى جاريالانادى.

Abai.kz