پرەزيدەنت قاسىم-جومارت توقاەۆتىڭ نازارىنا!

بەس پارتيا ماجىلىسكە باراتىن كانديداتتارىنىڭ ءتىزىمىن جاريالادى. بىراق، قاي جانە قانشا پارتيانىڭ جەڭىسكە جەتەرى ازىرگە بەلگىسىز.

سول قاتاردا قازاقستان حالقى اسسامبلەياسىنان سايلاناتىن توعىز دەپۋتاتتىڭ دا ءتىزىمىن كوردىك. سول توعىزدىڭ باسىندا ساۋىتبەك ءابدىراحمانوۆ اعامىز تۇر.

جاسىرماي-اق ايتايىن، ءماجىلىستىڭ وسى جولعى جەتىنشى شاقىرىلىمىندا شەتتەن ورالعان قانداستارىمىزدان دا ءبىر-ەكى دەپۋتات بولسا ەكەن دەپ قاتتى ۇمىتتەندىك. وكىنىشكە قاراي، «اۋىل» پارتياسىنان وزگە پراتيالار ۇسىنعان كانديداتتاردىڭ قاتارىنان ءبىر دە-ءبىر قانداسىمىزدىڭ ەسىمىن كەزدەستىرە المادىق. ىشىمىزدەن سول «اۋىل» پارتياسىنان ۇسىنىلعان ايتىسكەر اقىن داۋلەتكەرەي كاپۇلى باۋىرىمىزدىڭ تىلەۋىن تىلەپ وتىرمىز. بىراق، داۋلەتكەرەيدىڭ دەپۋتات بولار بولماسى بۇلىڭعىر.

بىرىنشىدەن، «اۋىل» پارتياسىنىڭ پارلامەنتكە وتەر-وتپەسىن ەشكىم كەسىپ ايتا المايدى. ەكىنشىدەن، «نۇر-وتان» تاراپىنان ايتىستىڭ تاعى ءبىر اقتاڭگەرى، حالقىمىزدىڭ اياۋلى ازاماتى امانجول التاەۆ ۇسىنىلىپتى. الدا-جالدا بىرەۋ-مىرەۋ: «ءماجىلىس نە، ايتىس وتكىزە مە؟ ەكى ايتىسكەردىڭ بىرەۋى دەپۋتات بولسىن» دەپ قالسا، امانجولدىڭ ءوتىپ كەتۋى بەك مۇمكىن.

بيلىك وتە جاقسى بىلەدى، تاۋەلسىز قازاقستاننىڭ تاريحىندا شۋى مەن داۋ-دامايى كوپ سالانىڭ ءبىرى – كوشى-قون بولدى. ماجىلىستە وسى سالانىڭ ماسەلەلەرىن جاقسى بىلەتىن مامان دەپۋتات بولماعاندىقتان، زاڭدار دۇرىس قابىلدانباي، سونىڭ كەسىرىنەن قانداستارىمىز ابدەن زارداپ شەكتى. سوڭعى بەس جىلدىڭ كولەمىندە ءوزىمىز بەل شەشىپ كىرىسىپ ەدىك، بەتى بەرى قاراعانداي بولدى. بىراق، بۇتىندەيتىن جاماۋ جىرتىعى ءالى جەتىپ ارتىلادى.

ءسويتىپ، پارتيالاردان بولەك، وسى قازاقستان حالقى اسسامبلەياسىنان سايلاناتىن توعىز ورىننىڭ ءبىرى قانداستارىمىزعا بۇيىراتىن شىعار دەپ ويلاعانبىز. ءتىپتى، ءبىراز ارەكەتتەر دە جاساپ كورگەنبىز. جولىمىز بولمادى، ساۋىتبەك اعام تاعى كەلىپ، جايعاسىپ الىپتى.

سوڭعى مالىمەتكە قاراعاندا، جالپى 1991 جىلدان بەرى رەسپۋبليكاعا 1 ميلليون 69 مىڭ ەتنيكالىق قازاق كوشىپ كەلىپتى. سونىڭ 10 پايىزى جوعارى ءبىلىمدى ازاماتتار. بىلايشا ايتقاندا، ءبىر ۇلكەن الەۋمەتتىك توپ. سوندا سولاردىڭ ىشىنەن ءبىر لايىقتى دەپۋتات شىقپاي ما؟ ارينە، شىعادى. قانداستارىمىزدىڭ دا پرەزيدەنتتىڭ ساياساتىن قولداپ، مەملەكەت ءىسىنىڭ ءبىر جاعىنان شىققىسى كەلەدى.

شەتتەن ورالعان اعايىندارىمىز شەكارادان ءوتىپ، قۇجاتتانىپ، قاشان جاڭا ورتاعا ءسىڭىسىپ بولعانشا، «قانداس» دەگەن مارتەبەمەن ءبىر ۇلكەن الەۋمەتتىك توپ رەتىندە قارالادى. ولاردىڭ جاعدايىن قانىق بىلەتىن، ءتىلىن تابا الاتىن لاۋازىمدى تۇلعالار ۇكىمەتتە دە، زاڭ شىعارۋشى ورگاندا دا بولعانى ءجون.

بىراق، بۇل ماسەلە ءومىرى ەسكەرىلمەي كەلەدى.

قاراپ وتىرساق، تاۋەلسىز قازاقستان پارلامەنتىنىڭ تاريحىندا شەتتەن كەلگەن قانداستارىمىزدان بىردە-ءبىر ءماجىلىس دەپۋتاتى بولماپتى.

قازىر قانداستارىمىزدىڭ شەتەلدەگى ساياسي قىسىم مەن پاندەمياعا بايلانىستى، ءبىر-بىرىنەن ءبولىنىپ، ساعىنىڭ سىنىپ، جىگەرىنىڭ قۇم بولىپ تۇرعان شاعى. 

ولاردىڭ دا كوڭىلىنە قاراپ، تىلەگىن ەسكەرىپ قويعان ارتىقتىق ەتپەيدى. 

ازداعان كوزقاراسىمىزداعى ايىرماشىلىقتارعا قاراماستان، ءوز باسىم ساۋىتبەك ابدىراحمانوۆتى ىشتەي قاتتى سىيلايمىن. وتە تالانتتى قالامگەر. تاۋەلسىز قازاقستاننىڭ ىرگەتاسىن قالعان اعا بۋىننىڭ وكشەسىن باسىپ كەلە جاتقان تۇلعا رەتىندە ەڭبەگىن دە باعالايمىن. مىنە، سول ەڭبەگى ەسكەرىلىپ، بيىل پرەزيدەنت قاسىم-جومارت توقاەۆتىڭ قولىنان مەملەكەتتىك سىيلىق الدى. داۋ جوق، ول – بۇل ماراپاتقا لايىق قالامگەر. قۇتتى بولسىن ايتام.

ماجىلىستەگى جۇمىس توبىنا قاتىسىپ ءجۇرىپ، ساۋكەڭمەن ءبىر-ەكى تالقىدا بىرگە بولىپ تا قالدىق. زاڭ جوباسى قىپ-قىزىل تالقىعا ءتۇسىپ جاتقاندا سۋىرىلىپ شىعىپ، ۇسىنىس بەرگەنىن كورمەدىم.

سوسىن قىتايدان قاشىپ كەلگەن ازاماتتار «بوسقىن» مارتەبەسىن الا الماي، سوتقا تارتىلىپ جاتقاندا، «بوسقىندار تۋرالى» زاڭعا تولىقتىرۋ ەنگىزۋ ءۇشىن، ساۋكەڭ باستاعان ءبىر توپ دەپۋتاتقا حات جازىپ، ۇسىنىس تا بەردىم. سوڭى ءساتسىز اياقتالدى. اعامىز ءشوپ باسىن سىندىرعان جوق، وزگەگە سىلتەي سالدى.

«قازاقستان حالقى اسسامبلەياسى تۋرالى» قازاقستان رەسپۋبليكاسىنىڭ 2008 جىلعى 20 قازانداعى N70-IV زاڭىنىڭ 6-بابىندا: 

قازاقستان حالقى اسسامبلەياسىنا دەموگرافيا جانە كوشى-قون سالاسىنداعى جوسپارلار مەن ءىس-شارالاردى ازىرلەۋگە جانە ىسكە اسىرۋعا قاتىسۋدى جانە شەت ەلدەردەگى قازاق دياسپوراسىنا انا ءتىلىن، مادەنيەتى مەن ۇلتتىق داستۇرلەرىن ساقتاۋ جانە دامىتۋ، ونىڭ تاريحي وتانىمەن بايلانىستارىن نىعايتۋ ماسەلەلەرىندە قولداۋ كورسەتۋدى ءوز قىزمەتىنىڭ نەگىزگى باعىتتارىنىڭ ءبىرى رەتىندە مىندەتتەمەلەر جۇكتەلگەن.

دەمەك، كوشى-قون مەن اسسامبلەيانىڭ قابىسىپ جاتقان وسىنداي ورتاق ماقساتى بار...

ساۋىتبەك اعا ات ۇستىنەن تۇسپەگەن ازامات. «ەگەمەن قازاقستان» گازەتىنىڭ باسشىسى مىندەتىنەن بوساعان سوڭ، اسسامبلەيادان ءبىر كەزەك دەپۋتات بولدى. ءجون دەلىك. مىنە، جاس بولسا زەينەتكەرلىكتەن باياعىدا اسىپ كەتتى. جاڭا جىل تۋسا، جەتپىس جاس كۇلىپ تۇر. «ساۋكە، كەلشى، دەپۋتات بولشى!» دەپ، شاقىرىپ تۇرعان ءماجىلىس جوق ەكەنى بەس قولدىڭ سالاسىنداي بەلگىلى. ەندى دەپۋتاتتىق مانداتتى ءىنى-قارىنداستارىنىڭ، ناقتىلاپ ايتسام، قانداستارىنىڭ بىرەۋىنە بەرىپ، دەم العانى، جازىلماي جاتقان دۇنيەلەرىن قاعاز بەتىنە تۇسىرۋمەن اينالىسقانى ءجون ەدى...

اۋىت مۇقيبەك،

قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى

Abai.kz