بۇگىن ءماجىلىستىڭ جەتىنشى شاقىرىلىمى ءوز جۇمىسىن باستادى. ماجىلىسكە جاڭا كىرگەن دەپۋتاتتار كونستيتۋتسيانى ۇستاپ تۇراپ، قازاقستان حالقىنا ادال قىزمەت ەتۋگە انت بەردى.

«قر پارلامەنتى جانە ونىڭ دەپۋتاتتارىنىڭ مارتەبەسى» تۋرالى كونستيتۋتسيالىق زاڭىنىڭ 6-بابى، 3-تارماعىنا سايكەس، ءماجىلىس توراعاسى سايلانعانعا دەيىن، توراعالىقتى قر ورتالىق سايلاۋ كوميسسياسىنىڭ توراعاسى اتقارادى. سوعان سايكەس، قر وسك توراعاسى بەرىك يماشەۆ بۇگىن جاڭا سايلانعان دەپۋتاتتاردان انت قابىلدادى.

انت قابىلداۋ ءراسىمىن باستاۋ ءۇشىن جاڭا دەپۋتاتتار داۋىس بەردى. قاتىسىپ وتىرعاندارى 94 ەكەن. ونىڭ بىرەۋى الدەقانداي سەبەپپەن داۋىس بەرمەپتى.

سونىمەن، سۋ جاڭا سايلانعاندار نە دەپ انت بەردى، قاي تىلدە سويلەدى؟ قاراڭىز:

انت ءماتىنى:

«قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تاۋەلسىزدىگى مەن تۇتاستىعىن نىعايتۋعا، ونىڭ كونستيتۋتسياسى مەن زاڭدارىنا قاتاڭ باعىنۋعا، دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن!».

وسى ءبىر از عانا سويلەمدى بۇگىن جاپ-جاڭا دەپۋتاتتار ءارتۇرلى ايتتى. دەپۋتاتتاردىڭ توعىزى ورىس تىلىندە انت بەرسە، قالعاندارى قازاقشا سويلەدى. راس، بىرەۋلەرى 26 سوزدەن تۇراتىن انت ءماتىنىن ەجىكتەپ، ارەڭ وقىپ تۇردى. ەندى بىرەۋلەرى سوزدەن سۇرىنگەن وزدەرىنە وزدەرى كۇلىپ تۇردى. ال ەندى بىرەۋلەرى الدارىنداعى از عانا ءماتىندى (انتتى) جاتقا ايتۋعا تىرىستى.

جاڭا دەپۋتاتتاردىڭ دەنى قازاق تىلىندە تازا سويلەي الماعانىنان وزگە ماسقارالىق بولعان جوق. تەك... تەك بۋلاروۆ يلياس دەگەن ازامات قانا ەكى مارتە انت بەردى.

اۋەلدە مىنبەرگە شىققان بۋلاروۆ: «قازاقستان حالقى... ادال... قىزمەت ەتۋگە، قازاقستان رەسپۋبليكاسى تۇتاستىعى مەن تاۋەلسىزدىگىن نىعايتۋعا، ونىن كونستيتۋتسياسى مەن زاندارىنا قاتان باعىنۋعا، دەپۋتاتىن وزىمە مارتەبەلى مىندەتەرىن ادال اتقارۋعا انت بەرەمىن...»، - دەپ مىنبەردەن تۇسە بەرىپ ەدى. توراعا يماشەۆ: «قايتادان ايتىپ جىبەرىڭىز، اسىقپاي...»,- دەپ قايتا انت قابىلداتقىزدى.

سوسىن ول: «قازاقستان حالقىنا ادال قىزمەت ەتۋگە، قر تۇتاستىعى مەن تاۋەلسىزدىگىن نىعايتۋعا، ونىن كونستيتۋتسياسى مەن زاڭدارىنا قاتاڭ باتۋعا، باعىنۋعا، دەپۋتاتتىن وزىمە جۇكتەلگەن مارتەبەلى مىندەتەرىن ادال اتقارۋعا انت بەرە، وتەمىن»، - دەپ ءتۇستى. ماتىندەگى قاتەلەردى انت بەرۋشىڭ ءوز اۋزىنان قالاي ەستىدىك، سولاي قالدىردىق.

(بۋلاروۆ كونستيتۋتسياعا قول قويعان جوق)

(ەكىنشى جولى قول قويدى)

بۋلاروۆتىڭ ەكىنشى مارتە انت بەرۋىنىڭ سەبەبى بۇل دا ەمەس ەدى. العاش انت بەرگەندە بۋلاروۆ مىرزا كونستيتۋتسياعا قولىن قويماپتى. ايتپاقشى، وسى بۋلاروۆ ءوزى انت بەرەردەن از بۇرىن ۇستەلىنىڭ استىنان انت ءماتىنىن قايتالاپ وتىرعان ەدى.

ال قازاقستاننىڭ نەگىزگى زاڭ شىعارۋشى ورگانى سانالاتىن ءماجىلىس مىنبەرىنەن قازاقستان حالقىنا ورىسشا انت بەرگەندەر كىمدەر؟ قاراڭىز:

اميرحانيان اۆەتيك رۋبەنوۆيچ – قحا مۇشەسى.

كولودا دميتري ۆلاديميروۆيچ – نۇر وتان مۇشەسى.

لي يۋري ۆيسساريونوۆيچ – قحا مۇشەسى.

ليننيك اندرەي – اق جول مۇشەسى.

وسين شاميل ابزالەتدينوۆيچ – قحا مۇشەسى.

پاۆلوۆەتس لاريسا پاۆلوۆنا – نۇر وتان مۇشەسى.

پانچەنكو يگور يۆانوۆيچ – نۇر وتان مۇشەسى.

رشەتنيكوۆ سەرگەي - قحپ مۇشەسى.

سمىشلياەۆا ەكاتەرينا ۆاسيلەۆنا – نۇر وتان مۇشەسى.

ايتپاقشى، بۇگىن پارلامەنت ءماجىلىسىنىڭ جالپى وتىرىسىندا نۇرلان نىعماتۋلين ءماجىلىس توراعاسى لاۋازىمىنا سايلاندى.

تاقىرىپقا تۇزدىق رەتىندە ايتا كەەتيىك، وسىعان دەيىن ءبىز: «تاۋەلسىز قازاقستاننىڭ پارلامەنتى قازاق ءتىلدى، ياعني مەملەكەتتىك تىلدە سويلەيتىن پارلامەنت بولۋى كەرەك! بۇل قازاقستان حالقىنىڭ 80 پايىزدان استامىن قۇرايتىن، مەملەكەتتى قۇرۋشى ۇلتتىڭ تالابى»، - دەپ جازدىق.

بۇگىن جاڭا دەپۋتاتتاردىڭ دەنى مەملەكەتتىك تىلدە، قازاق تىلىندە انت بەردى. ولاردىڭ اراسىندا ءابىلپاز حامەدوۆ، ۆاكيل نابيەۆ، ناتاليا دەمەنتەۆا، يلياس بۋلاروۆ سەكىلدى وزگە ۇلت وكىلدەرى دە قازاقشاعا تىلدەرىن بۇرادى. ال كەيبىرەۋلەرى (جوعارىداعى توعىزى) قازاقستاننىڭ ەڭ باستى زاڭ شىعارۋشى ورگانىنىڭ مىنبەرىنەن وزگە ەلدىڭ مەملەكەتتىك تىلىندە، ورىس تىلىندە قازاقستان حالقىنا انت بەردى.

بىزدەگى جالقى سۇراق - ورىسشا انت بەرگەندەر قازاقستان حالقىنا، قازاق حالقىنا ادال قىزمەت ەتە مە؟

نۇرگەلدى ابدىعانيۇلى

Abai.kz