بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسى بولىپ اسقار مامين بەكىتىلدى. جيىندا ونىڭ كانديداتۋراسىن  پرەزيدەنت قاسىم-جومارت توقاەۆ ۇسىنعان.

ال، كەشە ەكس-پرەزيدەنت نۇرسۇلتان نازارباەۆ تا «Nur Otan» پارتياسى فراكتسياسىنىڭ وتىرىسىندا ۇكىمەت باسشىسى لاۋازىمىنا مامين لايىق دەگەن ەدى.

«مەنىڭ ويىمشا، ساباقتاستىقتى ساقتاۋ كەرەك. بارلىق قيىندىققا قاراماستان، ۇكىمەت ءوز جۇمىسىن جاقسى اتقاردى. باسقا ەلدەرگە قاراعاندا ءبىز جامان ناتيجە كورسەتكەن جوقپىز. ەگەر پرەزيدەنت اسقار ۇزاقبايۇلى ءماميندى ۇسىنسا، وندا مەن فراكتسيادان ونىڭ كانديداتۋراسىن قولداۋدى سۇرايمىن»، - دەدى نازارباەۆ.

الايدا بۇگىن ءماميننىڭ كانديداتۋراسىن ءماجىلىس دەپۋتاتتارىنىڭ بارلىعى قولداعان جوق. ناقتىراق ايتساق، قازاقستان حالىق پارتياسى فراكتسياسىنىڭ 21 دەپۋتاتى مامينگە داۋىس بەرۋ كەزىندە قالىس قالعان. ءسويتىپ، وعان 99 دەپۋتاتتىڭ 78-ءى داۋىس بەرگەن.

ال، قحپ نىڭ توراعاسى ايقىن قوڭىروۆ پرەزيدەنت توقاەۆقا بيلىك وكىلدەرى جۇمىسىنا سالعىرت قارايتىنىن ايتىپتى.

«قازاقستان حالىق پارتياسىنىڭ فراكتسياسى ءسىزدىڭ مينيسترلەر كابينەتىن ساقتاۋ تۋرالى شەشىمىڭىزدى تۇسىنەدى...

الايدا، ءبىز سايلاۋ كەزىندە سايلاۋشىلارمەن كەزدەستىك. كەزدەسۋلەردە ازاماتتار ۇكىمەت پەن جەرگىلىكتى اتقارۋشى بيلىك ءوز جۇمىسىنا سالعىرت قارايتىنىنا شاعىمداندى. ازاماتتاردىڭ ماسەلەلەرى ولاردىڭ جالعان ەسەپتەرىنىڭ ارتىندا قالادى. مينيسترلەر مەن كەيبىر اكىمدەر حالىقتان الشاق. بۇل تۇسىنىسپەۋشىلىككە، كەيبىر جاعدايلاردا ازاماتتاردىڭ قارسىلىعىنا، الەۋمەتتىك شيەلەنىستىڭ كۇشەيۋىنە اكەلەدى»،- دەدى قوڭىروۆ. 

ايتا كەتەيىك، بۇعان دەيىن قحپ پارتياسىنىڭ دەپۋتاتى يرينا سميرنوۆا «پرەمەر-مينيستر ءبىزدىڭ پارتيادان تاعايىندالسا» دەگەن ءۇمىتىن ايتىپ قالعان.

«ءبىر ورىننان ەكىنشى ورىنعا اۋىسىپ جۇرە بەرەتىن ادامداردان ارىلۋ قاجەت. ۇكىمەتكە كىمدەر ەنەدى دەگەن سۇراقتى توتەسىنەن قويۋ كەرەك! ۇكىمەتتە ۇزاق جىلدان بەرى جۇرگەن ادامداردى شىنىمەن جۇمىس ىستەگىسى كەلەتىن جاندارمەن الماستىرۋ كەرەك»,- دەپتى سميرنوۆا.

Abai.kz