وسىدان ەكى-ءۇش جىل بۇرىن قازاقستان سۋيتسيد جاساۋشىلار سانى جاعىنان الەمدە العاشقى بەستىككە كىرەتىنى تۋرالى اقپارات جاريالاندى. ونى جاريالاعان دۇنيەجۇزىلىك دەنساۋلىق ساقتاۋ ۇيىمى. ال 2019 جىلى ەلىمىز ورتالىق ازيا مەملەكەتتەرى اراسىندا سۋيتسيدتان ءبىرىنشى ورىندا تۇر دەگەن دەرەك شىقتى. ساراپشىلار: «ءسۋيتسيدتىڭ دەڭگەيى وتكەن جىلدارمەن سالىستىرعاندا ازايىپ كەلە جاتىر»، - دەگەنىمەن، قازاقستان سۋيتسيد جاساۋشىلار سانى جاعىنان الەمدىك ءتىزىمنىڭ الدىڭعى قاتارىنان تۇسكەن جوق. وتكەن جىلى ەلىمىزدە سۋيتسيدتىڭ 3,5 مىڭنان اسا فاكتىسى تىركەلگەن ەكەن. ال سۋيتسيد جاساۋعا تالپىنۋ فاكتىسى 5 مىڭعا جۋىقتاعان. بۇگىن وسى مالەسەنى ماجىلىستە ءبىر توپ دەپۋتات كوتەرىپ، ۇكىمەت باسشىسى اسقار ءماميننىڭ اتىنا دەپۋتاتتىق ساۋال جولداپتى. دابىل قاعىپتى. مىنە، قاراڭىز:

دەپۋتاتتىق ساۋال

ءبىزدىڭ دەپۋتاتتىق ساۋال
قازاقستان رەسپۋبليكاسى
پرەمەر-ءمينيسترى
اسقار مامينگە جولدانادى!

قازاقستان رەسپۋبليكاسىنىڭ باستى قۇندىلىعى ادام جانە ادامنىڭ ءومىرى.

وسى تۇرعىدا، «Nur-Otan» پارتياسىنىڭ سايلاۋالدى باعدارلاماسىندا «وتباسىن قولداۋ جانە نىعايتۋ – ەلىمىزدىڭ تابىستى دامۋىنىڭ كەپىلى»، دەپ ايقىندالعان.

وكىنىشكە وراي، قازاقستان تورتكۇل دۇنيەدە سۋيتسيدتەن الدىڭعى قاتارلاردىڭ بىرىندە!

رەسمي مالىمەتتەرگە سۇيەنسەك، 2020 جىلى 3526 سۋيتسيد جاعدايلارى تىركەلگەن، ونىڭ ىشىندە 144-ءى جاسوسپىرىمدەر. سونىمەن قاتار، وسى ءبىر جىلدا، 4855 ءوز-وزىنە قول جۇمساۋعا تالپىنۋ جاعدايلارى تىركەلگەن.

بۇل ماسەلەنىڭ ۋشىعىپ كەتۋىنىڭ سەبەبى، ەلىمىزدىڭد جانۇيا ينستيتۋتى سىرتتان قيامەت-قايىم قىسىمعا ۇشىراۋدا!

اتالعان پروبلەما قازاقستاننىڭ ەڭ باستى گۋمانيتارلىق ماسەلەسى دەڭگەيىنە كوتەرىلۋدە.

ۇكىمەتتەگى مينيسترلىكتەر، اتاپ ايتقاندا قر ءبىلىم جانە عىلىم مينيسترلىگى، قر ەڭبەك جانە حالىقتى الەۋمەتتىك قورعاۋ، قر اقپارات جانە قوعامدىق دامۋ مينيسترلىگى، قر ىشكى ىستەر مينيسترلىگى ۆەدومستۆوارالىق ءوزارا ۇيلەستىرۋدى كۇشەيتۋ جانە جاۋاپكەرشىلىكتى ارتتىرۋ ارقىلى اتالعان سۇراقتىڭ وڭتايلى شەشىمىنە قول جەتكىزۋ ءتيىس دەپ ەسەپتەيمىز.

بۇگىندە، جاھاندانۋ پروتسەستەرىنەن تۋىنداعان اقپاراتتار لەگىنىڭ ەسەلەپ وسۋىنە بايلانىستى، حالقىمىزدىڭ رۋحاني كودىن ساقتاۋ، بالا تاربيەلەۋدىڭ ۇلتتىق فورماتى دەفورماتسياعا ۇشىراپ بارادى.

ادامدى، ءداستۇرلى جانۇيا ينستيتۋتىن قورعايتىن ۋاقىت جەتتى. بۇل كەزەك كۇتتىرمەيتىن ماڭىزدى ماسەلە!

سوندىقتان، ۇكىمەت «Nur-Otan» پارتياسىنىڭ سايلاۋالدى باعدارلاماسىنىڭ «باقىتتى وتباسى» پۋنكتىن ءىس-جۇزىنە اسىرعان كەزدە مىنا ماسەلەگە تەرەڭ نازار اۋدارۋى قاجەت!

1. جاسوسپىرىمدەر اراسىنداعى ءسۋيتسيدتىڭ الدىن-الۋ جانە بولدىرماۋدىڭ كەشەندى جۇيەسىن قالىپتاستىرۋ وتە ماڭىزدى!

2. ازاماتتارعا كەشەندى پسيحولوگيالىق كومەك كورسەتۋ تەتىگىن جاقسارتۋ، سونىمەن بىرگە، اتا-انالارعا قۇقىقتىق، رۋحاني، ادىستەمەلىك قولداۋ كورسەتەتىن «جانۇيانى قولداۋ ورتالىقتارى» ينستيتۋتىن قۇرا وتىرىپ، اتا-انانى قولداۋ تەتىكتەرىن قاراستىرۋ وتە وزەكتى!

بۇل رەتتە بالالاردى قازىرگى ۋاقىتتىڭ تالابىنا ساي تەحنولوگيالىق باعىتقا ەرەكشە دەن قويا وتىرىپ، ۇلتتىق ءداستۇرلى قۇندىلىقتار اياسىندا وقۋشىلاردىڭ ادامگەرشىلىگى مەن مورالدىك كەلبەتىن قالىپتاستىرا وتىرىپ تاربيەلەۋ، بالالار مەن اتا-انالارعا قيىن جولدان بىرلەسىپ شىعۋعا جول كورسەتۋ ماسەلەسى الدىڭعى قاتاردا بولۋى قاجەت.

3. ازاماتتاردىڭ ءوزىنىڭ اتا-انالىق ميسسياسىن تولىققاندى ورىنداۋىنا جاعداي جاساۋ ماقساتىندا ەڭبەك كودەكسىنىڭ باپتارى ناقتى ورىندالۋى باستى مىندەت!

مەملەكەتتىك قىزمەتتەگى، ءىرى كاسىپورىنداردا ەڭبەك ەتەتىن اتا-انالار كەشكى 18:00-دە جۇمىستا قالماۋى قاجەت!

اتا-انالاردىڭ بالا تاربيەلەۋگە ۋاقىتى، جاۋاپكەرشىلىگى جانە قاۋقارى بولۋى ءتيىس!

4. پەداگوگتاردىڭ جانە اتا-انانىڭ بالاباقشا، مەكتەپ جاسىنداعى بالالاردى ۇلتتىق قۇندىلىق اياسىندا تاربيەلەۋ فۋنكتسياسىن كەڭەيتكەن ابزال. وسى ورايدا، بالالاردى تاربيەلەۋدەگى مەكتەپ پەن اتا-انالاردىڭ بىرلەسكەن جاۋاپكەرشىلىگىن ارتتىراتىن جاڭا فورماتقا كوشۋ وتە ماڭىزدى.

5. پسيحولوگيا سالاسىندا مەكتەپكە دەيىنگى، مەكتەپ كەزەڭىندەگى ادىستەمەلىك قۇرالدار مەن وقۋلىقتارعا ادامنىڭ ءومىر ءسۇرۋ فيلوسوفياسى، گۋمانيستىك قۇندىلىقتاردىڭ ماڭىزى تۋرالى اقپارات ەنگىزۋ، اتا-انالاردىڭ بالا تاعدىرىنداعى اسا ماڭىزدى ءرولىن ارتتىرۋ وزەكتى. پسيحولوگتاردىڭ كاسىبي دايىندىعىنىڭ ءبىلىم بەرۋ باعدارلامالارىنىڭ مازمۇنىن جەتىلدىرۋ قاجەت.

6. قر ءبىلىم جانە عىلىم مينيسترلىگى بالالاردىڭ دۇرىس جانە تۇراقتى پسيحوەموتسيونالدىق جان-جاقتى دامۋىنىڭ مازمۇندى بىرىڭعاي باعدارلامالارىن ازىرلەۋىن قولعا العانى ابزال.

7. جۇمىس ىستەپ تۇرعان كەشەندى پسيحولوگيالىق قىزمەتتەردىڭ تيىمدىلىگىن ارتتىرىپ، ولاردىڭ جۇمىسىنا قوعامدىق مونيتورينگ جاساي وتىرىپ، باعىت-باعدارىن كەڭ اۋقىمدى قوعام باقىلاۋىندا ۇستاعان ءجون.

8. مەكتەپتەردە اتا-انالار، مۇعالىمدەرمەن بىرلەسە وتىرىپ، «زورلىق-زومبىلىققا توزىمسىزدىك» ەتيكاسىن ەنگىزۋ، بالاباقشادا، كىشى سىنىپتاردا بۋللينگپەن كۇرەسۋ باعدارلاماسىن ەنگىزۋ كەزەك كۇتتىرمەيتىن ماسەلە! ءبىلىم بەرۋ سالاسىندا پسيحولوگتاردىڭ شتاتىن كوبەيتۋدى ۇسىنامىز!

9. الەۋمەتتىك جەلىدە جاسوسپىرىمدەردى سۋيتسيدكە يتەرمەلەيتىن اقپاراتتى تەجەۋدىڭ ۇتىمدى تەتىگىن قالىپتاستىرۋ، تاۋەكەلى جوعارى بالالارعا الدىن-الۋ ءىس-شارالارىن جاساۋدىڭ پراكتيكاسىن ەنگىزۋ تەتىگىن قاراستىرۋ وزەكتى!

ءبىزدىڭ ادامداردىڭ ءومىرى، بالالارىمىزدىڭ جارقىن بولاشاعى ەڭ باستى اسپەكت، مەملەكەت ادامنىڭ ءومىرىن ساقتاۋ ءۇشىن بارلىق مۇمكىندىكتى پايدالانۋى قاجەت!

وسى ماسەلەلەردى قاراپ، ناقتى شەشىمدەر قابىلداپ، قاراۋ ناتيجەسىن زاڭدا كورسەتىلگەن مەرزىمدە حابارلاۋىڭىزدى سۇرايمىز.

قۇرمەتپەن، ءماجىلىس دەپۋتاتتارى،

«Nur Otan» پارتياسى فراكتسياسىنىڭ مۇشەلەرى:

ەرلان سايروۆ،

جۇلدىز سۇلەيمەنوۆا،

ەلنۇر بەيسەنباەۆ.

Abai.kz