سەيسەنبى, 20 ءساۋىر 2021
دەپ جاتىر 4342 6 پىكىر 28 قاڭتار, 2021 ساعات 14:47

جاپاروۆتى قۇتتىقتاۋعا ەكس-پرەزيدەنتتىڭ وكىلى باردى

بۇگىن قىرعىزستاننىڭ جاڭادان سايلانعان پرەزيدەنتى سادىر جاپاروۆتىڭ ۇلىقتاۋ ءراسىمى ءوتتى. وندا قىرعىز پرەزيدەنتى انت بەرىپ، رەسمي تۇردە قىزمەتىنە كىرىستى.

شاراعا مىڭنان استام قوناق شاقىرىلعان. ولاردىڭ قاتارىندا قاراپايىم ازاماتتار، قوعام قايراتكەرلەرى، عالىمدار مەن زيالى قاۋىم وكىلدەرى، وتاندىق جانە شەتەلدىك باق باسشىلارى بار.

سونىمەن قاتار يناۋگۋراتسياعا بۇرىنعى پرەزيدەنتتەر سوورونباي جەەنبەكوۆ پەن روزا وتۋنباەۆا دا قاتىسقان. ۇلىقتاۋ راسىمىندە وسك ءتورايىمى نۇرجان شايلدابەكوۆا سايلاۋ قورىتىندىلارىن جاريالاپ، سادىر جاپاروۆقا پرەزيدەنتتىك توسبەلگى مەن ەتالون تاپسىردى.

ال، جاپاروۆتىڭ يناۋگراتسياسىنا قازاقستاننان ەكس-پرەزيدەنت ن.نازارباەۆتىڭ ارنايى وكىلى، قحا توراعاسى جانسەيىت تۇيمەباەۆ باردى.

جانسەيىت تۇيمەباەۆ جاڭا قىزمەتكە كەلدى - قازاقستان جاڭالىقتارى | STAN.KZ

ول قازاقستان حالقى مەن ونىڭ تۇڭعىش پرەزيدەنتى ن.نازارباەۆتىڭ اتىنان قىرعىز پرەزيدەنتىن ارنايى قۇتتىقتاپ، قىزمەتىنە تابىس تىلەپتى.

«قۇرمەتتى سادىر نۇرعوجاەۆيچ، قادىرلى قىرعىز حالقى، باۋىرلارىمىز! ءسىزدى بۇگىنگى قىرعىز رەسپۋبليكاسى پرەزيدەنتىنىڭ لاۋازىمىنا كىرىسۋىڭىزبەن، وسى ۇلكەن شارامەن توسكەيدە مالى، توسەكتە باسى قوسىلعان، اۋىلى ارالاس، قويى قورالاس، وزدەرىڭىزگە ەڭ جاقىن قازاقستان حالقىنىڭ اتىنان، ونىڭ تۇڭعىش پرەزيدەنتى، ەلباسىمىز نۇرسۇلتان ءابىشۇلى نازارباەۆتىڭ اتىنان وسى قۇتتىقتاۋدى وقۋعا رۇقسات ەتىڭىزدەر. 

جوعارى مارتەبەلى سادىر جاپار مىرزاعا! 

قۇرمەتتى سادىر نۇرعوجاەۆيچ، قىرعىز رەسپۋبليكاسىنىڭ پرەزيدەنتى لاۋازىمىنا كىرىسۋىڭىزبەن ءسىزدى شىن جۇرەكتەن قۇتتىقتايمىن! ەلىڭىزدىڭ جارقىن بولاشاعى مەن مۇددەسى جولىنداعى جاۋاپتى جۇمىسىڭىز مەملەكەتىڭىزدىڭ تۇتاستىعىن نىعايتۋعا جانە حالىقارالىق ارەناداعى بەدەلىن اسقاقتاتۋعا باعىتتالعان ىستەرىڭىزدىڭ تابىستى بولۋىنا تىلەكتەسپىن. 

قازاقستان جانە قىرعىزستان اراسىنداعى دوستىققا، تاتۋ كورشىلىككە جانە ستراتەگيالىق سەرىكتەستىككە نەگىزدەلگەن ىنتىماقتاستىق جاڭا ساپالى دەڭگەيگە كوتەرىلىپ، حالىقتارىمىزدىڭ يگىلىگى ءۇشىن بۇدان ءارى نىعايا بەرەتىنىنە ۇمىتتەنەمىن.

وسى ورايلى ءساتتى پايدالانا وتىرىپ، قۇرمەتتى سادىر نۇرعوجاەۆيچ، سىزگە زور دەنساۋلىق جانە جاۋاپتى قىزمەتىڭىزگە تولايىم تابىس، ال، باۋىرلاس قىرعىز حالقىنا قۇت-بەرەكە مەن وركەندەۋ تىلەيمىن!

ىزگى نيەتپەن نۇرسۇلتان نازارباەۆ، قازاقستان رەسپۋبليكاسىنىڭ تۇڭعىش پرەزيدەنتى، ەلباسى»,- دەدى تۇيمەباەۆ.

سادىر جاپاروۆ سلوجيل پولنوموچيا ي. و. پرەزيدەنتا كىرگىزستانا

ايتا كەتەيىك، 10 قاڭتار كۇنى قىرعىزستاندا مەرزىمىنەن بۇرىن پرەزيدەنت سايلاۋى ءوتتى. سايلاۋ قورىتىندىلارى بويىنشا 79,2 پايىز داۋىس جيناعان سادىر جاپاروۆ جەڭىسكە جەتتى.

سادىر جاپاروۆ قازاق حالقىنا العىس ايتتى

ال، 11 قاڭتار كۇنى قازاقستان پرەزيدەنتى قاسىم-جومارت توقاەۆ قىرعىز رەسپۋبليكاسىنىڭ جاڭادان سايلانعان پرەزيدەنتى سادىر جاپاروۆتى سايلاۋداعى جەڭىسىمەن قۇتتىقتاپ، تەلەفون ارقىلى سويلەستى.

سونداي-اق، قاسىم-جومارت توقاەۆ سادىر جاپاروۆتى قازاقستانعا رەسمي ساپارمەن كەلۋگە شاقىردى. قىرعىز باسشىسى شاقىرۋدى قابىل الىپ، پرەزيدەنت رەتىندەگى ءبىرىنشى ساپارىن قازاقستاننان باستايتىنىن ايتقان.

الايدا، جاپاروۆتىڭ ءباسپاسوز حاتشىسى گالينا بايتەرەك ونىڭ شەتەلگە  العاشقى ساپارى رەسەي فەدەراتسياسىنان باستالاتىنىن ايتقان. سونىمەن قاتار ول الەۋمەتتىك جەلىلەردە «رەسەي سادىر جاپاروۆتى قابىلداۋعا دايىن ەمەس»، دەگەن اقپاراتتىڭ جالعان ەكەنىنە توقتالدى.

«بۇل باعىتتاعى جۇمىستار قازىردىڭ وزىندە ءجۇرىپ جاتىر. الداعى ساپاردىڭ كۇندەرى مەن مازمۇنى رەسەيلىك تاراپپەن بىرگە پىسىقتالۋدا. «رەسەي سادىر جاپاروۆتى قابىلداۋعا دايىن ەمەس» دەگەن اقپارات شىندىققا سايكەس كەلمەيدى», - دەدى گالينا بايتەرەك.

جاپاروۆتىڭ رەسەيگە ساپارىن رەسپۋبليكا پرەمەر-ءمينيسترىنىڭ مىندەتىن اتقارۋشى راۆشان سابيروۆ تا مالىمدەگەن.

قىرعىز باسشىسىنىڭ ماسكەۋگە ساپارى قاي كۇنى ەكەنى ءالى ايتىلعان جوق جانە، دەلەگاتسيا قۇرامىنىڭ ماسكەۋمەن كەلىسسوزدەر تاقىرىبى دا ازىرگە بەلگىسىز.

نۇربيكە بەكسۇلتانقىزى

Abai.kz

6 پىكىر