بەيسەنبى, 22 ءساۋىر 2021
ايماق 6700 2 پىكىر 23 اقپان, 2021 ساعات 12:35

تورايعىر بالالارى توڭىپ ءجۇر

«قاراڭعى قازاق كوگىنە ورمەلەپ شىعىپ كۇن بولۋدى» اڭساعان اقىن ءىزباسارلارى قىستا ءبۇرىسىپ توڭىپ وتىرعانى جايلى نە بىلەمىز؟! باياناۋىل اۋدانىنداعى تورايعىر اۋىلىنىڭ تۇرعىندارى س.تورايعىروۆ اتىنداعى مەكتەپتىڭ شاعىن ورتالىعىندا تاربيەلەنىپ جاتقان بالالارىنىڭ دەنساۋلىعىنا الاڭداۋلى. ولار: «شاعىن ورتالىق ءىشى قىستا ازىناپ تۇرادى، اسىرەسە، ەدەنى تاستاي سۋىق»، - دەپ وتىر. 

اۋىل يمامى بەرىك قوجابەرگەنوۆ اۋىلدىڭ تۋمالارى مەن قازىرگى تۇرعىندارىنا WatsAAp جەلىسى ارقىلى وسى ماسەلە جونىندە دابىل قاعۋدا. يمامنىڭ ايتۋىنشا، تاياۋ كۇندەرى اۋىلدىڭ ءبىر توپ ازاماتى، سونىڭ ىشىندە كاسىپكەر باۋىرجان سەيىتوۆ، قابدىناسىر سۇلەيمەنوۆ جانە يمامنىڭ ءوزى دە بار، شاعىن ورتالىقتىڭ جاعدايىن كوزبەن كورىپ قايتىپتى. «مەكتەپتىڭ ءىشى قايناپ تۇر، ال شاعىن ورتالىقتاعى بالالاردىڭ اياقتارىنان سىز ءوتىپ، دەنساۋلىقتارىنىڭ بۇزىلعانىنا ەشكىم باسىن اۋىرتىپ وتىرعان جوق»، - دەيدى اۋىل ازاماتتارى.

ماسەلەنىڭ مانىسىنە كەلسەك، س.تورايعىروۆ اتىنداعى جالپى ءبىلىم بەرۋ مەكتەبى ەكى عيماراتتان تۇرادى. ونىڭ ءبىرى – شاعىن ورتالىق ورنالاسقان عيمارات كەڭەستىك كەزەڭنەن قالعان ەسكى ينتەرناتتان ورىن تەپكەن. عيماراتتىڭ جىلۋ جۇيەلەرىنىڭ توزىعى جەتكەن، ەشقاشان جوندەۋ كورمەگەن.

ءبىز مەكتەپ ديرەكتورى سايلاۋ توقتاسىنوۆقا حابارلاسىپ، ءمان-جايدى سۇراستىرىپ ەدىك، سايلاۋ ءساپيۇلى شاعىن ورتالىقتىڭ ويىن جانە جاتىن بولمەلەرىندەگى جىلۋ تەمپەراتۋراسى تالاپقا ساي، ياعني، 20-21 گرادۋس ەكەنىنە سەندىرىپ باقتى. سۋىقتىڭ ادام دەنەسىنە تاباننان وتەتىنى جانە «ەدەننىڭ سۋىعى» دەگەن جەكە پارامەتردىڭ جوقتىعى مەكتەپ باسشىسىن الاڭداتىپ تۇرماعانىن بايقادىق. دەسە دە ديرەكتور جىلۋ جەلىلەرىنىڭ توزىپ تۇرعانىن، قازاندىقتان شىققان جىلۋ مەكتەپ عيماراتىنان ءوتىپ، كونە ينتەرنات عيماراتىنا جەتكەنشە قۋاتى باسەڭدەيتىنىن مويىندادى. ال قازاندىقتىڭ جىلۋ جەلىلەرى 2016 جىلى جوندەۋدەن وتكەن كورىنەدى. 

اۋىل يمامى «تورايعىرلىق ازاماتتار قالتامىزدان اقشا شىعارىپ، جىلۋ جەلىلەرىن اۋىستىرۋعا اتسالىسايىق» دەگەن باستاما كوتەردى، الايدا جىلۋ جەلىلەرىن اۋىستىرۋ ارزان شارۋا ەمەس، وعان قىرۋار قارجى عانا ەمەس، ۋاقىت تا كەرەك. ال مەكتەپ ديرەكتورى بولسا ءبىلىم وشاعىن مەملەكەتتىك «اۋىل – ەل بەسىگى» باعدارلاماسىنا ەنگىزۋگە تىرىسىپ جاتقانىن ايتتى. الايدا مەكتەپ ول باعدارلاماعا ىلىگە مە، جوق پا -  ول ازىرگە بەلگىسىز. مەكتەپتى باعدارلاما تىزىمىنە الۋ – ءبىلىم جانە عىلىم مينيسترلىگىنىڭ قۇزىرىنداعى شارۋا. 

پاندەميا كەزىندە وقۋشىلاردىڭ دەنى ساباقتى ۇيىندە وقىپ وتىرعانى بەلگىلى. وسىنى پايدالانىپ مەكتەپ باسشىلىعىنا مەكتەپتىڭ ءبىر-ەكى سىنىبىنا شاعىن ورتالىق بالالارىن كوشىرە تۇرسا بولار ەدى عوي. ديرەكتوردىڭ ءوزى «قىس مەزگىلىندە ادەتتە 25 بالانىڭ 10 شاقتىسى عانا كەلەدى»، - دەدى ەمەس پە. ون بالاعا جىلى ورىن تاۋىپ بەرۋ سونشالىقتى قيىن با؟! 

بۇل ماسەلە بىرجاقتى بولعانشا اۋىلدىڭ قانشا بالاسى زارداپ شەگىپ ۇلگەرەر ەكەن؟! 

جانارگۇل قادىروۆا

Abai.kz

2 پىكىر