بەيسەنبى, 22 ءساۋىر 2021
قوعام 7719 6 پىكىر 23 اقپان, 2021 ساعات 15:07

يك - WU KANG. قازاقستاننىڭ بوياماسىز بەينەسى

جاستار اراسىندا «يرينا كايراتوۆنا» دەگەن اتپەن تانىمال توپ بار. ازامات ماركلەنوۆ، الديار جاپارحانوۆ سىندى ازاماتتاردان قۇرالعان كوماندا، جارىققا شىعارعان تۋىندىلارى ارقىلى قوعامداعى جانە ساياساتتاعى اششى شىندىقتاردى استارلاپ جەتكىزىپ كەلەدى.

كۇنى كەشە سول «يك» توبىنىڭ «WU KANG» دەگەن تۋىندىسى جارىق كوردى. ديرەكتورى - قۋانىش بەيسەكوۆ، پروديۋسەرى - الماس جالي.

«قازاق قىزىن جالاڭاشتادى»، «سوزىندە ءمان جوق» دەپ سىناۋعا اسىقپاڭىز. ءيا، كليپتى ءبىر كورگەننەن تۇسىنبەۋىڭىز مۇمكىن. الايدا، ءار دەتالىنە انىقتاپ ءمان بەرسەڭىز، بۇگىنگى قوعامنىڭ بوياماسىز بەت-بەينەسىن كورەسىز.

ماسەلەن، بەينەكليپ باستالعاندا-اق، حوت-دوگ، كۇرىش جانە اراق كورسەتىلەدى. بۇل دەگەنىڭىز - ەۋروپا، قىتاي جانە رەسەي. ءۇش مەملەكەتتىڭ برەندى ارقىلى ولاردىڭ بۇگىنگى ءبىزدىڭ قوعامعا ىقپالىن كورسەتۋگە تىرىسقانداي...

اۆتورلار بەينەكليپ باستالعاندا شىبىن ۇرعىشتى نەگە كورسەتتى؟ ۋيلليام گولدينگ دەيتىن اعىلشىن جازۋشىسىنىڭ «شىبىنداردىڭ ءامىرشىسى» اتتى اللەگوريالىق رومانى بار. ونىڭ سيۋجەتى بويىنشا، قوعام ءوزىن-ءوزى جويادى. اۆتورلار وسى كورىنىس ارقىلى بۇگىنگى قازاق قوعامىنىڭ، قازاقستان قوعامىنىڭ بەت-الپەتىن كورسەتۋگە تىرىسادى.

وقيعا ءبىر رەستوراننىڭ ىشىندەگى پلاننان باستالادى. دەمەك، كليپتەگى رەستوران - ءسىز بەن ءبىزدىڭ مەملەكەتتى سيپاتتايدى. ال ونىڭ قىزمەتكەرلەرى  جۇمىسسىز، بوس وتىرىپ، كارتا وينايدى.

ءارى قاراي، قازاقى ناقىشتاعى قىزعا ەۋروپالىق ۇلگىدەگى كيىنگەن قىز «سامسا» اكەلىپ بەرەدى. وسى سامسانى تىستەگەن كەزدە،  جاڭاعى قازاقي ناقىشتا كيىنگەن قىز ويلانىپ كەتەدى دە، ءوز ويىندا قازاقتىڭ تۇلعالارىنىڭ پورترەتى الدىندا جالاڭاشتانىپ بيلەيدى. بۇل دا قازاقى قۇندىلىق دەگەن ۇعىمنىڭ قازىر تەك جاساندىلىققا نەگىزدەلگەنىن اڭعارتاتىنداي.

قازاقستانننىڭ كارتاسى بەينەسىندە جاسالعان تورت جەپ وتىرادى. ءبىرىنشى - تورتتىڭ باتىس بولىگى جەلىنگەن. بۇل دەگەنىڭىز مۇنايلى ولكەنىڭ بار بايلىعى شەتكە كەتتى دەگەندى ايتىپ تۇرعانداي.

بەينەكليپ بارىسىندا قازاقستان كارتاسى بەينەلەنگەن تورت بىرنەشە مارتە جەلىنەدى. الدىمەن باتىس قازاقستان بولىگى كەسىلەتىنىن ايتتىق. وسى جەردە ءمان بەرە كەتەتىن ءجايت - كەسىلگەن بولىككە ەكى قولدىڭ تالاساتىنىن، الدەكىمنىڭ ول قولداردى قاعىپ جىبەرەتىنى كورسەتىلەدى. بىراق، ناتيجەسىندە ءبارىبىر باتىس قازاقستان جەلىنىپ كەتەدى. بۇل جەردە تالاسۋشى قولدار اقش پەن قىتاي دەسەك، قاعىپ جىبەرۋشى - رەسەي دەپ تۇسىنۋگە بولادى.

ءارى قاراي، قازاق جىگىتىنىڭ ۇيىندەگى بار زاتتى، ءتىپتى كەرەگەدەگى «وبويدى» جىرتىپ الىپ، قىتايعا اقشاعا بەرىپ جاتقانى، قازاقستان دەگەن شاعىن ءۇيدى ەلەستەتپەي مە؟.. بەينەكليپتە قارىز بەرۋشى قىتايدىڭ قولىنداعى 1000 پايىز دەپ جازىلعان پاراق تا قازاقستاننىڭ قازىرگى ەكونوميكالىق جاعدايىنان حابار بەرسە كەرەك. الگى جىگىت بارلىق زاتى ساتىلىپ، دىمسىز قالعان سوڭ، تاماق ءىشىپ وتىرعان ءۇش قىتاي ازاماتىنىڭ جانىندا جاتتىعۋ جاساپ جاتادى. ونىڭ ۇستىندەگى كيىم مەن ونىڭ ءىس-ارەكەتى، قىتايدىڭ شىڭجاڭداعى ەتنيكالىق از ۇلتتارعا ارنالعان لاگەرلەرىن ەلەستەتەدى. وسىدان كەيىن، جاڭاعى قازاقستان دەيتىن تورتتىڭ شىعىس بولىگى جەلىنەدى.

ونان ءارى، تەلەديداردان رەسەي دەپۋتاتى فەدوروۆ سويلەپ وتىرادى. وعان اراق ءىشىپ وتىرعان قازاق قاتتى اشۋلانادى. بىراق، ەسىكتەن اراعىن كوتەرىپ كىرگەن ورىستى كورگەندە بار قىجىلىن سوعان ايتىپ، بىرگە ىشەدى. ال، الگى ورىس قارقىلداپ كۇلەدى. سويتەدى دە ەكىنشى پلان ارقىلى كارتا بەينەسىندە جاسالعان تورتتىڭ قالعان بولىگىن اساپ جەيدى.

كليپتە:

«Cash rules everything around me دەيسىڭ با؟
الدىڭا نە قويىپ بەردى سونى جەيسىڭ با»، دەگەن ءسوز ايتىلادى. ياعني، «Cash rules everything around me»، دەگەن تىركەس اعىلشىن تىلىنەن اۋدارعاندا - «اقشا ءبارىن شەشەدى» دەگەن سوزگە سايكەسەدى. دەمەك، اقشا ءبارىن شەشەدى دەپ، الدىڭا كەلگەندى تالعاماي جۇتا بەرۋ - ءوز تامىرىڭا بالتا شابۋ ەمەس پە دەگەندى ەمەۋرىنمەن ۇقتىرادى دەپ تۇسىندىك.

ازىرگە ءبىز بايقاعان، ءمان بەرگەن تۇستارى وسىلار. كليپتى 18 ساعاتتىڭ ىشىندە 280 مىڭ ادام كورگەن. تۋىندىنى ارقايسى ءارتۇرلى تالداپ، ويىن جازىپ جاتىر. بىراق، بارلىق كورەرمەننىڭ پىكىرى - قوعامنىڭ بوياماسىز شىندىعى كورسەتىلگەن دەگەن پىكىرگە سايادى.

بۇعان دەيىن دە اتالعان توپتىڭ «5000» دەگەن كليپى جارىققا شىققان. ونى قازىرگە دەيىن 11 مليلليوننان استام ادام تاماشالاپتى. ونداعى - الاش كوسەمى ءاليحان بوكەيحاننىڭ ازاپتالىپ ءولۋى، زامانبەك نۇرقادىلوۆتىڭ قازاسى، نۇر-سۇلتانداعى LRT قۇرىلىسىنداعى جەمقورلىق، حالىق كوروناۆيرۋسپەن اۋىرىل جاتقاندا استانادا شاشىلعان وتشاشۋ سىندى دەتالدەردىڭ كورسەتىلۋىنە كوپشىلىك كورەرمەن ىستىق ىقىلاستارىن بىلدىرگەن.

ال، سوڭعى تۋىندىلارى ارقىلى دا «يك» توبى قوعامدىق ماسەلەلەرگە وزىندىك كوزقاراستارى بار ەكەنىن تاعى ءبىر مارتە كورسەتكەندەي.

نۇربيكە بەكسۇلتانقىزى

Abai.kz

6 پىكىر