سارسەنبى, 21 ءساۋىر 2021
قوعام 6762 2 پىكىر 24 اقپان, 2021 ساعات 11:48

رەسەيدەگى اپات. قازاقستانعا گاز تاسىمالداۋ توقتاتىلدى

رەسەيدىڭ ورىنبور وبلىسىنىڭ ەلەك اۋدانىندا فەدەرالدىق ماگيسترالدى گاز قۇبىرىندا جارىلىس بولدى. بۇل تۋرالى  رف ەنەرگەتيكا مينيسترلىگى مالىمدەدى. اتالعان گاز قۇبىرى «گازپروم ترانسگاز ەكاتەرينبۋرگ» كومپانياسىنا تيەسىلى ەكەن.

«فەدەرالدىق ماگيسترالدى گاز قۇبىرىندا بولعان جارىلىستان ەشكىم زارداپ شەكپەدى، ەشتەڭە قيراعان جوق. اپات اۋماعى ەلدى مەكەندەردەن الىس جەردە جاتىر. اقپارات بويىنشا، بۇل ورىنبور - نوۆوپسكوۆ گاز قۇبىرىنىڭ ءبىر تارماعى. ماگيسترالدى گاز قۇبىرى ەلەك اۋدانى، ورىنبور مەن سول-يلەتسك اۋدانىنىڭ ءبىر بولىگىن گازبەن قامتاماسىز ەتەدى جانە قازاقستانعا گاز جەتكىزەدى»، دەلىنگەن گۋبەرناتوردىڭ ءباسپاسوز حابارلاماسىندا.

رەسەي ەنەرگەتيكا مينيسترلىگى اپاتتىڭ سالدارىنان قازاقستانعا گاز تاسىمالداۋ توقتاتىلعانىن حابارلادى. مينيسترلىكتىڭ مالىمەتىنشە، «سويۋز» گاز قۇبىرىنىڭ 108-شاقىرىمىندا گاز قىسىمى ءتۇسىپ كەتىپ، ىزىنشە اۋادا جانعان. قازىر ول اۋماقتا گاز جانۋ توقتاماعان. تۇتىنۋشىلارعا ورىنبور - نوۆوپسكوۆ گاز قۇبىرى باللوندارى ارقىلى «كوگىلدىر وتىن» تاسىمالدانادى.

ورىنبور گۋبەرناتورىنىڭ ءباسپاسوز قىزمەتى گاز قۇبىرى بىتەلگەنىن، اۋماقتى جوندەۋگە ەكى كۇن كەتەتىنىن حابارلادى.

قازاقستان ەنەرگەتيكا مينيسترلىگى ءبىر بولىگى قازاقستان اۋماعى ارقىلى وتەتىن «سويۋز» جانە «ورىنبور – نوۆوپسكوۆ» ماگيسترالدى گاز قۇبىرلارى بويىنشا گاز تاسىمالداۋ توقتاتىلعانىن ايتتى. سايكەسىنشە، رەسەي گازى مەن ورىنبور زاۋىتىنان قاراشىعاناق گازىن تاسىمالداۋ دا توقتاتىلعانىن راستادى. ونىڭ نەگىزگى تۇتىنۋشىسى - باتىس قازاقستان وبلىسى.

Abai.kz

2 پىكىر