الەمدىك ارەنالاردا ەلىمىزدىڭ مارتەبەسىن كوتەرىپ، اتىن شىعاراتىن، الەمگە ايگىلەيتىن سايىس - سپورت. سونىڭ ىشىندە سوڭعى جىلدارى بوكستىڭ كاسىبيلەنگەن ءتۇرى دۇنيەجۇىزلىك دەڭگەيگە كوتەرىلگەن. بۇل ۇلى دوداعا قازاق ەلىنىڭ بىلعارى قولعاپ شەبەرلەرىنىڭ دە اسقان قىزىعۋشىلىق تانىتىپ، جۇلقىنا كىرىسۋى قۋانتادى.  وسى رەتتە قازاق اتىن شىعارىپ، تورتكۇل دۇنيەنى شۋلاتىپ جۇرگەن ءوزىمىزدىڭ «استانا ارلاندارى» كومانداسىن مىسال ەتپەكپىز. ۇتسىن، ۇتىلسىن قالاي بولعاندا دا اتالعان قۇرامامىز قازاق ەلىنىڭ الەم جۇرتىنىڭ نازارىن اۋدارىپ وتىرعان سپورتتىڭ بۇل تۇرىنەن وسال ەمەستىگىن، كوبىنىڭ الدىنا ءتۇسىپ، توپجارار تەگەۋرىندى ەكەنىن دالەلدەپ-اق كەلەدى. ال وسى «استانا ارلاندارىنىڭ» وزىمىزدە جانە سىرتتا وتكەن جەكپە-جەكتەرىن تەلەارنادان تاراتۋدا ءبىزدىڭ كومەنتاتورلارىمىز كوپتىڭ كوڭىلىنەن شىعىپ ءجۇر مە؟

الەمدىك ارەنالاردا ەلىمىزدىڭ مارتەبەسىن كوتەرىپ، اتىن شىعاراتىن، الەمگە ايگىلەيتىن سايىس - سپورت. سونىڭ ىشىندە سوڭعى جىلدارى بوكستىڭ كاسىبيلەنگەن ءتۇرى دۇنيەجۇىزلىك دەڭگەيگە كوتەرىلگەن. بۇل ۇلى دوداعا قازاق ەلىنىڭ بىلعارى قولعاپ شەبەرلەرىنىڭ دە اسقان قىزىعۋشىلىق تانىتىپ، جۇلقىنا كىرىسۋى قۋانتادى.  وسى رەتتە قازاق اتىن شىعارىپ، تورتكۇل دۇنيەنى شۋلاتىپ جۇرگەن ءوزىمىزدىڭ «استانا ارلاندارى» كومانداسىن مىسال ەتپەكپىز. ۇتسىن، ۇتىلسىن قالاي بولعاندا دا اتالعان قۇرامامىز قازاق ەلىنىڭ الەم جۇرتىنىڭ نازارىن اۋدارىپ وتىرعان سپورتتىڭ بۇل تۇرىنەن وسال ەمەستىگىن، كوبىنىڭ الدىنا ءتۇسىپ، توپجارار تەگەۋرىندى ەكەنىن دالەلدەپ-اق كەلەدى. ال وسى «استانا ارلاندارىنىڭ» وزىمىزدە جانە سىرتتا وتكەن جەكپە-جەكتەرىن تەلەارنادان تاراتۋدا ءبىزدىڭ كومەنتاتورلارىمىز كوپتىڭ كوڭىلىنەن شىعىپ ءجۇر مە؟

مەنىڭ تۇسىنىگىمشە - كومەنتاري جاساۋشى مامان سول جارىسقا ءتۇسۋشى ءوز كومانداسىنىڭ ءنومىرى ءبىرىنشى جانكۇيەرى. ارينە، اسىرە كۇيدە ەمەس، بىراق قانداي جاعدايدا دا ءوز ەلىنىڭ كومانداسىنا جانى اشىپ تۇرماسا، ءار ءسوزىنىڭ استارىندا وعان دەگەن ىقىلاسى سەزىلىپ، بۇيرەگى بۇرىپ تۇرماسا،  كومانداعا جانى اشىپ وتىرعان مىڭداعان كورەرمەننىڭ كوڭىلىندەگى ءسوزدى ءدوپ ءسوزدى باسىپ ايتا الماسا، وندا قيىن. بولىپ جاتقان سايىستى قۇر ۋاقىتقا ىلەسىپ بايانداپ شىعۋ دۇرىس ەمەس. جانە كومەنتاري جاساۋشى ءسوزى ارقىلى ۇلتىنا، جۇرتىنا قىزمەت ەتۋگە مىندەتتى. ال ءبىز بۇگىن «ەل ارنادان» كورسەتىلىپ تۇراتىن «استانا ارلاندارى» قاتىسقان جەكپە-جەكتەردەن نەنى كورىپ، قانداي كومەنتاري تىڭداپ، قانداي اسەردە قالىپ ءجۇرمىز؟ بارلىعىن ءتىزىپ جاتپايىن، جۋىقتا، ناقتىسى وتىزىنشى ناۋرىز كۇنى كەشكىسىن «ەل ارنادان» بەرىلگەن «استانا ارلاندارى» مەن ماسكەۋدىڭ «دينامو» كومانداسى اراسىندا وتكەن دۇنيەجۇزىلىك بوكس سەرياسىنىڭ كەزەكتى سايىسىنا توقتالايىن. وكىنىشكە وراي وزىمىزدە جەڭىسكە قول جەتكىزگەن بوكسشىلارىمىز قارىمتا باسەكەدە ۇتىلىپ قالدى. تورەشىلەر جاعىنان دا ءسال-ءپال قارالىقتىڭ بولعانى، ياعني ناتيجەنىڭ 5:0 -مەن بىتۋىنە سەپتىكتەرى تيگەنىن اڭعارىپ-اق وتىردىق. مىنە، وسى سايىستا ءبىزدىڭ قازاق تىلىندە سويلەۋشى كومەنتاتورىمىز ( اسحات ساعىناەۆ) سوزدەن كوپ قاتەلىكتەرگە ۇرىندى. ءبىر بۇل ەمەس، ۇدايى وسىلاي. «استانا ارلاندارى» ساپىندا لەگيونەرلەر (جالدامالى) بارشىلىق. سولار بوكس الاڭقايىنا شىعىپ، قارسىلاسىمەن جۇدىرىقتاسقان سايىن ءبىزدىڭ كومەنتاتوردىڭ اۋزىنان: «بۇل وزبەك جىگىتى رافيكاجان سۋلتونوۆ، وزبەكستاندىق لەگيونەر... بۇل الجيرلىك، الجيرلىك بەنشابلا...» دەي بەرۋدەن ءبىر تانبايدى. جارايدى العاشقى راۋندتا كورەرمەن ءۇشىن اقپارات بەرسىن، ونىسى ءجون، بىراق تۇتاس بەس راۋند بويى جالدامالى بوكسشىمىزدىڭ قاي ەلدەن، ۇلتىنىڭ كىم ەكەنىن توقىلداق قۇساپ تاقىلداپ، قايتالاي بەرگەن دۇرىس پا؟ وداندا: «الدارىڭىزدا ونەر كورسەتىپ جاتقان قازاقستاندىق بوكسشى ابدەلحافيد بەنشابلا»، «بۇل - استانا ارلانى » دەسە دۇرىس بولار ەدى عوي؟ ول جوق. ەكران الدىندا ءىشىڭ قان جىلاپ، مىسىڭ قۇرىپ، قارالاي قور بولىپ وتىرعانىڭ. قۇراما كاپيتانى قانات يسلامنىڭ  اتاجۇرتىنا ورالعانىنا ءبىراز بولدى، ءبىز ءالى ونى «قىتايلىق» دەۋدەن ءارى اسا الماي كەلەمىز. اتام قازاقتىڭ، ماحامبەت باتىردىڭ: «ءوزى بولعان جىگىتتىڭ ارعى تەگىن سۇراما!..» دەگەن وسيەتى كوكەيىمىزگە قاشان قونادى؟ قاشان الەمگە «ءبىز -- قازاقپىز، مەن -- قازاقپىن!» دەپ جار سالامىز؟ قاشان؟ ول ءسوزدى جۇبان اتامىز وزىمەن بىرگە الىپ كەتكەن جوق، ءبىز، قازاق بالاسى، ايتسىن دەپ قالدىرعان... «كىمنەن تاياق جەگەندەي ءبىزدىڭ قازاق بالاسى، الدىرىپ جۇرگەن دۇشپانعا ءوز-ءوزىنىڭ الاسى» دەگەن كەنەسارى حان بابامىزدىڭ، وسى ىسپەتتى مۇستافا شوقاي ءسوزى تاريحتىڭ قايتاكەلمەس قۇشاعىنا كەتكەن جوق، تاريحتان تامىرىن تارتىپ، ءبىزدىڭ جانىمىز بەن جادىمىزعا ار مەن نامىستىڭ تەمىرقازىعى بولىپ، ساۋلەسىن سەۋىپ تۇر. بۇل ءسوز تۇيسىكتىلەرگە - ءسوز، تۇيسىكسىزدەرگە - ءبوز... ءبىز سوزىمىزدەن دە تاياق جەپ جاتىرمىز...

قازاقستان اتىنان، كوك بايراق استىندا شىققان سوڭ سايىسقا ءتۇسۋشىنىڭ قايدان كەلگەنى ونشا ماڭىزدى بولماي قالادى، ماعان سالسا اقپاراتتىق تۇرعىدا دا تىم ءجيى ايتىلماۋى ءتيىس، ايتپەسە ونداي الەمدىك دەڭگەيدەگى سايىستاردىڭ قازاققا، ەلدىگىمىزگە بەرەر اسەرى كوك تيىن. كومەنتاتور كورەرمەن مەن سايىس ءوتىپ جاتقان جەردىڭ اراسىنداعى التىن كوپىر، ءار ءسوزىن تارازىعا سالىپ، سالماقتاپ ايتۋى قاجەت. ويلانىپ جاتۋعا ۋاقىت جوق بولعاننىڭ وزىندە، ىشكى، رۋحاني دايىندىعى جوعارى بولۋى كەرەك. جەڭىلىس تاپقان سايىستىڭ وزىنەن جەڭىسپەن شىعارار رۋحى مىقتى، ءسوزى زەرگەردىڭ ءمىنسىز بۇيىمىنداي بولار كومەنتاتورلارىمىز شىنىمەن دە جوق پا؟ سەنبەيمىن. ۇلت بوپ ۇيىسىپ وتىرعانىمىز راس بولسا، تاربيەلەۋ قاجەت. مەنىڭ اسحات باۋىرىمدا شاتاعىم شامالى، جەكە باسىن جاماندايىن دەگەن مىسقال نيەتىم جوق، ماسەلە ونىڭ سوزىندە. جالپى داۋىس مانەرى، سويلەم قۇراۋى جاقسى، تەك دايىندىق جاعى، رۋح جاعى ولقى سوعىپ جاتىر. قايتا ونىمەن بىرگە ورىسشا سويلەگەن،  اسحات باعاەۆ جيناقى سويلەدى. ەكى اتتاس قاتار وتىرعان ەكەن، بىراق ءار نارسە سالىستىرۋدان تۇرادى ەمەس پە؟ جىگىت بولسا، سىندى قوش الار.

ساعىناەۆ: « بوكس قۇدايى بولسا، سونداي قۇدىرەت بار بولسا...» دەپ ويلانباي قويىپ قالىپ، جۇرە بەرەدى. ءبىز اسا ءدىنشىل ەمەس، زايىرلى ەل بولساق تا ءبىر اللانى مويىنداعان مۇسىلمان ۇمبەتى ەمەسپىز بە، اسحات باۋىرىم دا مۇسىلمان ەمەس پە، ەندەشە ەرتەدەگى كوپ قۇدايلىق قيالدى نەگە اۋزىنا الادى؟ بۇل ءسوزى دە كومەنتاتوردىڭ ءدىني دە، مادەني دە ساۋاتىنىڭ دەڭگەيىن اشكەرەلەپ تاستاعان كورىنىس كورىندى.

ءسوزىمىزدىڭ توق ەتەرى - بوكس بولسىن، باسقا دا جارىستار بولسىن، شەتتەن الىنعان لەگيونەرلەردى «وزىمىزدىكى ەتىپ الۋ» كەرەكپىز. ولار الار اقشاعا عانا جۇمىس جاسايتىن جالدامالى بولا بەرسىن، كوك تۋىمىزدىڭ استىندا ونەر كورسەتۋگە كەلگەن ەكەن، ءبىتتى شارۋا، ارعى اڭگىمە - قازاقستاندىق رۋحتى كوتەرۋگە ارنالعانى اۋاداي قاجەتتىك! وسىنى كومەنتاتور اعايىندارىمىز جاقسىلاپ ۇعىنسا ەكەن. سولارعا تاربيە، نۇسقاۋ بەرەتىن ءتيىستى ورىندار ءبىز قوزعاعان  ماسەلەنى ۇساق-تۇيەككە جاتقىزباي، دەرەۋ قولعا السا قانە؟                               
«اباي-اقپارات»