سارسەنبى, 28 شىلدە 2021
قاۋىپ ەتكەننەن ايتامىن 4275 4 پىكىر 25 ناۋرىز, 2021 ساعات 14:15

شەتەلدىك كومپانيا جامبىل وبلىسىنان جەر الماق پا؟

جامبىل وبلىسىنىڭ ورمان قورىنا تيەسىلى جەرلەردىڭ ءبىر بولىگى «اك التىنالماس» اق يەلىگىنە بەرىلەتىنى تۋرالى اقپارات باق-تا جاريا بولدى. بۇل تۋرالى قازتاگ اگەنتتىگى جازدى.

اگەنتتىك ءوز ماتەريالىندا جامبىل وبلىسىنداعى ورمان قورعاۋ مەكەمەسىنە تيەسىلى جەردىڭ ءبىر بولىگىن جەكە كومپانيانىڭ مەنشىگىنە بەرۋ تۋرالى ۇكىمەتتىڭ قاۋلىسىن جاريالاپتى. سونداي-اق:

«اتالعان تۇسىنىكتەمەدەن بايقاعانىمىزداي، كورسەتىلگەن تەرريتوريانىڭ 0,2414 گا بولىگى ورماندى جەر، 0,0442 گا بولىگى ورماندى جەر ەمەس، 0,4879 گا بولىگى جايىلىمدىق جەر جانە 0,0969 گا بولىگى وزگە ماقساتتاعى جەرلەر»، - دەپ جازادى اگەنتتىك.

ءارى قاراي، اۆتورى قر اۋىل شارۋاشىلىق ءمينيسترى ساپارحان وماروۆ دەپ كورسەتىلگەن ۇكىمەت قاۋلىسىنىڭ تۇسىندىرمەسىن جاريالاپتى.

قر اۋىل شارۋاشىلىعى مينيسترلىگىنىڭ رەسمي سايتىنداعى جەر رەسۋرستارىن پايدالانۋ كوميتەتى پاراقشاسىندا «ورمان قورى جەرلەرىنىڭ جەكەلەگەن ۋچاسكەلەرىن باسقا ساناتتاعى جەرلەرگە اۋىستىرۋ تۋرالى» قر ۇكىمەتى قاۋلىسىنىڭ جوباسىنا ءباسپاسوز-رەليزى جاريالانعان. وندا:

«قازاقستان رەسپۋبليكاسى اۋىل شارۋاشىلىعى مينيسترلىگىمەن قازاقستان رەسپۋبليكاسى جەر كودەكسiنىڭ 130-بابىنا جانە قازاقستان رەسپۋبليكاسى ورمان كودەكسiنىڭ 51-بابىناسايكەس، «ورمان قورى جەرلەرىنىڭ جەكەلەگەن ۋچاسكەلەرىن باسقا ساناتتاعى جەرلەرگە اۋىستىرۋ تۋرالى» قازاقستان رەسپۋبليكاسى ۇكىمەتىنىڭ قاۋلى جوباسى (بۇدان ءارى – قاۋلىنىڭ جوباسى) ازىرلەندى.

قاۋلىنىڭ جوباسىمەن «جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ «كوكتەرەك ورمانداردى جانە جانۋارلار دۇنيەسىن قورعاۋ جونىندەگى مەكەمەسى» كوممۋنالدىق مەملەكەتتىك مەكەمەسىنىڭ ورمان قورى جەرىنەن جالپى الاڭى 0,8704 گەكتار جەر ۋچاسكەلەرi ونەركاسiپ، كولiك، بايلانىس، عارىش قىزمەتى، قورعانىس، ۇلتتىق قاۋىپسىزدىك مۇقتاجىنا ارنالعان جەر جانە اۋىل شارۋاشىلىعىنا ارنالماعان وزگە دە جەر ساناتىنا اۋىستىرۋ كوزدەلگەن.

جەرلەردى اۋىستىرۋدىڭ ماقساتى – ەلەكتر بەرۋ جەلىلەرىن سالۋ ءۇشىن.

جوبانى قابىلداۋ الەۋمەتتiك-ەكونوميكالىق نەمەسە قۇقىقتىق تەرىس سالدارعا اكەپ سوقپايدى»، - دەپ جازىلعان.

بۇل ءباسپاسوز-رەليزى سايتتا 2021 جىلدىڭ 16 ناۋرىزى كۇنى جاريالانىپتى. 16 ناۋرىزدا جاريالانعان تاعى ءبىر قۇجات – قر ۇكىمەت باسشىسى اسقار ءمامينىڭ «ورمان قورى جەرلەرىنىڭ جەكەلەگەن ۋچاسكەلەرىن باسقا ساناتتاعى جەرلەرگە اۋىستىرۋ تۋرالى» قازاقستان رەسپۋبليكاسى ۇكىمەتى قاۋلىسىنىڭ جوباسى.

قۇجات ءماتىنى:

ورمان قورى جەرلەرىنىڭ جەكەلەگەن ۋچاسكەلەرىن باسقا
ساناتتاعى جەرلەرگە اۋىستىرۋ تۋرالى

2003 جىلعى 20 ماۋسىمداعى قازاقستان رەسپۋبليكاسى جەر كودەكسiنىڭ 130-بابىنا جانە 2003 جىلعى 8 شiلدەدەگى قازاقستان رەسپۋبليكاسى ورمان كودەكسiنىڭ 51-بابىنا سايكەس قازاقستان رەسپۋبليكاسىنىڭ ۇكiمەتi قاۋلى ەتەدI:

1. وسى قاۋلىعا قوسىمشاعا سايكەس «جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ «كوكتەرەك ورمانداردى جانە جانۋارلار دۇنيەسىن قورعاۋ جونىندەگى مەكەمەسى» كوممۋنالدىق مەملەكەتتىك مەكەمەسىنىڭ ورمان قورى جەرلەرىنەن جالپى الاڭى 0,8704 گەكتار جەر ۋچاسكەلەرى وسى قاۋلىعا قوسىمشاعا سايكەس ونەركاسiپ، كولiك، بايلانىس جەرلەرى، عارىش قىزمەتى، قورعانىس، ۇلتتىق قاۋىپسىزدىك مۇقتاجدىقتارىنا ارنالعان جەرلەر جانە اۋىل شارۋاشىلىعىنا ارنالماعان وزگە دە جەرلەر ساناتىنا اۋىستىرىلسىن.

2. جامبىل وبلىسىنىڭ اكىمى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن وسى قاۋلىنىڭ 1-تارماعىندا كورسەتىلگەن جەر ۋچاسكەلەرىن ەلەكتر بەرۋ جەلىلەرىن سالۋ ءۇشىن «اك التىنالماس» اكتسيونەرلىك قوعامىنا (بۇدان ءارى – اكتسيونەرلىك قوعام) بەرىلۋىن قامتاماسىز ەتسىن.

3. اكتسيونەرلىك قوعام (كەلىسۋ بويىنشا) قازاقستان رەسپۋبليكاسىنىڭ قولدانىستاعى زاڭناماسىنا سايكەس ورمان القاپتارىن ورمان شارۋاشىلىعىن جۇرگىزۋمەن بايلانىستى ەمەس ماقساتتاردا پايدالانۋ ءۇشىن ولاردى الۋدان تۋىنداعان ورمان شارۋاشىلىعى ءوندىرىسىنىڭ شىعىندارىن رەسپۋبليكالىق بيۋدجەت كىرىسىنە وتەسىن جانە الىنعان سۇرەكتى مەكەمەنىڭ بالانسىنا بەرە وتىرىپ، الاڭدى تازارتۋ جونىندە شارالار قابىلداسىن.

4. وسى قاۋلى قول قويىلعان كۇنiنەن باستاپ قولدانىسقا ەنگiزiلەدi.

قازاقستان رەسپۋبليكاسىنىڭ

پرەمەر-ءمينيسترى ا. مامين

كومپانيانىڭ رەسمي سايتىنداعى مالىمەتتەر بويىنشا، «اك التىنالماس» اق - گەولوگيالىق بارلاۋ، كەن ءوندىرۋ جانە التىن وڭدەۋدىڭ تولىق اينالىمىن قامتىعان كومپانيا. كومپانيا اكتيۆتەرى جامبىل، قاراعاندى، شىعىس قازاقستان جانە اقمولا وبلىستارىندا بار. پايدالى قازبالار «اقباقاي»، «دوليننوە» التىن ءوندىرۋ فابريكالارىندا، «پۋستىننوە» بايىتۋ فابريكاسىندا جانە «التىنالماس Technology» قۇندى مەتالدار شىعارۋ زاۋىتىندا وڭدەلەدى.

كومپانيا 1993 جىلى قۇرىلعان. سايت مالىمەتىندە: «1993 جىلى 21 قاڭتار قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆتىڭ جارلىعىمەن «قاززولوتو» رەسپۋبليكالىق وندىرىستىك بىرلەستىگى مەن «قازالماززولوتو» كونسورتسيۋمىنىڭ كاسىپورىندارى مەن ۇيىمدارىنىڭ نەگىزىندە «التىنالماس» ۇلتتىق اكتسيونەرلىك كومپانياسى قۇرىلدى»، - دەپ جازىلعان.

1995 جىلى كومپانيا اتاۋى - «التىنالماس اك» اكتسيونەرلىك كومپانياسى بولىپ وزگەرتىلگەن. 1997 جىلى كومپانيا جەكەشەلەندiرiلدi جانە جەكە مەنشiك نىسانىنداعى اكتسيونەرلiك قوعامعا اينالدى.

كومپانيا باسشىلىعى:

«2021 جىلدىڭ 1 قاڭتارىنداعى دەرەك بويىنشا، 59,97% اكتسياسى GOUDEN RESERVES B.V. كومپانياسىنا تيەسىلى (نيدەرلاندىدا تىركەلگەن). ال 29,99% اكتسياسى كومپانيانىڭ ديرەكتورلار كەڭەسىنىڭ توراعاسى ۆلاديمير دجۋمانباەۆقا، 5,5% اكتسياسى پرەزيدەنت جانە باسقارما توراعاسى ديار قاناشەۆقا تيەسىلى»، - دەپ جازادى قازتاگ.

ال كASE قازاقستاندىق قور بيرجاسىندا كومپانيانىڭ قۇنى -  154 177,72 ملن KZT ($365,97 ملن) دەپ كورسەتىلگەن.

سونداي-اق، كASE سايتىندا كومپانيانىڭ اكتسيونەرى رەتىندە GOUDEN RESERVES B.V. كورسەتىلگەن.

Forbes-ءتىڭ 2018 جىلعى ماتەريالىندا «اك التىنالماس» اق تۋرالى: «كومپانيا تيمۋر قۇلىباەۆقا تيەسىلى (Aquila Gold B.V ارقىلى). 2017 جىلدىڭ ماۋسىمىندا ۆلاديمير دجۋمانباەۆقا (32,5% اكتسيا) جانە نيدەرلاندىدا تىركەلگەن Gouden Reserves B.V-عا (67,5% اكتسيا) 17,4 ملرد تەڭگەگە ساتىلعان (KASE-ءتىڭ 2017 جىلعى 14 شىلدەدەگى ەسەبى بويىنشا). Gouden Reserves B.V-نىڭ اقىرعى بەنەفيتسيارى ءارى باسشىسى 30 جاستاعى نيدەرلاندى ازاماتشاسى اننا بەرەزينا دەپ كورسەتىلگەن»، - دەپ جازادى.

 

الەۋمەتتىك جەلى قولدانۋشىلارى: «التىنالماستىڭ» 60 پايىزى نيدەرلاندى مەملەكەتىندە تىركەلگەن كومپانيانىڭ يەلىگىندە. بۇل قازاق جەرىن شەتەلدىكتەرگە بەرۋ فاكتىسى ەمەس پە»، - دەپ دابىل قاعۋدا.

نۇرگەلدى ابدىعانيۇلى

Abai.kz

4 پىكىر