بۇگىنگى باستى تاقىرىپ - جەر رەفورماسى بولىپ تۇر. جەر - قازاقتىڭ جانى، ارى، نامىسى. ءتىپتى، شەرى دەپ تە ايتۋعا بولادى. جەر شەتەلدىكتەرگە ساتىلمايدى جانە جالعا دا بەرىلمەيدى! پرەزيدەنت بۇل جاعىنان جەل وتپەستەي ەتىپ، تاريحي شەشىم قابىلدادى.

جەر كوميسسياسىنىڭ ءبىرىنشى وتىرىسىندا بەلگىلى بولا باستادى، «جەر مەملەكەت مەنشىگىندە بولۋ كەرەك!» دەگەن پىكىر العا وزىپ شىقتى.

قاراپايىم حالىق جەردىڭ تۇتاستاي مەملەكەت مەنشىگىندە بولعانىن قوس قولىن كوتەرىپ قولداپ شىعارى بەلگىلى.

سونداي-اق، جەردىڭ باسىم بولىگى جەكە مەنشىككە باياعىدا ءوتىپ كەتكەنىن دە جۇرت ءبىلىپ وتىر. ونىڭ تاعى كىمدەردىڭ قولىندا ەكەنىن دە قۋ ءىشىمىز سەزىپ تۇر. بىراق، ەشكىمنىڭ ەسىمىن ەشكىم ءالى اتاعان جوق. «شىندىق تا جوتەل سياقتى، جىبىرلاپ تۇرار تاماقتا» - دەپ، قادىر اقىن ايتپاقشى، ءبارىمىزدىڭ كومەيىمىزدە شامپان قۇيىلعان قۇمىرانىڭ تىعىنى قۇساپ تۇرعانى انىق.

نىق سەنىممەن ايتا الامىن، پرەزيدەنتتە ءبىر گەكتار دا جەر جوق! پرەزيدەنتتىڭ قاسىندا جۇرگەن تاعى ەكى-ءۇش جاس جىگىتتە دە سولاي دەپ ويلايمىن. قارا حالىقتىڭ قولىنداعى ەەردىڭ كولەمى كوپ ەمەس...

ال، سوندا جەردى ۋىسىندا ۇستاپ وتىرعاندار كىمدەر؟

ارينە، ءبىرىنشى كەزەكتە ەسكى-جاڭا ۇكىمەت مۇشەلەرى; ءار دەڭگەيدەگى اكىمدەر، دەپۋتاتتار، سوتتار، پروكۋرورلار جانە ولاردىڭ جاقىن تۋىستارى. ءبىر سوزبەن ايتقاندا، بۇرىنعى-سوڭعى شەنەۋنىكتەر مەن ولاردىڭ تۋمالارى. جانە ول جەر بولعاندا قانداي، ەڭ شۇرايلىسىن باسىپ قالعان عوي!

ۇزاق جىلدار بويى ىشكە جينالعان جەردىڭ قۇساسى كىسى وينايتىن شارۋا ەمەس. سول قۇسانىڭ 2016 جىلى مەملەكەتتى تەڭسەلتىپ جىبەرگەنىن ەسكەرسەك، بيىل جەر رەفورماسىنا سوڭعى نۇكتە ءسوزسىز قويىلۋى كەرەك!

ەگەر، جەر رەفورماسى ءوز دەڭگەيىندە ءجۇرسىن، ءسويتىپ مەملەكەتتىڭ بولاشاعى قاۋىپسىز بولسىن، حالىقتىڭ تىنىشتىعى قامتاماسىز ەتىلسىن دەسە، ەڭ الدىمەن قازىرگى بيلىك باسىنداعى تۇلعالار بىردەن سانالىلىق ءارى بەلسەندىلىك تانتىپ، بۇكىل جەرىن مەملەكەت مەنشىگىنە وتكىزۋگە دايىن ەكەندىكتەرىن اشىق مالىمدەۋلەرى ءتيىس!

بۇل - مەملەكەت پەن ۇلت الدىنداعى زور جانە تاريحي جاۋاپكەرشىلىك!

مەملەكەتشىلدىك پەن قۇلقىنقۇمارلىقتىڭ تارازىعا تۇسەتىن، ەل باسقارعان جىگىتتەردىڭ ناعىز سىنالاتىن تۇسى!

ۋاقىت ولاردان ءبىر عانا باتىل شەشىم قابىلداۋدى تالاپ ەتۋدە. شەگىنەرگە جول جوق دەپ ويلايمىن!

ارىپتەستەرى اعىنان اقتارىلا بىلسە بولدى، مەملەكەت باسشىسى باستاعان جەر رەفورماسىنان تەز ناتيجە شىعادى، حالىق تا بىردەن ساباسىنا تۇسەدى، ءتىپتى دە بولاشاققا جول اشىلادى...

اۋىت مۇقيبەك

Abai.kz