قازاقستاندا جاپپاي ۆاكتسينا ەگۋ باستالدى. اقپان ايىندا باستالعان ۆاكتسينا ەگۋ جۇمىستارى ەكى اي ىشىندە ەندى قارقىنىنا ەنە باستادى. پرەزيدەنت ۆاكتسيناتسيالاۋ جۇمىستارىن قاتاڭ سىنعا العان سوڭ، دەنساۋلىق ساقتاۋ مينيسترلىگى ۆاكتسينانى ءىرى قالالارعا جەتكىزە باستادى. 

ۆاكتسينا سالعان ازاماتتار الەۋمەتتىك جەلىلەرگە ءوزىنىڭ پىكىرلەرىن ءبىلدىرىپ جاتىر.

جۋرناليست ايدوس جۇقانۇلى ءوزىنىڭ فەيسبۋك پاراقشاسىنا: "الماتى جۇرتىنىڭ تارتىپكە باعىنۋى قيىن. ىعى-جىعى حالىق. سابىلعان كولىك. تىرشىلىك ءۇشىن كۇرەس. كىرىپ شىققان قوناقتاردى، تىركەۋسىز ەلدى قوسقاندا بۇقارا سانى 3 ملن-عا جۋىقتايدى. نۇر-سۇلتانداعىداي قاشىقتىق ساقتاپ، سول جاعادا جۇمىس ىستەگەن ءتۇر كورسەتىپ وتىرا المايسىڭ. ونىڭ ۇستىنە ناۋقاستار كۇننەن كۇنگە كوبەيىپ بارادى. سوندىقتان ساقتانباسا بولمايدى. ءوز ءومىرىم وزىمە كەرەك. قازاق ۆاكتسيناسىن كۇتىپ جۇرگەندە تىراپاي اسارمىن دەپ بۇگىن ورىستىكىن ەكتىرتتىم. ۆاكتسينا العاننان كەيىن ءبىرىنشى كۇندە ءبارى ويداعىداي بولدى، ەكىنشى كۇنى قانداي كۇيدە بولعانىمدى ەرتەڭ جازامىن" دەپ جازدى.

ال ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ ۆاكتسينا ەكتىرگەنى جايلى بىلاي دەپ پىكىر ءبىلدىردى: "جەكسەنبى كۇنى بولعانىنا قاراماستان تۇرعىندارعا جاپپاي ۆاكتسينا ەگۋ باستالدى. قورقىنىش سەزىمىنە قاراماستان مەن دە ۆاكتسينا ەكتىردىم. ۆاكتسينا جاساتىپ جاتقان جاستار كوپ. كەزەكتە تۇرعاندار كوپ. دارىگەرلەر مەن مەدبيكەلەر، پسيحولوگتار كىم قورقىپ تۇرعانىن بايقاپ قويادى. تاماعىمىزدى مۇقيات قاراپ، دەنە قىزۋى، قان قىسىمىن ولشەپ، دەنساۋلىققا قاتىستى باسقا دا سۇراقتار قويدى. اللەرگيامىز بار-جوعىن سۇرادى. ەكپە سالعاننان كەيىن 30 مينۋت وتىراسىڭ جانە قانداي كۇيدە وتىرعانىڭدى قاعازعا ءتۇسىرىپ بەرەسىڭ. №9 ەمحانا باسشىلىعىنىڭ ەكپە ەگۋ بويىنشا تاجىريبەسى بار. ولار جاعدايدى باقىلاۋدا ۇستاپ وتىر".

ۆاكتسينا ەگىپ، ونى جارياعا جار سالۋدى قۇپ كورمەيتىن ازاماتتار دا بار.

تاريحشى تالعات جانىسباي بولسا: "وقىرمانى كوپ بلوگەرلەر مەن بەلگىلى ادامدار ەكى كۇننەن بەرى «مەن ۆاكتسينا ەكتىردىم!» دەپ، پوست جاريالاعانى ءۇشىن قانشا تولەندى؟!" دەپ سۇراق جولدادى.

ۆاكتسينا سالدىرۋ جۇمىستارى الماتى قالاسىندا ۋاقىتشا توقتاتىلدى. وعان سەبەپكەر بولعان جاعداي ۆاكتسينانىڭ تاۋسىلىپ قالۋى.

Abai.kz