كەنەسارىنىڭ باسى
ەل ىشىندە حان كەنە قاپىلىستا قولعا تۇسكەننەن كەيىن، جاۋ ونىڭ باسىن كەستىرىپ، كۇل سالعىش ... رەتىندە پايدالانعان دەگەن قاۋەسەت بار.
التىباقان الاۋىز قاھاننىڭ
ەركەگى قايسى، قاتىنى؟
اتا جاۋ باسىن اتاڭنىڭ،
كۇلسالعىش قىلدى اقىرى!
مىنەزىڭ-اي، قازاق، بەۋ، سەنىڭ
قاستاسقان كەزدە قاشىپ ءوڭ:
«اكەڭنىڭ باسى» دەۋشى ەدىڭ،
ال، وينا –
اكەڭنىڭ
باسىمەن!
الاشتىڭ تاۋ مەن تاسىنا
تالىستاي تاڭبا باسىلىپ;--
يت پەن قۇس شىقتى باسىڭا،
باسىڭنىڭ جوعىن باسىنىپ...
باسپاق ەل بولدىق نەگە ءبىز،
بوپساعا كونىپ نە ءتۇرلى؟
...ءبىز –
باسسىز قالعان دەنەمىز –
«باسسىز سالت اتتى» سەكىلدى!!!
سەرىك اقسۇڭقارۇلىنىڭ جازباسى
Abai.kz
