ەلىمىزدە شەتەلدىكتەرگە جالعا بەرىلگەن جەردىڭ كولەمى 18,5 مىڭ گا قۇرايدى. 2025 جىلعا دەيىن ولار جالعا العان جەرلەردى تولىعىمەن مەملەكەتكە كەرى قايتارادى. بۇل تۋرالى ازاتتىق رۋحى سايتى جازدى.

بۇگىن تومەنگى پالاتا دەپۋتاتتارى مەملەكەت باسشىسىنىڭ باستاماسىمەن قولعا الىنعان جەر قاتىناستارى جونىندەگى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ جونىندەگى زاڭ جوباسىن ءبىرىنشى وقىلىمدا تالقىلادى.

- «زاڭ جوباسىن قابىلداۋدىڭ ماقساتى شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسۋى بار عىلىمي ورتالىقتارعا سونداي-اق، اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك قۇقىعىمەن جانە ۋاقىتشا جەر پايدالانۋ قۇقىعىمەن قانداستاردىڭ يەلەنۋىنە تىيىم سالۋدى ەنگىزۋ بولىپ تابىلادى», - دەدى اۋىل شارۋاشىلىعى ءمينيسترى ساپارحان وماروۆ.

مينيستر بۇگىندە اۋىل شارۋاشىلىعىنىڭ 74,4 مىڭ گا جەرى جەتى بىرىككەن كاسىپورىنعا، بۇدان بولەك، 18,5 مىڭ گا جەر ەكى شەتەلدىك زاڭدى تۇلعاعا بەرىلگەندىگىن حابارلادى. بەلگىلى بولعانداي، ولار جەردى موراتوري ەنگىزىلگەنگە دەيىن الىپ ۇلگەرگەن ەكەن.

- «ولاردىڭ جالعا الۋ مەرزىمى 2025 جىلعا دەيىن جالعاسادى. مەرزىمدەرى اياقتالعاننان كەيىن بارلىق جەر ۇكىمەتكە كەرى قايتارىلادى. سونىمەن قاتار، زاڭ جوباسىندا بۇدان بۇرىن شەتەلدىكتەرمەن جانە شەتەلدىك ۇلەسى بار قازاقستاندىق كومپانيالارمەن جالعا الىنعان اۋىل شارۋاشىلىعى جەرلەرىنىڭ  پايدالانۋ مەرزىمى ۇزارتىلمايتىندىعى جانە ولاردىڭ پايدالانۋ مەرزىمى اياقتالعانعا دەيىن عانا يەلىكتە بولاتىنى قاراستىرىلعان. ال، قانداستار بويىنشا، ولار جەكە قوسالقى شارۋشىلىعى، باۋ-باقشا جانە ساياجاي قۇرىلىسى ءۇشىن جەر ۋچاسكەسىن الا الادى، اۋىل شارۋاشىلىعى جەرلەرىن قازاقستان ازاماتتىعىن العاننان كەيىن عانا جالعا الۋعا مۇمكىندىگى بار»، - دەدى مينيستر.

اتالعان زاڭ جوباسىن ءماجىلىس دەپۋتاتتارى ءبىرىنشى وقىلىمدا ماقۇلدادى.

- «بۇگىنگى ماقۇلدانعان جەر تۋرالى زاڭ جوباسىنىڭ قازاقستان قوعامىندا ماڭىزى دا، ورنى دا ەرەكشە. مەملەكەت باسشىسى قاسىم-جومارت توقاەۆتىڭ تاپسىرماسىمەن ازىرلەنگەن وسى قۇجاتتىڭ ناتيجەسىندە حالىقىمىزدىڭ كوكەيىندە جۇرگەن سۇراق بويىنشا ناقتى شەشىم قابىلداندى. ەندى جەرىمىزدى شەتەلدىكتەرگە ساتۋعا دا، جالعا بەرۋگە دە تولىقتاي تىيىم سالىنادى»، - دەدى ءماجىلىس توراعاسى نۇرلان نىعماتۋللين.

Abai.kz