قازاقستاننىڭ ەڭبەك سىڭىرگەن ءارتىسى، «قۇرمەت» جانە «پاراسات» وردەندەرىنىڭ يەگەرى  عازيزا ابدىنابيەۆا 72 جاسىندا ومىردەن ءوتتى.

قارالى حاباردى عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترىنىڭ وكىلدەرى ەستىرتتى.

«قازاقستاننىڭ ەڭبەك سىڭىرگەن ءارتىسى، قۇرمەت وردەنىنىڭ يەگەرى، تەاتر جانە كينو اكتريساسى عازيزا ماكەشقىزى ابدىنابيەۆا ومىردەن ءوتتى. ارىپتەستەرىمىزگە، وتباسىنا قايعىرا كوڭىل ايتامىز. اللا سابىر بەرسىن، الدىنان جارىلقاسىن.

عازيزا ابدىنابيەۆا 1969 - 1993 جىلادرى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا اكتريسا بولىپ قىزمەت اتقارعان. 1993 جىلدان مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا اكتريساسى بولىپ ساحنادا ءتۇرلى وبرازدارىمەن ەلدى تاڭدانتىپ، تامسانتقان ەدى. قازاق كينو الەمىندە دە وشپەس ءىز قالدىرىپ، كوپكە ۇلگى بولدى»، - دەپ جازدى تەاتردىڭ رەسمي پاراقشاسى Facebook-تە.

عازيزا ابدىنابيەۆا 1948 جىلى قىزىلوردا وبلىسى، سىرداريا اۋدانىندا تۋعان. قازاق ۇلتتىق كونسەرۆاتورياسىننىڭ (بۇرىنعى الماتى كونسەرۆاتورياسى) «اكتەرلىك شەبەرلىك» فاكۋلتەتىن بىتىرگەن (1970). كونسەرۆاتوريانىڭ 4-كۋرسىندا وقىپ ءجۇرىپ، 1969 جىلى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنا قابىلدانادى. 1969-1993 جىلدارى وسى تەاتردا ايانباي ەڭبەك ەتەدى. 1993 جىلى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنا اكتەرلىك بولىمىنە اۋىسقان. 2005 جىلدان باستاپ قازاقستان كينەماتوگرافيستەر وداعىنىڭ مۇشەسى. عازيزا ابدىنابيەۆا بىرقاتار فيلم مەن سەريالدا دا باستى رولدەردى سومدادى.

بەكجان تۇرىس:

- كۇلىپ وتىرىپ ءبىر دەمدە جىلاي سالاتىن، قۋانىپ ءجۇرىپ وكپەلەي الاتىن ءسابي مىنەز جان ەدى عوي عازيزا اپا...

تاڭى تەاترمەن اتىپ، كۇنى كينومەن باتىپ، ادام بالاسىن رەنجىتپەيتىن مەيىرىمدى، ەشكىمنىڭ بەتىنەن قاقپايتىن جاناشىر، سونداي-اق وزىنە عانا جاراساتىن ەركەلىگى باسىم، تابانىڭنىڭ استىنا اق جۇرەگىن توسەي سالاتىن اق كوڭىل، ادال جان ەدى. ۇلتتىق تەاتر وسىنداي ارتيسىنەن ايىرىلىپ قالدى. قازاق ونەرى عازيزاداي اكتريساسىن جوعالتتى... اپامىزدىڭ ەسىمى قازاق تەاتر تاريحىندا قاتتالىپ قالارى حاق. وعان ونىڭ توككەن تەرى، ەتكەن ەڭبەگى ابدەن لايىق. كينەماتوگرافيا مەن تەلەۆيدەنيە قورىندا ساقتالىپ قالعان ويلى بەينەسى مەن داۋىسى لايىق. ابدەن لايىق! جانىڭىز جانناتتا بولسىن، عازيزا اپا.

اسحات ماەميروۆ:

- اپا-وۋ ەگىلتتىڭىز عوي، جىلاتتىڭىز عوي ءدۇيىم ەلدى.... ۇلت رۋحانياتىنىڭ اسپانى قارا جامىلدى. قازاق تەاترى مەن كينو ونەرىنىڭ ماقتانىشىنا اينالعان عازيزا ابدىنابيەۆا دۇنيەدەن ءوتتى. اتى جامان تاجال اۋرۋ ەشكىمدى ايامادى. جارتى عاسىر بويى قازاق تەاترىنىڭ تورىندە شىنايىلىعىمەن، تابيعي تالانتىمەن كورەرمەنىن تامساندىرعان قازاقستاننىڭ ەڭبەك سىڭىرگەن ءارتيسى، «پاراسات»، «قۇرمەت» وردەندەرىنىڭ يەگەرى عازيزا ابدىنابيەۆا – جانى مەن جۇرەگى مەيىرىمگە تولى، ادالدىقتى تۋ ەتكەن بولمىسى بولەك جان ەدى.... ساحنا كەڭىستىگىندە ءمورجانداي اسىل انالاردىڭ، ارۋ قىزداردىڭ بەينەسىن سومداعان اسا تالانتتى اكتريسا، اياۋلى جان دۇنيەدەن ءوتتى. كوكىرەكتى كەرنەيتىن وكىنىش... عازيزا اپا، اسىل اپام-اي...

رەداكتسيادان: Abai.kz اقپاراتتىق پورتالىنىڭ ۇجىمى ەسىمى كۇللى قازاققا بەلگىلى تەاتر جانە كينو اكتريساسى، قازاقستاننىڭ ەڭبەك سىڭىرگەن ءارتىسى عازيزا ابدىنابيەۆانىڭ وتباسى مەن تۋىستارىنا قايعىرىپ كوڭىل ايتامىز...

Abai.kz