سارسەنبى, 23 ماۋسىم 2021
بيلىك 2137 2 پىكىر 7 مامىر, 2021 ساعات 13:23

پرەزيدەنت پرەمەردى قابىلدادى

قاسىم-جومارت توقاەۆقا سانيتارلىق-ەپيدەميولوگيالىق احۋال، حالىققا ۆاكتسينا سالۋ بارىسى، سونداي-اق، ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تۋرالى باياندالدى. بۇل تۋرالى akorda.kz سايتى جازدى. 

اسقار مامين ەلىمىزدەگى سانيتارلىق-ەپيدەميولوگيالىق جاعدايدىڭ تۇراقتانعانىن ايتتى. ول COVID-19 ىندەتىنىڭ تارالۋ قارقىنى بويىنشا قازاقستاننىڭ «قىزىل» ايماقتان «سارى» ايماققا وتكەنىن اتاپ ءوتتى. ازاماتتاردى ۆاكتسينالاۋ قارقىنى ارتىپ كەلەدى. 1 ميلليون 565 مىڭ ادامعا ءبىرىنشى كومپونەنت سالىنسا، 460 مىڭ ادامعا ەكىنشى كومپونەنت ەگىلگەن. 1 ءساۋىر مەن 5 مامىر ارالىعىندا تاۋلىكتىك ۆاكتسينا سالۋ قارقىنى 12,6 ەسە وسكەن. كەشە قازاقستاندا 140 مىڭعا جۋىق ادام ۆاكتسينا سالدىرعان.

پرەمەر-مينيستر پرەزيدەنتكە بيزنەستى قولداۋ جۇمىستارى جايىندا مالىمەت بەردى. قىزمەت كورسەتۋ سالاسىندا «ASHYQ» قوسىمشاسىن پايدالانۋ ءىسى بەلسەندى تۇردە ارتىپ كەلە جاتقانى ايتىلدى. قازىرگى ۋاقىتتا جۇيە 3 مىڭنان استام بيزنەس سۋبەكتىلەرىن جانە ەلىمىزدىڭ 720 مىڭ تۇرعىنىن قامتىپ وتىر.

ۇندىستانداعى سانيتارلىق-ەپيدەميولوگيالىق جاعدايدىڭ كۇرت ناشارلاۋىنا بايلانىستى مەملەكەت باسشىسى ۇكىمەتكە اتالعان ەلگە 6 ميلليون مەديتسينالىق ماسكا، 400 مىڭ رەسپيراتور، 50 مىڭ وباعا قارسى ارنايى كيىم جانە ەلىمىزدە وندىرىلگەن 105 جاساندى جولمەن دەم بەرۋ اپپاراتتارىن گۋمانيتارلىق كومەك رەتىندە جىبەرۋدى تاپسىردى.

قاسىم-جومارت توقاەۆقا جاپپاي كاسىپكەرلىكتى دامىتۋدىڭ جاڭا تاسىلدەرى، سونداي-اق، ناتيجەلى جۇمىسپەن قامتۋ، ازىق-تۇلىك تاۋارلارىنىڭ باعاسىن ۇستاپ تۇرۋ شارالارىن ىسكە اسىرۋ تۋرالى اقپارات بەرىلدى. مونوپولياعا قارسى شارالار اياسىندا ۇكىمەت بيزنەس سۋبەكتىلەرىنىڭ اراسىندا باعاعا قاتىستى ءسوز بايلاسۋدى بولدىرماۋ جونىندە جۇمىس جۇرگىزۋدە.

ۇكىمەت باسشىسى نەگىزگى 29 ازىق-تۇلىك تاۋارىنىڭ 23-ءى بويىنشا ازىق-تۇلىك قاۋىپسىزدىگىنىڭ دەڭگەيى قامتاماسىز ەتىلگەنىن، قالعان تۇرلەرى بويىنشا نارىقتىڭ ىشكى وندىرىسپەن قامتاماسىز ەتىلۋ كورسەتكىشى 80 پايىزدان تومەن ەكەنىن اتاپ ءوتتى. ۇلتتىق ەكونوميكانىڭ ءوزىن-ءوزى قامتۋ شارالارى شەڭبەرىندە بيىل 35 ءسۇت-تاۋار فەرماسى، 2200 گەكتار باق، 3 ەت كومبيناتى، 5 قۇس فابريكاسى، بالىق وندىرەتىن 4 شارۋاشىلىق ىسكە قوسىلادى.

سونىمەن قاتار ازىق-تۇلىكتى تۇراقتاندىرۋ قورلارى قۇرىلدى، اينالىمعا قاجەتتى قاراجات ءبولىندى، ولارعا ازىق-تۇلىك جەتكىزۋدى قامتاماسىز ەتۋ ءۇشىن الدىن الا ساتىپ الۋ جۇزەگە اسىرىلدى.

اڭگىمەلەسۋ بارىسىندا شەتەلدىك ينۆەستيتسيالاردى ەل ەكونوميكاسىنا تارتۋ جونىندە قابىلدانىپ جاتقان شارالار قاراستىرىلدى.

كەزدەسۋ سوڭىندا پرەزيدەنت حالىققا ۆاكتسينا سالۋ جۇمىسىنىڭ قارقىنىن تومەندەتپەۋدى، ازىق-تۇلىك تاۋارلارىنىڭ باعاسىن باقىلاۋدا ۇستاۋدى تاپسىردى. مەملەكەت باسشىسى وتە قىسقا ۋاقىتتا كوروناۆيرۋسقا قارسى ۆاكتسينا جاساپ، ونى دۇنيەجۇزىلىك دەنساۋلىق ساقتاۋ ۇيىمىنا تىركەگەن قازاقستاندىق مامانداردىڭ ەڭبەگىن وڭ باعالادى.

Abai.kz

2 پىكىر