سارسەنبى, 16 ماۋسىم 2021
اراشا 3939 6 پىكىر 18 مامىر, 2021 ساعات 16:31

«يسلام ابىشەۆكە ءبىز كەپىل بولامىز»

قر نۇر-سۇلتان قالالىق سوت القالارى باسشىلارىنا

كەپىلدىك حات!

ءبىز ءباسپاسوز قۇرالدارى ارقىلى 2021 جىلى 20 مامىردا يسلام ابىشەۆتىڭ سوتى بولعالى جاتقانى جونىندەگى حابار الدىق.

ارينە، سوتتىڭ جۇمىسىنا ارالاسۋعا قۇقىمىز جوق، دەگەنمەن قازاقتىڭ اتپالداي ازاماتىنىڭ تاعدىرى ءبىزدى ەرىكسىز قولىمىزعا قالام الدىرىپ، ءوز ويىمىزدى بىلدىرۋگە تۋرا كەلدى.

«پارا الۋعا وقتالدى» - دەپ سوت بەس جىلعا سوتتادى. بۇگىنگى تاڭدا 3,5 جىل جازاسىن وتەپتى. باق بەتتەرىندەگى مامانداردىڭ ايتۋىنشا ەندىگى جەردە شارتتى تۇردە بوستاندىققا شىعۋعا تولىعىمەن زاڭدى نەگىز بار دەيدى. كوپتەگەن ازاماتتاردىڭ وسىلايشا بوستاندىققا شىققانىنان دا حاباردارمىز.

ءبىز نە ءۇشىن بۇل ازاماتقا ارا ءتۇسىپ وتىرمىز:

بىرىنشىدەن جاس كەزىنەن باستاپ ونەر مەن ادەبيەتكە جاقىن بولىپ، جاناشىرلىق تانىتىپ كەلەدى. سوناۋ توقسانىنشى جىلدارى بولعان قيىن قىستاۋ كەزىندە كوپتەگەن جاس اقىن، جازۋشىلارعا قول ۇشىن بەرىپ، ولاردىڭ ەڭبەكتەرىنىڭ جارىق كورۋىنە ۇلكەن كومەگىن تيگىزدى.

2013 جىلى بۇكىل قازاقستان بويىنشا ءالى بىردە-ءبىر كىتابى شىقپاعان اقىنداردىڭ ولەڭدەرىن جيناستىرىپ، ءار وبلىستىڭ اقىندارىنىڭ ولەڭدەرىن جيناق ەتىپ 17 كىتاپ شىعارتتى.

كوپتەگەن انشىلەردىڭ شەت ەلدىك كونكۋرستارعا قاتىسۋلارىنا سەپتىگىن تيگىزدى. ولاردىڭ ىشىندە جەڭىمپاز بولىپ كەلگەندەرى دە از ەمەس. حالىق ىشىندەگى تالانتتى جاس سۋرەتشىلەردى، مۇسىنشىلەردى، قولونەرشىلەردى قولداپ اتقارعان تىرلىكتەرى جەتىپ ارتادى.

كەشە قامالعانعا دەيىن 10 جىلعا جۋىق ەلىمىزدىڭ جىل سايىن 50-دەن استام ادەبيەت پەن ونەر سالاسىنداعى جاس تالانتتارى مەن ابىز اقساقالدارىن ارالاستىرا وتىرىپ قازاقستاننىڭ تۇكپىر-تۇكپىرىندەگى دەمالىس ورىندارىنا جىبەرىپ وتىرۋى دا اۋىز تولتىرىپ ايتارلىق ءىس. وسى كەزدەسۋلەردە قانشاما ونەر تۋىندىلارى پايدا بولدى. مۇنىڭ بارلىعى وتانىمىزدىڭ رۋحاني قازىناسى.

جۇمىس جاعىنا كەلەتىن بولساق، ول قاي جەردە جۇمىس اتقارماسىن ەلدىڭ راحمەتى مەن العىسىن الىپ جۇرگەنىن ىلعي ەستىپ وتىرامىز. اسىرەسە وسكەمەن قالاسىنىڭ اكىمى قىزمەتىن اتقارعان كەزدەگى ەڭبەگى ەرەسەن زور. دانىشپان ءال-ءفارابيدىڭ قايىرىمدى قالانىڭ باسشىسى قالاي بولۋى كەرەك دەگەن ەڭبەگىنە جاۋاپتىڭ ناعىز ءوزى دەسەك تە بولادى.

بۇعان دالەل: قالا حالقىنىڭ 1000-نان استامى، قاراپايىم قازاعى بار، ورىسى بار، جاس-كارىسى بار پىسىرگەن باۋىرساعى مەن ءبالىشىن الىپ، يسلامدى شىعارىپ سالۋعا اەروپورتقا جينالۋى. مۇنداي باق، مۇنداي باسشىعا دەگەن قۇرمەت، مىڭنىڭ بىرىندە بولا بەرمەيدى.

ەلىمىزدىڭ سۋ سالاسىندا دا تالاي وڭدى جۇمىستاردى اتقارعانىن ەستىپ، كورىپ، ءبىلىپ ءجۇرمىز.

اۋقىمدى جۇمىستاردى اتقارا ءجۇرىپ، بيۋدجەتتىڭ 1,0 تريلليوننان استام قارجىسىن ۇنەمدەۋى بۇرىن-سوڭدى بولماعان فەنومەن دەپ ايتۋعا بولادى.

وقتالدى دەپ سوتتاۋىن سوتتالدى، ەندىگى جەردە زەينەتتەگى 65-تەن اسقان جاسى مەن سىر بەرىپ جۇرگەن دەنساۋلىعىن ەسكەرىپ، بوستاندىق بەرۋلەرىڭىزدى سۇرانامىز.

حاتىمىزدى كەپىلدىك حات دەپ اتاۋىمىزداعى ويىمىز، يسلامدى بوستاندىققا شىعارعاننان قوعامعا، ەلگە، حالىققا ينەدەي دە زيان تيمەيتىنىنە ءبىز تولىعىمەن كەپىل بولا الامىز جانە دە قازاقستاننىڭ ادەبيەت پەن ونەر سالاسىنداعى ازاماتتاردىڭ باسىم كوپشىلىگى جالپى حالىقتىڭ دا وسىنداي ويدا ەكەندىگىنە سەنىمدىمىز.

قۇرمەتپەن:

1. ۇلىقبەك ەسداۋلەت – اقىن، قازاقستان جازۋشىلار وداعىنىڭ توراعاسى، قر مەملەكەتتىك سىيلىعىنىڭ لاۋرەاتى.

2. دۋلات يسابەكوۆ – جازۋشى، دراماتۋرگ، قر مەملەكەتتىك سىيلىعىنىڭ لاۋرەاتى.

3. بەكسۇلتان نۇرجەكەەۆ – جازۋشى، قر مەملەكەتتىك سىيلىعىنىڭ لاۋرەاتى، قر ەڭبەك سىڭىرگەن قايراتكەرى.

4. تولەن ابدىك، جازۋشى، قر مەملەكەتتىك سىيلىعىنىڭ لاۋرەاتى، قر ەڭبەك سىڭىرگەن قايراتكەرى.

5. سماعۇل ەلۋباەۆ– جازۋشى، قر ەڭبەك سىڭىرگەن قايراتكەرى، حالىقارالىق «الاش» سىيلىعىنىڭ لاۋرەاتى.

6. كادىربەك سەگىزباەۆ– جازۋشى، قر ەڭبەك سىڭىرگەن قايراتكەرى، «پاراسات» وردەنىنىڭ يەگەرى.

7. مارحابات بايعۇت– جازۋشى، قر ەڭبەك سىڭىرگەن قايراتكەرى، حالىقارالىق «الاش» سىيلىعىنڭ لاۋرەاتى.

8. ءحانبيبى ەسەنقاراقىزى– اقىن، قر ەڭبەك سىڭىرگەن قايراتكەرى، حالىقارالىق «الاش» سىيلىعىنىڭ لاۋرەاتى، «پاراسات» وردەنى مەن رەسەيدىڭ «ەسەنين» التىن مەدالىنىڭ يەگەرى.

9. كوپەن امىربەكوۆ– اقىن، قر ەڭبەك سىڭىرگەن قايراتكەرى، قر پرەزيدەنتى سىيلىعىنىڭ، حالىقارالىق «الاش» سىيلىعىنىڭ لاۋرەاتى.

10. عالىم جايلىباي – اقىن، قر ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، حالىقارالىق «الاش» سىيلىعىنىڭ لاۋرەاتى.

11. مارات ءبايدىلداۇلى – جۋرناليست-جازۋشى، قر پەداگوگيكا عىلىمى اكادەمياسىنىڭ اكادەميگى.

Abai.kz

6 پىكىر