باس پروكۋراتۋرا ەلىمىزدە ادام اعزاسىن ساۋدالاۋ دەرەگى كوبەيگەنىن ايتىپ دابىل قاقتى. ءبىر جىلدا مۇنداي 57 قىلمىس تىركەلگەن. بۇل تۋرالى Arasha.kz-كە سىلتەمە جاساپ Abai.kz حابارلايدى. 

قىزىلوردا قالاسىنىڭ تۇرعىنى قارىزدان قۇتىلۋ ءۇشىن امالسىزدان بۇيرەگىن ساتۋعا ءماجبۇر. كرەديت كەڭىردەكتەن، ءوسىم پۇل القىمنان الدى دەپ جىلايدى ول. كەلىنشەكتىڭ بۇل تىرلىگى قانشالىقتى زاڭدى؟ ەلىمىزدە اعزاسىن ساتاتىندار كوپ پە؟ ماماندار نە دەيدى؟ «استانا» تەلەارناسىنىڭ تىلشىلەرى وسىنداي سان ساۋالدىڭ جاۋابىن ىزدەپ، ارنايى سيۋجەت جاريالادى.

31 جاستاعى كەلىنشەكتىڭ التى بالاسى بار. ءوزى جۇمىسسىز. جولداسىنىڭ تابىسى ءىشىپ-جەمنەن ارتىلمايدى. سوندىقتان ايەل بالا-شاعانىڭ كەم-كەتىگىن تۇگەندەيمىن دەپ ءجۇرىپ قارىزعا بەلشەدەن باتقان. ونى قايتارا المايدى. بەرەشەگىن سۇراپ كۇندە بىرەۋ كەلەدى. بار امالى – بۇيرەگىن ساتىپ، قارىزدان قۇتىلۋ.

قىزىلوردا قالاسىنىڭ تۇرعىنى وسى ماسەلەمەن كىسىلەر كۇندە كەلىپ مازالايتىنىن دا ايتادى.

«ءتىپتى، كىشكەنتاي ءبىر جاسار قىزىمدى دا، بىزگە بەر دەپ ايتتى. ءيا، بالانى ماعان بەر، اقىرى تولەي المايسىڭ دەيدى. كىم بالاسىن قيىپ بەرەدى. ايتىڭىزشى، ەشكىم بالاسىن قيمايدى عوي قانداي جاعداي بولماسىن. سوعان قاتتى نالىدىم»، – دەيدى كۇيىنگەن كوپبالالى انا.

كەلىنشەكتىڭ ايتۋىنشا، اعزاعا قارا نارىقتا سۇرانىس بار. كۇندە حابارلاسىپ، بۇيرەكتى ساۋدالايتىندار كوپ.

«جەتى ميليون تەڭگە دەپ ايتتىم. ماعان ءبىر كىسى حابارلاسىپ، بالاسىنىڭ بۇيرەككە ءزارۋ ەكەنىن ايتىپ، تەگىن بەرۋدى سۇرادى. مەن ونى تەگىن بەرەتىندەي ولەيىن دەپ جاتقان جوقپىن عوي. ءوزىم قارىزعا باتىپ، مۇقتاج بولىپ تۇرمىن. رەنجىمەڭىز دەدىم. اقىعا عانا دەدىم. ودان كەيىن دە بىرنەشە ادام قوڭىراۋ شالدى»، – دەيدى ول.
Ranker.com سايتىنىڭ مالىمەتى بويىنشا، قارا بازاردا بۇيرەكتىڭ باعاسى اقش–تا 200 مىڭ دوللار. ال قىتاي مەن ءۇندىستاندا بۇدان ءسال ارزان. بارلىق ەلدە بۇيرەككە سۇرانىس جوعارى.

نۇر-سۇلتانداعى ترانسپلانتتاۋ ورتالىعىنىڭ مالىمەتىنشە، بۇيرەك جەتىسپەۋشىلىگىمەن ەسەپتە تۇرعاندار سانى ءۇش مىڭنان اسادى. وكپە، باۋىر، جۇرەككە دە سۇرانىس جوق ەمەس. ورتالىقتا اعزانى اۋىستىرۋ تەگىن جۇرگىزىلەدى. ول ءۇشىن دونورلارعا اقشا تولەنبەيدى. تەك، زاڭدى جولمەن، ءتيىستى تالاپتارمەن عانا قابىلدانادى. ال ءوز ەركىمەن دەنە مۇشەسىن ساۋدالاعاندار جازاعا تارتىلادى.

«ادامنىڭ اعزالارى مەن تiندەرiن الۋعا ماجبۇرلەۋ نەمەسە زاڭسىز الۋ فاكتىلەرى قىلمىستىق كودەكستىڭ 116-بابى بويىنشا تەرگەلەدى. ءدال وسى قىلمىستار ابايسىزدا جابiرلەنۋشiنىڭ ولىمىنە نەمەسە وزگە دە اۋىر زارداپتارعا اكەپ سوققان جاعدايدا نەمەسە مۇنى قىلمىستىق توپ جاساعان بولسا، سەگىز جىلدان ون ەكى جىلعا دەيiنگi مەرزiمگە باس بوستاندىعىنان ايىرۋعا جازالانادى»، – دەيدى ىشكى ىستەر ءمينيسترىنىڭ كەڭەسشىسى ءنۇردىلدا وراز.

ال پسيحولوگ مامانداردىڭ پىكىرىنشە، قارجىلىق قيىندىقتار تۋىنداعان كەزدە ادامنىڭ مىنەز-قۇلقى وزگەرەدى. بۇل ونى ءتۇرلى ارەكەتكە يتەرمەلەۋى مۇمكىن دەيدى.

«مىسالعا، مۇنى شاراسىزدىق دەپ ايتاتىن شىعارمىز. بۇل ەندى ءوزىن-ءوزى قۇنسىزداندىرۋ. ءومىردىڭ، ول ءۇشىن قۇندى دۇنيە جوق دەگەن سەكىلدى. قازىر قۇندىلىقتاردىڭ وتە تومەندەپ كەتكەن ۋاقتىسى دەپ، ايتىپ جاتىرمىز. بۇل دا ءبىر سونىڭ ءتۇرى دەپ ايتۋعا بولادى»، – دەيدى پسيحولوگ ليمانا قويشيەۆا.

وقي وتىرىڭىز: دارىگەر جۇرتتى دونور بولۋعا قاتىستى ۇستانىمىن ءتىرى كەزىندە ءبىلدىرىپ كەتۋگە ۇندەدى

قانشا جەردەن جوقشىلىق جاعادان الىپ، ءوسىم پۇل اياقتان تارتسا دا زاڭسىز ارەكەتكە جول جوق. جازا اۋىر. بىراق ونى ەشكىم ەسكەرمەيتىن سەكىلدى. ويتكەنى، باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنشە، ادام اعزالارىن ساۋدالاۋ بويىنشا وتكەن جىلى ەلىمىزدە 57 قىلمىستىق ءىس تىركەلگەن.

Abai.kz