زەلەنسكي بەيسەنبى كۇنى پۋتينگە جازعان اشىق حاتىندا ءتورت جىلدان استام ۋاقىتقا سوزىلعان سوعىستى ەكەۋارا بەتپە-بەت كەزدەسىپ شەشۋدەن ءۇمىتتى ەكەنىن مالىمدەپ، «مەن كەزدەسۋ ۇيىمداستىرۋدى ۇسىنامىن»، - دەدى.

زەلەنسكي اشىق حاتىندا كەزدەسۋدى مۇمكىندىگىنشە تەزىرەك وتكىزۋدى، كەلىسسوزدەر كەزىندە ۋكراينا تارابى اتىستى تولىقتاي توقتاتاتىنىن اتاپ ءوتتى. بەيبىت كەلىسسوزدەرگە ەۋروپا مەن امەريكا قۇراما شتاتتارىنىڭ دا  قاتىسۋى كەرەكتىگىن ناقتىلادى.

زەلەنسكي حاتىندا: «الدىنعى مايدان شەبى - كەلىسسوزدەردىڭ باستالار نۇكتەسى بولۋى كەرەك»، - دەپ جازدى.

ۋكراينا بۇعان دەيىن ديپلوماتيالىق كەلىسسوزدەردى ىلگەرلەتۋ ءۇشىن بىرنەشە رەت ۇزاق مەرزىمدى اتىستى توقتاتۋدى ۇسىنعان بولاتىن، بىراق رەسەي اتىستى توقتاتۋ ۋكرايناعا ارمياسىن قايتا قۇرۋعا جانە كۇشتەرىن تولىقتىرۋعا مۇمكىندىك بەرەدى دەپ، ۇسىنىستان باس تارتىپ  كەلەدى.

زەلەنسكيدىڭ پۋتينگە اشىق حاتى جاريالانعاننان كەيىن، رەسەي پرەزيدەنتىنىڭ ءباسپاسوز حاتشىسى دميتري پەسكوۆ زەلەنسكيدىڭ «كەز كەلگەن ۋاقىتتا ماسكەۋگە كەلە الاتىنىن» ​​مالىمدەدى.

دەگەنمەن، پەسكوۆ ءپۋتيننىڭ ءوزى اشىق حاتتى ءالى كورمەگەنىن دە تىلگە تيەك ەتتى.

رەسەي پرەزيدەنتى پۋتين زەلەنسكيدىڭ كەزدەسۋ تۋرالى ۇسىنىسىنا ازىرگە تىكەلەي جاۋاپ بەرگەن جوق.

پۋتين بۇدان بۇرىن رەسەي مەن ۋكراينا بەيبىتشىلىك كەلىسىمگە قول قويعاننان كەيىن عانا، زەلەنسكيمەن رەسمي كەزدەسۋ وتكىزۋگە بولاتىنىن مالىمدەگەن بولاتىن.

اقش پرەزيدەنتى ترامپ بەيسەنبى كۇنى رەسەي مەن ۋكراينا پرەزيدەنتتەرىنىڭ كەزدەسۋىن قۇپتايتىنىن جەتكىزدى. سوپاقشا كابينەتىندە تىلشىلەرگە بەرگەن سۇحباتىندا ترامپ پۋتين مەن زەلەنسكي كەزدەسىپ جاستا، «جاقسى ىرىم» بولاتىنىن ايتتى. ترامپ: «ولاردىڭ كەزدەسۋ تۋرالى تالقىلاپ جاتقانىن كورگەنىمە وتە قۋانىشتىمىن. مەنىڭ ويىمشا، ءبىز بۇعان ۇلەس قوستىق... ەگەر ولار بەتپە-بەت كەزدەسە السا، بۇل وتە جاقسى نارسە بولار ەدى»، - دەدى.

ساراپشىلار «ەكى تاراپ اراسىندا اتىستى توقتاتۋ شارتتارى، اۋماقتىق داۋلار جانە كەلىسسوزدەر شەڭبەرى سياقتى ماڭىزدى ماسەلەلەر بويىنشا ايتارلىقتاي كەلىسپەۋشىلىكتەر ساقتالعانىمەن، زەلەنسكيدىڭ كەزدەسۋ تۋرالى جاريا ۇسىنىسى جانە كرەملدىڭ جەدەل جاۋابى ەكى تاراپ اراسىندا  ديپلوماتيالىق بايلانىستىڭ ءالى دە ساقتالىپ وتىرعانىن كورسەتەدى» دەيدى.

Abai.kz