«جۋرناليستيكانىڭ «ەڭ قۇرمەتتى ماماندىق» مارتەبەسىن قايتارۋعا مىندەتتىمىز»
اقپارات جانە قوعامدىق دامۋ ءمينيسترى ايدا بالاەۆا جۋرناليستەردىڭ بىلىكتىلىگىن ارتتىرۋ ءۇشىن قانداي شارالار جاسالعانىن ايتتى.
«جاسىراتىن نەسى بار، سوڭعى جىلدارى تەك قازاقستاندا عانا ەمەس، كوپتەگەن الەم ەلدەرىندە كاسىبي باق شەتتە قالىپ قويدى. سۇرانىستىڭ جوقتىعى كوزگە ۇرىپ تۇردى، مۇنىڭ سەبەبىن جۋرناليستەردىڭ ءوزى دە جەتە تۇسىنە المادى. جۋرناليستەر ماماندىعىن تاستاپ، باسقا سالاعا كەتۋگە ءماجبۇر بولدى – فريلانس، پيار، بلوگەر. مەن تالاي رەت ايتتىم جانە تاعى دا قايتالايمىن: كاسىبي جۋرناليستيكا – تاڭداۋلىلاردىڭ، ءوز ىسىنە جاناشىر، باتىل جانە مىقتى ادامداردىڭ كاسىبى. جانە ءبىز وعان ەڭ قۇرمەتتى ماماندىقتاردىڭ ءبىرى دەگەن مارتەبەنى قايتارۋعا مىندەتتىمىز»، - دەيدى ايدا بالاەۆا «Sputnik قازاقستان» پورتالىنا بەرگەن سۇحباتىندا.
اقپارات ءمينيسترى بەيىندى فاكۋلتەت تۇلەكتەرىنىڭ دەڭگەيىن كوتەرۋ، جۇمىس ىستەيتىن كادرلاردىڭ بىلىكتىلىگىن ارتتىرۋ جانە سالالىق، وڭىرلىك جۋرناليستيكانى دامىتۋ سىندى بىرقاتار شارا جاسالعانىن اتاپ ءوتتى.
«قازىر پاندەميادان تۋىنداعان كەيبىر قيىندىقتارعا قاراماستان، ءبىز بەيىندى جوعارى وقۋ ورىندارىمەن ەتەنە ىنتىماقتاسا جۇمىس ىستەپ جاتىرمىز: ستۋدەنتتەرگە ەلدىڭ ۇزدىك رەداكتسيالارىندا پراكتيكادان وتۋگە مۇمكىندىك بەرەمىز، وتاندىق جانە تۇركيا، ۇلىبريتانيا، رەسەي سياقتى شەتەلدىك جۋرناليستيكانىڭ كوريفەيلەرىمەن سەمينار وتكىزەمىز. جىل باسىنان بەرى مەديتسينا، ءدىني جانە ەكولوگيا جۋرناليستيكاسى بويىنشا ءۇش وقىتۋ كۋرسى وتكىزىلىپ، ەلدىڭ بارلىق وڭىرىنەن 4 مىڭعا جۋىق ادام قامتىلدى. بۇل – بولاشاقتا كەڭەيتىلىپ، جەتىلدىرەتىن ۇزاق مەرزىمدى جوبالار»، - دەدى ۆەدومستۆو باسشىسى.
سونىمەن بىرگە، ايدا بالاەۆا جۋرناليستيكا فاكۋلتەتى تۇلەكتەرىنىڭ جۇمىسپەن قامتىلۋى ماسەلەسى قالاي شەشىلەتىنىن ايتتى.
«بۇل ماسەلە جوو-لاردىڭ باسشىلىق قۇرامىمەن جانە وتاندىق باق-پەن كەزدەسۋلەردە تالاي رەت كوتەرىلىپ، تالقىلاندى. تاجىريبە مەن پىكىر الماسۋ قورىتىندىسى بويىنشا ستۋدەنتتەردى وندىرىستىك پروتسەسكە كوبىرەك تارتىپ، پراكتيكالىق داعدىلارىن دامىتۋ قاجەت دەگەن توقتامعا كەلدىك. مەديا سالاسى ماماندارىن وقىتۋ جونىندەگى ارنايى جوسپار اياسىندا وتاندىق باق-تا تاجىريبە مەن تاعدىلىمداما ۇيىمداستىرۋ جوسپارلانىپ وتىر. اتالعان جۇمىس مەملەكەتتىك باق جانە جوعارى وقۋ ورىندارىمەن بىرلەسىپ جۇرگىزىلەدى. وعان قوسا، جوعارى وقۋ ورىندارىمەن بەكىتىلگەن مەموراندۋم اياسىندا ستۋدەنتتەر اراسىندا كەلەشەكتە جۇمىسقا ورنالاستىرۋ ماقساتىندا كاسىپتىك-باعدارلىق جۇمىس جۇرگىزۋ قاراستىرىلعان. ءبىز تەك وسىلاي عانا تۇلەكتەردىڭ سۇرانىسى مەن ىنتا-ىقىلاسىن ارتتىرامىز»، - دەيدى ايدا بالاەۆا.
Abai.kz
