9 ماۋسىمدا ءوزدەرىن ۇلتتىق مءۇددەنى قورعاۋ كەڭەسىنىڭ مءۇشەلەرىمىز دەپ اتاعان ون شاقتى بەلسەندى اقورداعا بارىپ, بيلىكتى ديالوگقا شاقىرىپ, پەتيتسيا مەن كەڭەستىڭ قارارىن تاپسىرۋعا تىرىستى. ءبىراق پرەزيدەنت ءاكىمشىلىگىنەن ەشكىم شىقپادى.

پەتيتسيادا پرەزيدەنتتىڭ كونستيتۋتسيا كەپىلى رەتىندە ادامداردىڭ ەركىن بىرىگۋىنە مۇمكىندىك بەرۋى ءتيىس ەكەنى، رەفەرەندۋم ارقىلى ساياسي پارتيالار تۋرالى جاڭا زاڭ قابىلداپ، پارتيانى تىركەۋدى جەڭىلدەتۋ قاجەتتىگى تۋرالى تالاپتار جازىلعان. پەتيتسيانىڭ سوڭعى تارماعىندا تالاپتارى ورىندالماسا، ازاماتتاردى جاپپاي ەرەۋىلگە شاقىراتىنىن ەسكەرتكەن.

جينالعاندار اراسىندا تىركەلمەگەن "ەل تىرەگى", "قازاقستاننىڭ دەموكراتيالىق پارتياسى", "الاش" پارتياسى جانە بىرنەشە تىركەلمەگەن كوپ بالالى انالار ۇيىمى مەن قوعامدىق ۇيىم وكىلدەرى بولدى.

الدىمەن كوشەدە جينالىپ، پەتيتسياعا قول قويعان بەلسەندىلەر كەيىن ونى پرەزيدەنت اكىمشىلىگىنە اپارىپ، قۇزىرلى ورگان وكىلدەرىن ديالوگقا شاقىرعىسى كەلگەن. بىراق پوليتسيا ولاردى اقورداعا اپاراتىن اسپالى كوپىرمەن جۇرگىزبەدى. ولاردىڭ جولىن بوگەگەن پوليتسيا قىزمەتكەرىنىڭ تۇسىندىرۋىنشە، "نۇر-سۇلتان ازىرگە قىزىل ايماقتان شىقپاعان جانە اسپالى كوپىرمەن تەك مەملەكەتتىك قىزمەتكەرلەر عانا جۇرە الادى".

بۇعان جينالعاندار نارازىلىق ءبىلدىرىپ، "ديسكريميناتسيا" دەپ ايقايلادى. سالدەن سوڭ ولار پەتيتسيانى پرەزيدەنت اكىمشىلىگىندەگىلەرگە تاپسىرۋ ءۇشىن ول جاققا باسقا جولمەن باردى. پرەزيدەنت اكىمشىلىگى نارازى توپتى ساعاتتاپ كۇتتىرىپ، كەيىن اينالاداعى پوليتسيا ارقىلى تەك ءۇش ادامدى قابىلدايتىنىن حابارلادى. بۇعان جينالعاندار كەلىسپەدى.

– بۇل كەڭەسكە 24 ۇيىم كىرىپ وتىر. "ەل تىرەگى", قدپ، كوپ بالالى انالار ۇيىمى بار. مەن "كوشە پارتياسى" اتىنان ارقالىقتان كەلىپ تۇرمىن. جۇرگىزۋشىلەر كەلە الماي قالدى. سوندا قالاي ءۇش ادامدى قابىلدايدى؟ بۇل جەكە ادام مۇددەسى ەمەس، ەلدىڭ مۇددەسى،- دەدى ازاماتتىق بەلسەندى نۇرلان التىباەۆ.

ونىڭ ءسوزىن قوشتاعان ۇلتتىق مۇددە كەڭەسىنىڭ ۇيلەستىرۋشىسى بولاتبەك ءبىلالوۆ اقوردا وزدەرىن قابىلداماي، پىكىرلەسۋگە شىقپاعاندىقتان "پەتيتسيانىڭ ءتورتىنشى تارماعىنا ساي، جاپپاي ميتينگىگە شىعۋدان باسقا جول قالمادى" دەپ مالىمدەپ، تارقاپ كەتتى.

جينالعانداردى پوليتسيا مەن ارنايى جاساق باقىلاپ تۇردى، بىراق تيىسپەدى.

2020 جىلى قازاقستاندا ساياسي پارتيالار تۋرالى زاڭعا وزگەرتۋلەر ەنگىزىلدى. ەگەر بۇرىن ساياسي پارتيا تىركەتۋ ءۇشىن كەمىندە 40 مىڭ ادامنىڭ قولى قاجەت بولسا، جاڭا وزگەرتۋلەرگە ساي 20 مىڭ ادامنىڭ قولى جەتكىلىكتى. بيلىك بۇل وزگەرتۋلەردى "دەموكراتيالىق رەفورما" دەپ سيپاتتاعانمەن، وپپوزيتسيا مەن تاۋەلسىز قۇقىق قورعاۋشىلار – "كوسمەتيكالىق سىلاپ-سيپاۋ، بولماشى وزگەرىس" دەپ اتادى.

Abai.kz