تۇركيادا ەكى جىلدان كەيىن سايلاۋ. قازىردىڭ وزىندە تۇرىك قوعامى بۇل تاريحي ماڭىزى بار وقيعاعا دايىندالىپ جاتىر. ارينە ەڭ الدىمەن ساياسي جانە ەكونوميكالىق زەرتتەۋ ورتالىقتارى ءتۇرلى ساۋالنامالار وتكىزۋدە. ولاردىڭ زەرتتەۋلەرى ءتۇرلى باعىتتى قامتيدى. ەردوعاننىڭ جەتىستىكتەرى مەن كەمشىلىكتەرى، قاي تۇرعىدان العا جىلجۋ بار، قازىر سايلاۋ وتسە كىمگە داۋىس بەرەر ەدىڭىز جانە ت.ب سۇراقتارعا جاۋاپ ىزدەۋگە تىرىسادى. 

تۇركيانى 2002 جىلدان بەرى باسقارىپ كەلە جاتقان ادىلەت جانە دامۋ پارتياسى وتكەن ايدا جالپى سايلاۋلار وتكىزىلسە، بۇكىل ەل بويىنشا شامامەن 25 پايىز داۋىسقا يە بولار ەدى. بۇنداي قورىتىندىنى  AكAM زەرتتەۋ ورتالىعى جۇرگىزگەن ساۋالناماعا سايكەس وپپوزيتسيالىق  "Turkish Minute" باسىلىمى كەشە جاريالادى.

وتكەن سارسەنبىدە AKAM پرەزيدەنتى كەمال وزكيراز جاريالاعان زەرتتەۋ ناتيجەلەرى وتە قىزىق بولىپ شىققان. ارينە، بۇل بيلىكتى سىناپ كەلە جاتقان زەرتتەۋ ورتالىعى بولعاندىقتان، ونىڭ ناتيجەلەرىن ءجۇز پايىز شىنايىلىق دەپ تە قابىلداۋ قاتەلىك بولار ەدى. زەرتتەۋ ناتيجەسىنە سۇيەنە وتىرىپ ماۋسىم ايىندا سايلاۋ وتكىزىلگەن بولسا، وندا رەجەپ تايىپ ەردوعان پرەزيدەنتتىككە ۇمىتكەر بولۋى مۇمكىن ءتورت ىقتيمال قارسىلاستارىنان دا جەڭىلىس تابار ەدى دەيدى باسىلىم.

"ەردوعاننىڭ سايلاۋدا جەڭىسكە جەتۋگە مۇمكىندىگى جوق، ول قانداي ستسەناري بولماسىن جەڭىلىس تابار ەدى" دەيدى وزكيراز.

بيلىكتەگى اكپ مەن ونىڭ ساياسي وداقتاسى "ۇلتشىل قوزعالىس پارتياسىنان" 2018 وتكەن جالپى سايلاۋدا 53,6 پايىز داۋىس جيناعان "حالىقتىق اليانس" باعالاعان پىكىرلەر ايتارلىقتاي قۇلدىرادى. ماۋسىم ايىندا سايلاۋ بولسا ەردوعاننىڭ پارتياسى پارلامەنتتىك سايلاۋدا 25% داۋىسپەن قاناعاتتانسا، دەۆلەت باحچەلىنىڭ ساياسي پارتياسى 6%-دى قانجىعاعا بايلار ەدى دەيدى زەرتتەۋ ناتيجەلەرى.

ساۋالنامادا جەتەكشى وپپوزيتسيالىق رەسپۋبليكالىق حالىق پارتياسى (RPP), وڭشىل "جاقسى پارتياسى" (İYİ) جانە كونسەرۆاتيۆتى "باقىت پارتياسى" (SP) سايكەسىنشە 22,9%، 12,8% جانە 1,2% داۋىس العان.

باسقا وپپوزيتسيالىق ساياسي بىرلەستىكتەر كەلەسى ناتيجەلەردى كورسەتتى: كۇردتەردى قولدايتىن "حالىقتىق دەموكراتيا پارتياسى" - 9,4%، بۇرىنعى پرەمەر-ءمينيستردىڭ ورىنباسارى الي باباجاننىڭ "دەموكراتيا جانە سەرپىلىس" پارتياسى (DEVA) - 3,8%، بۇرىنعى ۇكىمەت باسشىسى احمەت داۋىتوعلىنىڭ "بولاشاق پارتياسى" (GP)  - 1,7% داۋىس الار ەدى دەپ ەسەپتەيدى ساۋالناما قورىتىندىسى.

ساۋالناما سونداي-اق 2023 جىلعى سايلاۋ 2021 جىلدىڭ ماۋسىمىندا وتسە، وندا ەردوعان İYİ باسشىسى مەرال اكشەنەردەن، كەمال كىلىچداروگلۋدان، ستامبۇل مەرى ەكرەم يماموگلۋدان جانە انكارا مەرى مانسۇر ياۆاشتان جەڭىلىس تابار ەدى دەپ بولجايدى. ءدال وسىعان ۇقساس ناۋرىز ايىندا رەيتينگتى انىقتاۋ مەن ساياسي كوزقاراستى ءبىلۋ ماقساتىندا ۇيىمداستىرىلعان ساۋالنامادا ەردوعان پارتياسى سايلاۋ وتسە، 38% داۋىس الار ەدى دەگەن قورىتىندى جاساعان بولاتىن.

تۇركيادا سايلاۋ جاقىنداعان سايىن بيلىك پەن وپپوزيتسيا اراسىندا قاراما-قايشىلىق ارتىپ كەلەدى. وپپوزيتسيا تۇرىك بيلىگىن ءىرى جوبالاردان، مىسالى "ستامبۇل كانالىن سالۋدان باس تارتۋ كەرەك" دەسە، بيلىك كەرىسىنشە ء"بىز ەل بولاشاعىن ويلاپ وتىرمىز، سەندەر اقىلعا سالماي سويلەي بەرەسىڭدەر" دەۋمەن كەلەدى.

Abai.kz