تاۋەلسىزدىك الدىق ەركىندىككە قول جەتكىزدىك دەسەك تە، ەلگە ەلەۋلى تۇلعالاردىڭ ەسىمىن ءبىلىم وشاقتارى مەن مادەنيەت مەكەمەلەرىنە ت.ب. نىساندارعا بەرۋدە زور كەدەرگىگە تاپ بولىپ وتىرمىز. بارىنە قازاقستان رەسپۋبليكاسىنىڭ مادەنيەت جانە سپورت مينيسترلىگىندە جاسالعان ءتىزىم توسقاۋىل بولىپ وتىر.

2018 جىلى شقو وسكەمەن قالالىق اقساقالدار القاسىنىڭ توراعاسى سايلاۋحان اۋحاديەۆ كۇرشىم اۋدانىنىڭ مادەنيەت سالاسىنا 20 جىلعا جۋىق ۋاقىت جەتەكشىلىك ەتكەن قابدوللا تۇراروۆ ەسىمىن اۋداندىق مادەنيەت ۇيىنە بەرىلۋىن كوتەرگەن بولاتىن https://egemen.kz/article/167264-madeniet-uyine-esimi-berilse . بەرىلمەدى. بىراق تاپ وسىنداي جاعدايعا 2019-2021 جىلدارى بورودۋليحا مەن اياگوز اۋدانى دا تاپ بولدى. ماسەلەنى تارقاتىپ ايتساق، ج.ەلەبەكوۆتىڭ العاشقى شاكىرتتەرىنىڭ ءبىرى، ءداستۇرلى حالىق اندەرىنىڭ شەبەر ورىنداۋشىسى  1975 جىلدان ءومىرىنىڭ سوڭىنا دەيىن سەمەي وبلىسى فيلارمونياسىنىڭ ءانشىسى بولعان بۇرىنعى بەلاعاش، قازىرگى بورودۋليحا اۋدانىنىڭ تۋماسى مادەنيەت ەشەكەەۆكە جەرلەستەرىنىڭ اتىنان اۋداندىق مادەنيەت ۇيىنە بەرمەك بولعان اۋداندىق اكىمشىلىكتىڭ تۇمسىعى تاسقا سوعىلدى.

تاپ وسىنداي جاعدايعا اياگوز اۋداندىق اكىمشىلىگى دە ۇشىراپ وتىر. ايعىز اۋىلىنىڭ تۇرعىندارى جەرگىلىكتى مەكتەپكە  اتاقتى كۇيشى ءجۇنىسباي ستامباەۆتىڭ جيەنى قازاق جازۋشىسى، كينودراماتۋرگ، كۇيشى، ادەبيەت جانە مۋزىكا سىنشىسى، ميفولوگيا، تاريح جانە ەتنوگرافيا زەرتتەۋشىسى، دومبىرا شەبەرى، قازاق تىلىنەن ورىس تىلىنە، ورىس تىلىنەن قازاق تىلىنە تارجىمە جاساعان اۋدارماشى تالاسبەك اسەمقۇلوۆتىڭ ەسىمىن بەرە الماي وتىر.

بۇل ءبىر شقو - داعى جاعداي ەمەس، بارشا وبلىستار كىسى ەسىمىن بەرۋدە ۇشىراپ وتىرعان جاعداي. تەك وكىنىشتىسى مادەنيەت جانە سپورت مينيسترلىگىندە جاسالعان ءتىزىمنىڭ ارقاسىندا ەشكىمگە بەلگىسىز ەسىمدەر ءبىلىم وشاقتارى مەن مادەنيەت وشاقتارىنا توقتاۋسىز بەرىلىپ جاتىر.

ال، ونى جاساۋدا جەرگىلىكتى جەردەگى ونەر ادامدارى مەن زيالى قاۋىمنىڭ پىكىرىنىڭ ەسكەرىلمەۋىن نەمەن تۇسىندىرەمىز. ءتىزىم اتا زاڭ ەمەس، ونى قايتا قاراۋعا بولماي ما دەگەن سۇراۋ قارا تۇراندىقتاردى (شقو مەن پاۆلودار وبلىستارىنىڭ تۇرعىندارىن) پۇشايمان ەتىپ وتىر.

ءابىل-سەرىك الىاكبار

Abai.kz