جۇما, 20 قاراشا 2026
جاڭالىقتار 104 0 پىكىر 20 قاراشا, 2026 ساعات 14:20

8 ميللياردتىڭ ەسەبى: لەگيونەرلەرگە كەتەتىن اقشا

سۋرەت: inbusiness.kz سايتىنان الىندى.

قازاقستان سپورتىنداعى ەڭ وزەكتى ءارى قوعامنىڭ قىزۋ تالقىسىنا تۇسكەن ماسەلە – شەتەلدىك لەگيونەرلەردى مەملەكەت قارجىسىنا اسىراۋ تاجىريبەسىنە نۇكتە قويىلدى.

تۋريزم جانە سپورت ءمينيسترى ەربول مىرزابوسىنوۆتىڭ وكق مىنبەرىندە جاساعان مالىمدەمەسى بۇل رەفورمانىڭ العاشقى ناقتى جەمىسىن كورسەتىپ وتىر: 2026 جىلى بيۋدجەتتەن 8 ملرد تەڭگەدەن استام قاراجات ۇنەمدەلگەن.

بۇل جاي عانا تسيفر ەمەس، جىلدار بويى قالىپتاسقان ەسكى جۇيەنىڭ كۇيرەۋى مەن وتاندىق سپورتتى ساۋىقتىرۋدىڭ العاشقى قادامى.

بيۋدجەت قارجىسى قايدا باعىتتالادى؟

بۇعان دەيىن ايماقتىق بيۋدجەتتەردىڭ باسىم بولىگى كاسىبي كلۋبتارداعى كەلىمسەك ويىنشىلاردىڭ ميلليونداعان جالاقىسى مەن سىياقىسىنا جۇمسالىپ كەلگەنى جاسىرىن ەمەس. ەندى كاسىبي كلۋبتاردى قارجىلاندىرۋعا بىرىڭعاي شەك (ليميت) قويىلىپ، ۇنەمدەلگەن 8 ميلليارد تەڭگە مىناداي ستراتەگيالىق باعىتتارعا بۇرىلدى:

بالالار مەن جاسوسپىرىمدەر سپورتى: بولاشاق چەمپيونداردى تاربيەلەيتىن ىرگەتاستى نىعايتۋ.

بۇقارالىق سپورت: حالىقتىڭ دەنساۋلىعى مەن سپورتقا قولجەتىمدىلىگىن ارتتىرۋ.

ۇلتتىق قۇرامالاردى دايارلاۋ: حالىقارالىق ارەنادا ەل نامىسىن قورعايتىن ءوز ورەندەرىمىزگە جاعداي جاساۋ.

سپورت ينفراقۇرىلىمى: وڭىرلەردەگى ەسكىرگەن نىسانداردى جاڭارتۋ جانە جاڭا الاڭدار سالۋ.

وڭىرلىك تەڭسىزدىك جويىلدى: تولەمدەر بىرىزدەندىرىلدى

رەفورمانىڭ تاعى ءبىر ماڭىزدى قىرى – سپورتشىلار مەن باپكەرلەرگە تولەنەتىن اي سايىنعى ەڭ تومەنگى تولەمدەردىڭ وڭىرگە قاراماستان بىردەي بەلگىلەنۋى. بۇرىن باي وبلىستار چەمپيوندارعا قوماقتى قارجى تولەسە، دوتاتسيالىق وڭىرلەردىڭ سپورتشىلارى شەتقاقپاي قالىپ جاتاتىن. ەندى بارلىق ايماق ءۇشىن:

وليمپيادا جانە پاراليمپيادا جەڭىمپازدارىنا - 250 اەك (1 081 250 تەڭگە); جاتتىقتىرۋشىعا 125 اەك (540 625 تەڭگە), ال، قازاقستان چەمپيوناتىنىڭ جەڭىمپازدارىنا - 60 اەك (259 500 تەڭگە) جاتتىقتىرۋشىعا - 30 اەك (129 750 تەڭگە) تولەيتىن ورتاق ستاندارت ەنگىزىلدى.

سونىمەن قاتار، پاراسپورتشىلارعا قوسىمشا قولداۋ تەتىكتەرىنىڭ قاراستىرىلۋى – الەۋمەتتىك ادىلەتتىلىك پەن ينكليۋزيۆتى سپورتتى دامىتۋدىڭ ناقتى كورىنىسى.

ءتۇيىن: مەملەكەت قارجىسىنا شەتەلدىك سپورتشىلاردى «باعۋ» – ۋاقىتشا ناتيجەگە عانا جۇمىس ىستەيتىن، بولاشاعى بۇلىڭعىر جول ەدى. كاسىبي كلۋبتار ەندى دەمەۋشىلەر تارتۋعا، ءوز ونىمدەرىن ساتۋعا جانە مەنەدجمەنتتى دامىتۋعا ءماجبۇر بولادى. ال مەملەكەت ءوز مىندەتىن – ۇلت ساۋلىعى مەن جاس بۋىننىڭ سپورتتىق الەۋەتىن كوتەرۋدى قولعا الدى. 8 ميلليارد تەڭگە – بۇل باستاماسى عانا. ەندىگى مىندەت – وسى قارجىنىڭ تالان-تاراجعا تۇسپەي، اۋىل مەن قالاداعى قاراپايىم بالالاردىڭ يگىلىگىنە جەتۋىن قاتاڭ باقىلاۋدا ۇستاۋ.

Abai.kz

0 پىكىر