جەكسەنبى, 26 قىركۇيەك 2021
بيلىك 2025 6 پىكىر 8 شىلدە, 2021 ساعات 12:35

مىندەتتى ۆاكتسيناتسيا: ەل نارازى. مينيسترلىك نە دەيدى؟

مىندەتتى ۆاكتسيناتسيالاۋعا قاتىستى ەل اراسىندا الۋان ءتۇرلى پىكىر بار. وسىعان وراي قر ادىلەت مينيسترلىگى «مىندەتتى ۆاكتسيناتسيا كونستيتۋتسيا تالاپتارىنا قايشى ەمەس» دەپ، مالىمدەدى. 

مينيسترلىك اقپاراتىنشا، ينفەكتسيالىق جانە پارازيتتىك اۋرۋلاردىڭ پايدا بولۋى مەن تارالۋىنىڭ الدىن الۋ ماقساتىندا دەنساۋلىق تۋرالى كودەكستە كوزدەلگەن سانيتاريالىق-ەپيدەمياعا قارسى ءىس-شارالاردىڭ ءبىرى – پروفيلاكتيكالىق ەكپەلەر.

«مەديتسينالىق قارسى كورسەتىلىمدەرى جوق، قر اۋماعىندا تۇراقتى تۇراتىن جەكە تۇلعالار ينفەكتسيالىق جانە پارازيتتىك اۋرۋلارعا قارسى ەكپەلەردى الۋعا مىندەتتى (كودەكستىڭ 85-بابىنىڭ 4 جانە 8-تارماقتارى), ولاردىڭ قاتارىنا كۆي-عا قارسى پروفيلاكتيكالىق ەكپە دە جاتادى (قازاقستان رەسپۋبليكاسى ۇكىمەتىنىڭ 2020 جىلعى 24 قىركۇيەكتەگى № 612 قاۋلىسىنا سايكەس)»،- دەدى مينيسترىلك.

وسىلايشا، مەديتسينالىق قارسى كورسەتىلىمدەرى جوق ادامدار ءۇشىن كۆي-عا قارسى مىندەتتى ۆاكتسيناتسيالاۋدىڭ قۇقىقتىق نەگىزدەرى بار جانە بۇل «مەملەكەت ادامنىڭ ءومىر ءسۇرۋى مەن دەنساۋلىعىنا قولايلى اينالاداعى ورتانى قورعاۋدى ماقسات ەتىپ قويادى» دەگەن كونستيتۋتسيالىق نورماعا سايكەس كەلەدى (كونستيتۋتسيانىڭ 31-بابى) دەيدى مينيسترلىك.

«ادامنىڭ جانە ازاماتتىڭ قۇقىقتارى مەن بوستاندىقتارىنا كەپىلدىك بەرە وتىرىپ، قر كونستيتۋتسياسى مۇنداي شەكتەۋدىڭ جول بەرىلەتىن شەكتەرىن بەلگىلەي وتىرىپ، ولاردى شەكتەۋ مۇمكىندىگىن جوققا شىعارمايدى.

ادامنىڭ قۇقىقتارى مەن بوستاندىقتارىن جانە حالىقتىڭ دەنساۋلىعىن قورعاۋ ماقساتىندا عانا قۇقىقتار مەن بوستاندىقتار شەكتەلۋى مۇمكىن (كونستيتۋتسيانىڭ 39-بابىنىڭ 1-تارماعى)»،- دەلىنگەن حابارلامادا.

وسىعان دەيىن الەۋمەتتىك جەلىلەر مەن باق-تا جاڭاوزەندەگى جەدەل جاردەم قىزمەتكەرلەرى كوروناۆيرۋسقا قارسى ۆاكتسيناتسياعا نارازىلىق بىلدىرگەنى تۋرالى اقپارات تاراعان ەدى.

ناقتىراق ايتساق، ماڭعىستاۋ وبلىستىق جەدەل جانە شۇعىل مەديتسينالىق جاردەم ستانتسياسىنىڭ باسشىسى ايلاربەك شيرشيكباەۆ 29 ادام ۆاكتسيناتسيادان باس تارتقانىن راستادى.

جاڭاوزەن قالالىق جەدەل جانە شۇعىل مەديتسينالىق جاردەم ستانتسياسىندا 130 ادام جۇمىس ىستەيدى، ولاردىڭ 45-ءى كوروناۆيرۋسقا قارسى ۆاكتسينا العان.

ماڭعىستاۋ وبلىسىنىڭ دەنساۋلىق ساقتاۋ باسقارماسىنىڭ ءباسپاسوز قىزمەتى جەدەل جاردەم قىزمەتكەرلەرىنىڭ ارەكەتتەرى الەۋمەتتىك جەلىلەر مەن مەسسەندجەرلەردە ۆاكتسيناتسيا تۋرالى جالعان اقپارات پەن قاۋەسەتتىڭ تارالۋىنا بايلانىستى ەكەنىن ايتادى.

«جەدەل جاردەم COVID-19-بەن كۇرەسۋدە الدىڭعى قاتاردا. اۋرۋ نەمەسە ينفەكتسياعا كۇدىكتى ادامدار ەڭ الدىمەن «103» قىزمەتىن شاقىرادى. ەگەر جۇمىسشىلار ۆاكتسينا سالدىرماسا، ولار حالىققا قاۋىپ ءتوندىرۋى نەمەسە، كەرىسىنشە، وزدەرىنە جۇقتىرۋى مۇمكىن ەكەنىن ءتۇسىنۋ كەرەك. قازىر ۆاكتسيناتسيا ماسەلەسىنە جاۋاپكەرشىلىكپەن قاراۋ كەرەك ۋاقىت كەلدى. ءبىر ادام جۇزدەگەن ادامعا ۆيرۋستى وڭاي جۇقتىرا الادى. مۇنىڭ سوڭى جاقسىلىققا اپارماۋى مۇمكىن»، – دەپ حابارلادى وبلىستىڭ دەنساۋلىق ساقتاۋ باسقارماسى.

دارىگەرلەردەن باسقا، جاڭاوزەندەگى باسقا ماماندىقتاردىڭ وكىلدەرى دە ۆاكتسيناتسياعا قارسى شىققان.

Abai.kz

6 پىكىر