18 تامىز كۇنى ازاپتاۋلاردىڭ الدىن الۋ جونىندەگى توپ وكىلدەرى پاۆلودار وبلىسىنداعى اپ-162/1 تۇزەتۋ مەكەمەسىندە جازاسىن وتەپ جاتقان ساياسي تۇتقىن ارون اتابەككە بارىپ قايتىپتى. بۇل تۋرالى ادام قۇقىقتارىن قورعاۋ بيۋروسى حابارلادى. 

كەزدەسۋ بارىسىندا ارون اتابەك دەنساۋلىعىنىڭ ناشارلاعانىن ايتقان.

«ەكى قولىم اۋىرادى، جوعارى كوتەرە المايمىن، بۇگىلمەيدى، قالامساپ ۇستاۋدىڭ ءوزى قيىن. اياعىم اۋىرادى، كامەرا ىشىندە عانا جۇرەمىن، سەرۋەنگە شىعۋدان باس تارتتىم. تاكسوفونعا قولاربامەن بارامىن. ەتاپتا سوققىعا جىققان كەزدەگى جاراقاتتارىم بولۋ كەرەك. تولىق تەكسەرۋدەن ءوتۋدى ۇسىندى، بىراق مەن ودان باس تارتتىم. سەبەبى مەنىڭ جاسىمدا «وبلۋچەنيە» الۋ قاۋىپتى دەپ ەسەپتەيمىن»، – دەگەن ارون اتابەك.

مەكەمە اكىمشىلىگى توپ مۇشەلەرىنە ارون اتابەكتىڭ امبۋلاتوريالىق كارتاسىن كورسەتكەن. وندا ول 04.08.2021 جىلى قان ءاناليزىن تاپسىرۋدان، فليۋروگرافياعا تۇسۋدەن، بۋىندارىن رەنتگەنگە تۇسىرۋدەن باس تارتقاندىعى جازىلعان. مەكەمە باسشىسى قاپىشەۆ ءادىلحان تەمكەنۇلى ارون اتابەك مەديتسينا قىزمەتكەرلەرىنىڭ باقىلاۋىندا ەكەندىگىن ايتقان.

№ 228 مەديتسينالىق حاتتاماسىندا ارون اتابەكتىڭ سۇيەك-بۋىنى اۋىراتىندىعى، ەكى قولىنىڭ دا ساۋساقتارى دەفورماتسيالانعانى، جارتى جىلدان بەرى ءىش قاتۋ سالدارىنان ۇلكەن دارەتكە بارا الماي، كليزما الاتىندىعى جانە جۇرگەندە دەنەسى دىرىلدەيتىنى جازىلعان.

بۇدان بولەك، حاتتامادا ونىڭ 30.07.2021 جىلى مەديتسينالىق تەكسەرۋدەن باس تارتقانى جونىندە، كەيىننەن تەراپەۆت دارىگەردىڭ تەكسەرۋدى كامەرادا وتكىزگەندىگى جونىندە ايتىلعان. دارىگەر ارون اتابەككە تسەرەبروسكلەروز، ديستسيركۋلياتورلىق ەنتسەفالوپاتيا، ستەنوكارديا، سوزىلمالى گاستريت، سوزىلمالى گەمورروي، قول-اياقتىڭ ارتروزو-ءارتيتتى دياگنوزدارىن قويىپ، جالپى كلينيكالىق اناليز تاپسىرۋعا، ۆيتاميندەر ىشۋگە، نەۆروپاتولوگ پەن كارديولوگقا بارۋعا، ۋزي، وبپ جانە رەنتگەنگە تۇسۋگە كەڭەس بەرگەن. بىراق ارون اتابەك ونىڭ بارلىعىنان باس تارتقان.

كەزدەسۋ بارىسىندا ارون اتابەك بۇعان دەيىن قۇقىق قورعاۋشى ەلەنا سەمەنوۆادان سالەمدەمە الىپ تۇرعانىن، بىراق، سەمەنوۆانىڭ ۇزاق ۋاقىتتان بەرى كەلمەي كەتكەنىن ايتقان. كەزدەسۋ سوڭىندا ارون اتابەك مەرزىمىنەن بۇرىن بوساتۋعا ءوتىنىش جازبايتىنىن، ءۇش جىلدان كەيىن بوستاندىققا شىققان سوڭ تولىقتاي وتەماقى تولەتۋگە شاعىمداناتىنىن جەتكىزگەن. بۇعان قوسا مەكەمە باسشىسىنان مەرزىمىنىڭ سوڭىنا دەيىن ەشقايدا اۋىستىرماۋىن سۇراپ، سوڭىنا دەيىن وسى جەردە قالاتىنىن مالىمدەگەن.

بۇعان دەيىن، ۇلىقبەك ەسداۋلەت، ولجاس سۇلەيمەنوۆ، مۇرات اۋەزوۆ باستاعان ءبىر توپ قالامگەرلەر تۇرمەدەگى اقىن ارون اتابەككە اراشا سۇراپ، پرەزيدەنت قاسىم-جومارت توقاەۆقا حات جازعان.

«ارون اتابەك 2006 جىلعى ايگىلى «شاڭىراق» وقيعاسىن ۇيىمداستىردى، كىسى ولىمىنە سەبەپكەر بولدى» دەگەن جالعان جالامەن 18 جىلعا يتجەككەنگە ايدالىپ، سوتتالدى. قازاق ەلى تاريحىندا وزىندىك قولتاڭباسى بار، ياعني، «قازاق مەملەكەتى» ت.ب. بىرنەشە ۇيىمنىڭ جەتەكشىسى، اقىن، تۇركولوگ، جەلتوقسان كوتەرىلىسىنىڭ بەل ورتاسىندا ءجۇرىپ، بۇگىنگى تاۋەلسىزدىگىمىز ءۇشىن كۇرەسكەن باتىرىمىز ارون قابىشۇلى اتابەك اۋىر قىلمىس جاساعان قىلمىسكەرلەرگە ارنالعان تۇرمەدە وتىرعانىنا الداعى جىلى 15 جىل تولادى.

جان ازابى ءوز الدىنا، تۇرمەدەگى قيناۋ مەن ازاپتاۋدىڭ الۋان ءتۇرىن باسىنان كەشىرگەن ارون اتابەكتىڭ دەنساۋلىعى بىرنەشە جىلدان بەرى كۇرت ناشارلاپ كەتتى. جاسى 70-كە تاياعان قارتتىڭ ەكى قولى مۇلدەم كوتەرىلمەيدى، جۇرەكتىڭ يشەميالىق اۋرۋى قان قىسىمى، بۇيرەك-وكپە، بۋىن اۋرۋلارىنا ت.ب. ومىرىنە قاۋىپ توندىرەتىن، تۇرمە جاعدايىندا ەمدەلۋگە كەلمەيتىن كەسەلدەرگە دۋشار بولدى.

ءسىزدىڭ ەل بولاشاعىنىڭ ىنتىماق-بىرلىگىن ساقتاۋشى رەتىندە ارون اتابەكتىڭ بوستاندىققا شىعۋىنا كومەك قولىن سوزادى دەگەن زور ۇمىتتەمىز»، - دەلىنگەن اشىق حاتتا.

ارتىنشا قازاق قالامگەرلەرىنىڭ ارون اتابەككە اراشا سۇراعان ۇندەۋىن رەسەيلىك قۇقىق قورعاۋشى ۇيىمدار - پەن-موسكۆا مەن «سۆوبودنوە سلوۆو» اسسوتسياتسياسى دا قولدادى.

«2019 جىلى ەۋروپارلامەنت ارون اتابەكتى دەرەۋ بوساتۋ تۋرالى ارنايى رەزوليۋتسيا قابىلداعان. ءوز حالقىنىڭ ناعىز ۇلى، 1986 جىلعى جەلتوقسان كوتەرىلىسىنىڭ قاتىسۋشىسى جانە 1989 جىلدىڭ ساۋىرىندەگى كسرو حالىق دەپۋتاتتارىنىڭ 1 سيەزىنە قازاقستاننىڭ ەگەمەندىگى تۋرالى جانە ساياسي قۋدالاۋ كورگەندەردى دەرەۋ بوساتۋ تۋرالى حاتتى ۇيىمداستىرۋشى اقىن ارون اتابەك بوساتىلسىن!»، - دەپ جازدى پەن-موسكۆا مەن «سۆوبودنوە سلوۆو» اسسوتسياتسياسى.

ايتا كەتەيىك، ارون اتابەك 2006 جىلى الماتىدا بولعان «شاڭىراق» وقيعاسىنا قاتىسقانى ءۇشىن 18 جىلعا سوتتالدى. وعان وقيعا بارىسىندا پوليتسيا قىزمەتكەرىن ءولتىردى دەگەن ايىپ تاعىلعان. 18 جىلدىق جازانى ول پاۆلودارداعى تۇرمەدە وتەپ جاتىر.

نۇربيكە بەكسۇلتانقىزى

Abai.kz